ପୁରୀ,୬ା୨(ଅଜିତ୍ ମହାନ୍ତି):ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଲୋକାର୍ପଣ ସମୟରେ ସାରା ରାଜ୍ୟରେ ଅର୍ପଣ ରଥ ବୁଲିଥିଲା। ମହାପ୍ରଭୁଙ୍କ ଉଦ୍ଦେଶ୍ୟରେ ଭକ୍ତମାନେ ଗୁଆ ଓ ଚାଉଳ ଦାନ କରିଥିଲେ। ଉକ୍ତ ଚାଉଳରେ ଖେଚୁଡ଼ି ଓ କାନିକା ପ୍ରସ୍ତୁତ କରାଯାଇ ମହାପ୍ରଭୁଙ୍କ ନିକଟରେ ଭୋଗ ଲଗାଯାଇ ଭକ୍ତଙ୍କୁ ବଣ୍ଟାଯିବ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଥିଲା। ଚାଉଳର ମାନ ନିରୀକ୍ଷଣ ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ଏକ ସବ୍କମିଟି ଗଠନ କରାଯାଇଥିଲା। ଚାଉଳର ମାନ ନିରୀକ୍ଷଣ ପରେ ରବିବାର ସେହି ଚାଉଳରେ ଖେଚୁଡ଼ି ଓ କାନିକା ପ୍ରସ୍ତୁତ କରାଯାଇ ଭକ୍ତଙ୍କୁ ବଣ୍ଟାଯାଇଥିଲା। ଯାହାକୁ ନେଇ ଭକ୍ତମାନେ ଖୁସି ପ୍ରକାଶ କରିଥିଲେ। ତେବେ ସୋମବାର ସୁଆର ମହାସୁଆର ନିଯୋଗର ବରିଷ୍ଠ ସେବାୟତ ତଥା ଉକ୍ତ କମିଟିର ସଦସ୍ୟ ଦାମୋଦର ମହାସୁଆର ଅର୍ପଣ ଚାଉଳରୁ ଉଷୁନା ବାହାରିଥିବା ନେଇ ଅଭିଯୋଗ ଆଣିଛନ୍ତି। ଦାମୋଦର କହିଛନ୍ତି, ଶ୍ରୀମନ୍ଦିର ପରମ୍ପରା ଅନୁଯାୟୀ ଉଷୁନା ଚାଉଳରେ ମହାପ୍ରସାଦ ପ୍ରସ୍ତୁତ ହୋଇପାରିବନାହିଁ। ତେଣୁ ଏହି ଚାଉଳରେ ମହାପ୍ରସାଦ ପ୍ରସ୍ତୁତି ବନ୍ଦ କରାନଗଲେ ସେ ଆମରଣ ଅନଶନ କରିବେ। ରବିବାର ଅର୍ପଣ ଚାଉଳକୁ ସେ ନିରୀକ୍ଷଣ କରିଥିଲେ, ମାତ୍ର ତାଙ୍କ ନଜରରେ ଉଷୁନା ଚାଉଳ ଆସିନଥିଲା। ତେବେ ସୋମବାର ସେ ଚାଉଳ ଯାଞ୍ଚ କଲାବେଳେ ଅରୁଆଚାଉଳରେ ଉଷୁନା ଚାଉଳ ମିଶିଥିବା ଦେଖିବାକୁ ପାଇଥିଲେ। ଏ କଥା ଅନ୍ୟମାନଙ୍କୁ ଜଣାଇଥିଲେ। କିନ୍ତୁ କେହି ତାଙ୍କ କଥା ନ ଶୁଣିବାରୁ ସେ ବାଧ୍ୟହୋଇ ଗଣମାଧ୍ୟମ ସାମ୍ନାକୁ ଆସିଲେ। ଏ ସଂକ୍ରାନ୍ତରେ ସେ ଶ୍ରୀମନ୍ଦିର ଅତିରିକ୍ତ ମୁଖ୍ୟ ପ୍ରଶାସକଙ୍କୁ ଜଣାଇବେ ବୋଲି ଦାମୋଦର କହିଛନ୍ତି। ତେବେ ଏ ନେଇ ଶ୍ରୀମନ୍ଦିର ପ୍ରଶାସନ କିମ୍ବା ସୁଆର ମହାସୁଆର ନିଯୋଗର ପ୍ରତିକ୍ରିୟା ମିଳିପାରିନାହିଁ।