କାଳିଆପାଣି,୨୯ା୩(ଅସିତ ମହାନ୍ତ): ଯାଜପୁର ଜିଲା ସୁକିନ୍ଦା ବ୍ଲକର ଖଣି ଅଞ୍ଚଳରେ ବିଭିନ୍ନ ଯୋଜନାରେ ନିର୍ମାଣାଧୀନ କଂକ୍ରିଟ ରାସ୍ତା ଅତି ନିମ୍ନମାନର ହେଉଥିବା ଅଭିଯୋଗ ହୋଇଛି। ଏଭଳି ଏକ ଘଟଣା କାଳିଆପାଣି ପଞ୍ଚାୟତରେ ଦେଖିବାକୁ ମିଳିଛି। ଅଭିଯୋଗ ଅନୁଯାୟୀ କାଳିଆପାଣି ପଞ୍ଚାୟତର ଚିରୁଗୁଣିଆଁ ହଟିଂର ମୁଖ୍ୟ ରାସ୍ତାଠାରୁ ବସ୍ତିକୁ ଏକ କଂକ୍ରିଟ ରାସ୍ତା ସଦ୍ୟ ନିର୍ମାଣ ହୋଇଛି। ଯାହାକି, ସମ୍ପୂର୍ଣ୍ଣ ଭାବେ ନିମ୍ନମାନର ନିର୍ମାଣ କରାଯାଇଛି। ସ୍ବଳ୍ପ ପରିମାଣର ସିମେଣ୍ଟ ଭାଗମାପରେ ରାସ୍ତା ହୋଇଥିବାରୁ ତାହା ଧୂଳି ହୋଇ ଉଡ଼ିଯାଉଥିବା ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି। କଂକ୍ରିଟ ଉପରେ ପାଣି ପକାଇବାକୁ ନେଇ ଅବହେଳା କରାଯାଇଥିବରୁ ତା’ର ସ୍ଥାୟିତ୍ୱ ନେଇ ପ୍ରଶ୍ନ ଉଠିଛି। କାର୍ଯ୍ୟ ସମ୍ପୂର୍ଣ୍ଣ ହୋଇଥିଲେ ବି କାର୍ଯ୍ୟର ନାମ ଫଳକ ଏପର୍ଯ୍ୟନ୍ତ ଲେଖା ହୋଇନାହିଁ। ୨୦ ଏମ୍ଏମ୍ ସାଇଜରେ କଂକ୍ରିଟ ପାଇଁ ଏଷ୍ଟିମେଟ ହୋଇଥିବାବେଳେ ୪୦ ଏମ୍ଏମ୍ ସାଇଜ ମେଟାଲରେ କଂକ୍ରିଟ କରାଯାଇଛି। ସାଧାରଣତଃ ୪ ଇଞ୍ଚ ବାଲି, ୪ ଇଞ୍ଚ ମେଟାଲ, ୬ ଇଞ୍ଚ ଚିପ୍ସ ମାପରେ କଂକ୍ରିଟ ରାସ୍ତା ନିର୍ମାଣ କରିବାକୁ ସରକାରୀ ନିର୍ଦ୍ଦେଶ ରହିଛି। ସୁକିନ୍ଦା ବ୍ଲକର ଜଣେ କନିଷ୍ଠ ଯନ୍ତ୍ରୀଙ୍କ ନାମରେ ଏହି କାର୍ଯ୍ୟାଦେଶ ରହିଥିବାବେଳେ କାଳିଆପାଣି ସରପଞ୍ଚ ଓ ପିଇଓ କାର୍ଯ୍ୟସ୍ଥଳରେ ଠିଆହୋଇ କାମ କରାଉଥିବା ଜଣାପଡ଼ିଛି। ସରକାରୀ ନିର୍ଦ୍ଧାରିତ ମାପ ଅନୁଯାୟୀ ରାସ୍ତା ନିର୍ମାଣ ନ କରି ରାସ୍ତାର ଉଭୟ ପାର୍ଶ୍ୱରେ କଂକ୍ରିଟ ୱାଲ କରି ମଝିରେ ବାଲି ୬ ଇଞ୍ଚ ଭର୍ତ୍ତି କରି ରାସ୍ତା ନିର୍ମାଣ କରାଯାଇଛି। ୪୦ ସାଇଜ୍ ମେଟାଲରେ ମେଟାଲିଂ କରି ଉପରେ ୧ରୁ ୩ ଇଞ୍ଚ ଚିପ୍ସରେ କଂକ୍ରିଟ କରିଥିବା ଗ୍ରାମବାସୀ ପ୍ରକାଶ କରିଛନ୍ତି। ତେଣୁ ଏହି ଅନିୟମିତତାର ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଗ୍ରାମବାସୀ ଦାବି କରିଛନ୍ତି। ଏ ସମ୍ପର୍କରେ ପ୍ରତିକ୍ରିୟା ପାଇଁ କନିଷ୍ଠ ଯନ୍ତ୍ରୀ ଲିଙ୍ଗରାଜ ବେହେରାଙ୍କୁ ଫୋନ ଯୋଗେ ଯୋଗାଯୋଗ କରାଯାଇଥିଲେ ମଧ୍ୟ ସେ ଫୋନ କଲ ଗ୍ରହଣ କରି ନ ଥିଲେ।
