ବିଞ୍ଝାରପୁର,୨୮ା୪(ଡି.ଏନ.ଏ.): ବିଞ୍ଝାରପୁର ବ୍ଲକ ଅଧୀନ ସୟଦପୁର ପଞ୍ଚାୟତର ବିଭିନ୍ନ ଗାଁରେ ଡ୍ରେନ୍ ସଫେଇରେ ବ୍ୟାପକ ଦୁର୍ନୀତି ହୋଇଥିବା ଅଭିଯୋଗ ହୋଇଛି। ବ୍ଲକ୍ କାର୍ଯ୍ୟାଳୟରୁ ମିଳିଥିବା ତଥ୍ୟ ଅନୁଯାୟୀ, ସୟଦପୁର ପଞ୍ଚାୟତ ସରପଞ୍ଚଙ୍କ ପ୍ରତିବଦ୍ଧତା ଅନୁଯାୟୀ ପଞ୍ଚାୟତର ବିଭିନ୍ନ ଡ୍ରେନ୍ ସଫେଇ ପାଇଁ ୨୦୨୨ ସେପ୍ଟେମ୍ବର ୩୦ରେ ପଞ୍ଚାୟତ ଅର୍ଥରୁ ୧ ଲକ୍ଷ ୭୬ ହଜାର ୪୦୦ ଟଙ୍କା ମଞ୍ଜୁର କରାଯାଇଥିଲା। ଭେଣ୍ଡର ଗୋରାଚାନ୍ଦ ଦାସଙ୍କ ଜରିଆରେ କନିଷ୍ଠ ଯନ୍ତ୍ରୀ ଶିଶିର ଶେଖର ନାୟକ ଓ ପିଇଓ ରାଜେଶ କୁମାର ଦାସଙ୍କ ଦ୍ୱାରା ଟଙ୍କା ଉଠାଣକରି ସରପଞ୍ଚ ଖର୍ଚ୍ଚ କରିଥିଲେ। ଅନ୍ୟପଟେ ପଞ୍ଚାୟତରେ ଥିବା ଡ୍ରେନ୍ ଆଦୌ ସଫେଇ ହୋଇ ନ ଥିବା ପଞ୍ଚାୟତବାସୀ ଅଭିଯୋଗ କରିଛନ୍ତି।
ସୟଦପୁର ପଞ୍ଚାୟତ ୧୧ ନମ୍ବର ୱାର୍ଡର ହୋସେନି ମହଲ୍ଲା ଏବଂ ସର୍ଦାରି ମହଲ୍ଲା କହିଛନ୍ତି, ରାସ୍ତା କଡ଼ରେ ଥିବା ଡ୍ରେନ୍ ଏବେ ଗ୍ରାମର ପ୍ରାୟ ୨୦୦ ପରିବାରଙ୍କ ଦୁର୍ଦ୍ଦଶାର କାରଣ ପାଲଟିଛି। ଦୀର୍ଘଦିନ ଧରି ଡ୍ରେନ ପାଣିରେ ପୁରିରହିଛି। ନିଷ୍କାସନ ନ ହେବା କାରଣରୁ ଡ୍ରେନ ପାଣି ରାସ୍ତା ଉପରେ ଲହଡ଼ି ମାରୁଛି। କେବଳ ବଡ଼ ମଣିଷ ନୁହନ୍ତି ଛୋଟ ପିଲାମାନେ ମଧ୍ୟ ଅପରିଷ୍କାର ପାଣିରେ ପଶି ଯିବାଆସିବା କରୁଛନ୍ତି। ଅପରିଷ୍କାର ପାଣିରେ ଯିବାଆସିବା ଦ୍ୱାରା ବିଭିନ୍ନ ରୋଗ ହେଉଛି। ଏନେଇ ବ୍ଲକ ପ୍ରଶାସନଠାରୁ ଆରମ୍ଭ କରି ଜିଲା ପ୍ରଶାସନ, ସ୍ଥାନୀୟ ଜନ ପ୍ରତିନିଧିଙ୍କୁ ଅବଗତ କରାଯାଇଥିଲେ ସୁଦ୍ଧା କୌଣସି ସୁଫଳ ମିଳୁ ନ ଥିବା ସେମାନେ କହିଛନ୍ତି। ତେବେ ଆଗମୀ ଦିନରେ କୌଣସି ପଦକ୍ଷେପ ନିଆ ନ ଗଲେ ଆନ୍ଦୋଳନ କରାଯିବ ବୋଲି ଗ୍ରାମର ଜୁଲଫୁକାର ଅଲ୍ଲୀ ଖାନ, ସେକ୍ ଜଲାଲୁଦ୍ଦିନ, ସେକ୍ ରଫିଉଦ୍ଦିନ, ସେକ୍ ନସିରୁଦ୍ଦିନ, ସଲମା ବିବି, ମୁନେରା ବିବି ଓ ଅବୁବକର ଖାନଙ୍କ ସମେତ ବହୁ ଗ୍ରାମବାସୀ ଚେତାବନୀ ଦେଇଛନ୍ତି। ଏ ସମ୍ପର୍କରେ ସରପଞ୍ଚ ସେକ୍ ମହମ୍ମଦ ସବୀରଙ୍କୁ ପଚାରିବାରୁ ସେ କହିଛନ୍ତି, ୨ ବର୍ଷ ହେଲା ପଞ୍ଚାୟତରେ ଡ୍ରେନ୍ ସଫା କରାଯାଉଛି। ମାତ୍ର ସଚେତନତା ଅଭାବରୁ ଏଭଳି ପରିସ୍ଥିତି ସୃଷ୍ଟି ହୋଇଛି। ଲୋକେ ଘରର ଟ୍ୟୁବ୍ୱେଲ ପାଣି ରାସ୍ତାରେ ଛାଡୁଥିବାରୁ ତାହା ଜମି ରହୁଛି। ଲୋକେ ସଚେତନ ହେଲେ ଏହି ସମସ୍ୟାର ସମାଧାନ ହେବ।