ବରଗଡ଼ ଅଫିସ୍,୨୭।୯: ପ୍ରଧାନମନ୍ତ୍ରୀ ଫସଲବୀମା ଯୋଜନାକୁ ନେଇ ବରଗଡ଼ ଜିଲାରେ ଚାଷୀ ଅସନ୍ତୋଷ ଥମୁ ନାହିଁ । ବୀମା ପାଇବା ଲୋଭରେ ଜମି ଜାଲିଆତି ଯୋଗୁ ଅନେକ ଯୋଗ୍ୟ ଚାଷୀ ସେମାନଙ୍କ ପ୍ରାପ୍ୟ ବୀମ ସହାୟତାରୁ ବଞ୍ଚିତ ହୋଇଥିବା ଅଭିଯୋଗ ହୋଇଛି । ଅନ୍ୟପଟେ କେତେକ ସ୍ଥଳେ ବୀମା ସହାୟତା ପହଞ୍ଚି ଥିଲେ ସୁଦ୍ଧା ତାହା ପ୍ରଦାନରେ ଅନିୟମିତତା କରାଯିବା ଭଳି ଗୁରୁତର ଅଭିଯୋଗ ହୋଇଛି । ଜିଲାର ବଡ଼ ବାଉଁଶେନ ପ୍ରାଥମିକ କୃଷି ସମବାୟ ସମିତି ଉପରେ ନିର୍ଭର କରୁଥିବା ଅନେକ ଚାଷୀ ଏଭଳି ଅଭିଯୋଗ ଆଣି ସୋମବାର ବରଗଡ଼ ଜିଲାପାଳଙ୍କୁ ଫେରାଦ ହୋଇଥିଲେ । ଜିଲାପାଳ ମୋନିଷା ବାନାର୍ଜୀଙ୍କୁ ଏକ ସ୍ମାରକପତ୍ର ପ୍ରଦାନ କରି ଏହାର ବିଧିବଦ୍ଧ ତଦନ୍ତ ସହିତ କାର୍ଯାନୁଷ୍ଠାନ ନେବାକୁ ସେମାନେ ନିବେଦନ କରିଛନ୍ତି ।
ସ୍ମାରକପତ୍ରରେ ଉଲ୍ଲେଖ ରହିଛି, ଉକ୍ତ ସମବାୟ ସମିତିରେ ବୀମା ସହାୟତା ପ୍ରଦାନ ନେଇ ବ୍ୟାପକ ଅନିୟମିତା କରାଯାଇଛି । ଏଥିରେ ସମିତିର କିଛି କର୍ମଚାରୀଙ୍କ ସମ୍ପୃକ୍ତି ରହିଥିବା ନେଇ ଚାଷୀମାନେ ଅଭିଯୋଗ କରିଛନ୍ତି । କର୍ମଚାରୀଙ୍କ ଅନିୟମିତତା ଯୋଗୁ କ୍ଷତିଗ୍ରସ୍ତ ଚାଷୀମାନେ ସେମାନଙ୍କ ପ୍ରାପ୍ୟ ବୀମା ସହାୟତା ପାଇ ପାରୁ ନଥିବା ଅଭିଯୋଗ କରିଛନ୍ତି । ବଡ଼ ବାଉଁଶେନ ଅଞ୍ଚଳର ଅନେକ ଚାଷୀ ସ୍ମାରକପତ୍ର ପ୍ରଦାନ କରିବାକୁ ଜିଲାପାଳ ଅଫିସ ଆସିଥିଲେ ।
