ଲୋଇସିଂହା,୧୩ା୫(ଡି.ଏନ୍.ଏ.): ବଲାଙ୍ଗୀର ଜିଲା ଲୋଇସିଂହା ବ୍ଲକ ପ୍ରଶାସନ ପକ୍ଷରୁ ପଞ୍ଚାୟତକୁ ଅନୁଦାନ ରାଶି ବଣ୍ଟନରେ ପାତରଅନ୍ତର କରାଯାଉଥିବା ଅଭିଯୋଗ ହେଉଛି। ଏହି ଘଟଣାରେ କେତେକ ପଞ୍ଚାୟତର ଅସନ୍ତୁଷ୍ଟ ସରପଞ୍ଚ ଓ ସମିତି ସଭ୍ୟାସଭ୍ୟ ବିଡିଓ ରାମଚନ୍ଦ୍ର ଖାଡ଼ିଆଙ୍କୁ ଗୁରୁବାର ଭେଟିଥିଲେ। କାହିଁକି କେତେକ ପଞ୍ଚାୟତରେ ଉକ୍ତ ଅନୁଦାନ ରାଶି ସୀମିତ ରଖଯାଇଛି। କାହା ଚାପରେ ଏସବୁ ଅନିୟମିତତା କରାଯାଇଛି କହି ସଭ୍ୟମାନେ ଅସନ୍ତୋଷ ବ୍ୟକ୍ତ କରିଥିଲୋ। ଏହାପରେ ବିଡିଓ ଖାଡିଆ ସେ ଜାଣି ନ ଥିବା କହିଥିଲେ। ବଣ୍ଟନ ହୋଇଥିବା ଅନୁଦାନ ରାଶି ସପ୍ତାହକ ମଧ୍ୟରେ ବାତିଲ କରି ସମସ୍ତ ପଞ୍ଚାୟତକୁ ଭାଗ ବଣ୍ଟା କରି ଦେବାକୁ ଅସନ୍ତୁଷ୍ଟ ଜନପ୍ରତିନିଧିଙ୍କୁ ବିଡିଓ ପ୍ରତିଶ୍ରୁତି ଦେଇଥିଲେ। ସଭ୍ୟମାନଙ୍କୁ ଉନ୍ନୟନ ପ୍ରକଳ୍ପର ପ୍ରସ୍ତାବ ଦେବାକୁ ଆହ୍ବାନ ଦେଇଥିଲେ । ବ୍ଲକ ପ୍ରଶାସନ ପକ୍ଷରୁ ୨୦୨୨-୨୩ ଆର୍ଥିକ ବର୍ଷରେ ବ୍ଲକର ୪ରୁ ୫ ପଞ୍ଚାୟତକୁ ସିଏଫ୍ସି ଓ ଏସ୍ଏଫ୍ସି ପାଣ୍ଠିରୁ ୧ କୋଟି ୮୨ ଲକ୍ଷ ୪୪ ହଜାର ୪ ଶହ ଟଙ୍କାର ଅନୁଦାନ ରାଶି ବଣ୍ଟନ କରାଯାଇଛି। ଉକ୍ତ ଅନୁଦାନରେ ପାନୀୟ ଜଳ,ପୋଖରୀ ପୁନରୁଦ୍ଧାର, ରାସ୍ତା ଉନ୍ନତିକରଣ,ସ୍ବଚ୍ଛତା, ମରାମତି ଆଦି କାର୍ଯ୍ୟ ହାତକୁ ନିଆଯାଇଛି। ହେଲେ ବଣ୍ଟନ ଅନୁଦାନ ରାଶି କେତେକ ପଞ୍ଚାୟତରେ ସୀମିତ ରଖିଥିବା ସରପଞ୍ଚ ଓ ସମିତି ସଭ୍ୟ ଜାଣିବାକୁ ପାଇଥିଲେ। ଏହାକୁ ନେଇ ଅନୁଦାନ ରାଶି ପାଇବାରୁ ବଞ୍ଚିତ ପଞ୍ଚାୟତର ସରପଞ୍ଚ ଓ ସମିତି ସଭ୍ୟଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା। ଏନେଇ ସରପଞ୍ଚ ପ୍ରଶାନ୍ତ ତ୍ରିପାଠୀ,ସୁଦୀପ ସା,କୌସ୍ତୁଭ ସାହୁ, ସମିତିସଭ୍ୟା ପାର୍ବତୀ ତ୍ରିପାଠୀ,ଜ୍ୟୋତ୍ସ୍ନାମୟୀ ନାଗ,ମହାଦେବ ବିଶ୍ୱାଳ,ଭଦ୍ରସେନ ଛତ୍ରିଆ,ବୀରେନ ସାହୁ ପ୍ରମୁଖ ବିଡିଓଙ୍କୁ ଭେଟି ଅଭିଯୋଗ ଜଣାଇଛନ୍ତି।