ସମ୍ବଲପୁର, ୧୯ା୬(ଶୁଭାଶୀଷ ପାଢୀ): ଚାଷଜମିକୁ ସୁଷମ ଜଳ ବଣ୍ଟନ କରିବା ପାଇଁ ସରକାର ହୀରାକୁଦ ଜଳଭଣ୍ଡାର କେନାଲଗୁଡିକ ନବୀକରଣ କରି କଂକ୍ରିଟ କରୁଛନ୍ତି। ଶାସନ, ହୁମାଟେଲ, ପରମାଣପୁର କେନାଲର ଗତବର୍ଷଠାରୁ ନିର୍ମାଣ କାମ ଆରମ୍ଭ ହୋଇଛି। ଓସିସି ପକ୍ଷରୁ କାମ ତଦାରଖ କରାଯାଉଥିବାବେଳେ ଭୁବନେଶ୍ୱରର ଏକ ଠିକା ସଂସ୍ଥା କାମ କରୁଛି। ହେଲେ ଏହି କେନାଲ ନିର୍ମାଣ କାମରେ ବ୍ୟାପକ ଦୁର୍ନୀତି ଓ ଅନିୟମିତତା ହେଉଥିବା ନେଇ ଚାଷୀମାନେ ଅଭିଯୋଗ କରିଛନ୍ତି। ଜଳସେଚନ ବିଭାଗ ଅଧିକାରୀଙ୍କୁ ଏନେଇ ଅଭିଯୋଗ କରିବା ପରେ ମଧ୍ୟ ସେମାନେ ପଦକ୍ଷେପ ଗ୍ରହଣ କରୁନାହାନ୍ତି। ଠିକା ସଂସ୍ଥାକୁ ପ୍ରଶୟ ଦେଲାଭଳି ଚୁପ ବସି ଯାଉଛନ୍ତି। ଅନ୍ୟପଟେ ଓସିସି ଜେଇ ଓ ଟେକନିକାଲ ଦଳ ଉପସ୍ଥିତିରେ କାମ ହେଉଛି। ସେମାନେ ମଧ୍ୟ ତଦାରଖ କରୁନାହାନ୍ତି ବୋଲି ଅଭିଯୋଗ ହେଉଛି। ଚାଷୀ ଦେବେନ୍ଦ୍ର ପ୍ରଧାନ କହିଛନ୍ତି ଯେ, କାମ ଆରମ୍ଭରୁ ନିମ୍ନମାନର ହେଉଥିବା ନେଇ ଅଭିଯୋଗ କରିଥିଲୁ। ଏପରିକି କାମ ହେଉଥିବା ସ୍ଥାନକୁ ଯାଇ କାମ ବନ୍ଦ କରି କରି ଦିଆଯାଇଥିଲା। ପରେ କାମମାନ ଠିକ କରିବାକୁ କହିଥିଲେ ଠିକା ସଂସ୍ଥା ଅଧିକାରୀ। ହେଲେ ଯେଭଳି ଚାଲୁଥିଲା ସେଭଳି ଚାଲିଲା। ଗତ ବର୍ଷରେ ଯେତେ କିମି କେନାଲ ନିର୍ମାଣ ହୋଇଥିଲା, ମାତ୍ର ୪ ମାସ ପାଣି ପ୍ରବାହିତ ହୋଇଛି। ଉକ୍ତ କେନାଲରେ କଂକ୍ରିଟ ଉପୁଡି ଯାଇଛି। ୱାଲଗୁଡିକ ଭାଙ୍ଗିବାକୁ ବସିଲାଣି। କାମର ମାନ ଠିକ ହୋଇ ନ ଥିବାରୁ ୫ ମାସରେ କୋଟି କୋଟି ଟଙ୍କା ବରବାଦ ହୋଇଯିବ। ଚାଷୀ ଓ ଚାଷ ପାଇଁ ନବିକରଣ ହେଉଥିବା କେନାଲ କାମରେ ଲାଗିବ ନାହିଁ ଓଲଟା ସମସ୍ୟା ସୃଷ୍ଟି କରିବ। ଚଳିତବର୍ଷ ଏକ ମାସ ଭିତରେ ଯାହା କାମ ହୋଇଛି ଉକ୍ତ କାମର ସ୍ଥାୟିତ୍ୱକୁ ନେଇ ମଧ୍ୟ ସନ୍ଦେହ ସୃଷ୍ଟି ହୋଇଛି। ଏବେ କେନାଲ ପାଣି ଛାଡି ଦିଆଯିବ। ସବୁ ଦୁର୍ନୀତି ଓ ଅନିୟମିତତା କେନାଲ ପାଣିରେ ବୋହିଯିବ। ହେଲେ ଆଗକୁ ଉଚିତ ତଦନ୍ତ କରା ନ ଗଲେ ଏହି ବୃହତ୍ତ ପ୍ରକଳ୍ପ ଲକ୍ଷ୍ୟଠାରୁ ଦୂରେଇ ଯିବ। ସରକାରଙ୍କ ଟଙ୍କାକୁ ଠିକା ସଂସ୍ଥା, ଅଧିକାରୀ ଭାଗବାଣ୍ଟି ଖାଇଦେବେ। ୨୦୦୪ ମସିହାରେ ମଧ୍ୟ କୋଟି କୋଟି ଟଙ୍କା କେନାଲ ନବିକରଣ ନାମରେ ଆତ୍ମସାତ କରିଥିଲେ। ଚାଷୀ ସଙ୍ଗଠନ ଅଭିଯୋଗ କରିଥିଲେ। ଏହାର ଉଚ୍ଚସ୍ତରୀୟ ତଦନ୍ତ ମଧ୍ୟ ହୋଇଥିଲା। ହେଲେ କାହାରି ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଗଲା ନାହିଁ ବୋଲି କହିଥିଲେ। ଜଳସେଚନ ବିଭାଗ ପକ୍ଷରୁ କୁହାଯାଇଛି, କାମ ହେବା ପରେ ଜଳସେଚନ ବିଭାଗ ଯାଞ୍ଚ କରି ରିପୋର୍ଟ ଦେବ। ଏବେ ମଧ୍ୟ ଚାଷୀଙ୍କ ଅଭିଯୋଗକୁ ଆଧାର କରି ଠିକା ସଂସ୍ଥାକୁ ତାଗିଦ କରାଯାଇଛି। ସୂଚନାଯୋଗ୍ୟ ଯେ, ଶାସନ, ପରମାଣପୁର, ହୁମାଟେଲ ନବିକରଣ ପାଇଁ ମୋଟ ୧୨୩ କୋଟି ଟଙ୍କା ମଞ୍ଜୁର ହୋଇଛି। ବିଭିନ୍ନ ଠିକା ସଂସ୍ଥା ଏହି କାମ କରୁଛନ୍ତି।