ବାରିପଦା ଅଫିସ,୩ା୧୧- ମୟୂରଭଞ୍ଜ ଜିଲା ବାରିପଦାସ୍ଥିତ ପଣ୍ଡିତ ରଘୁନାଥ ମୁର୍ମୁ (ପିଆର୍ଏମ୍) ମେଡିକାଲରେ ସୋମବାର ଜଣେ ନାବାଳିକାଙ୍କ ମୃତ୍ୟୁକୁ ନେଇ ଉତ୍ତେଜନା ପ୍ରକାଶ ପାଇଥିଲା। ଚିକିତ୍ସାରେ ଅବହେଳା ଯୋଗୁ ଉକ୍ତ ନାବାଳିକାଙ୍କ ମୃତ୍ୟୁ ଘଟିଥିବା ପରିବାର ଲୋକେ ଅଭିଯୋଗ କରି ମୃତଦେହ ମେଡିକାଲ ମୁଖ୍ୟ ଫାଟକ ସମ୍ମୁଖରେ ରଖି ଧାରଣା ଦେଇଥିଲେ। ୫ଘଣ୍ଟା ପରେ ମେଡ଼ିକାଲ ସୁପରିଣ୍ଟେଣ୍ଡଣ୍ଟ ଡା.ବୈକୁଣ୍ଠ ନାଥ ମହାପାତ୍ର ଘଟଣାସ୍ଥଳକୁ ଆସିଥିବା ବେଳେ ଉତ୍ତ୍ୟକ୍ତ ମହିଳା ପୁରୁଷ ତାଙ୍କୁ ଠେଲାପେଲା କରିଥିଲେ। ମୃତକଙ୍କ ପରିବାରକୁ ରେଡକ୍ରସ ପାଣ୍ଠିରୁ ୧୦ହଜାର ଟଙ୍କା ସହାୟତା ରାଶି ଦେବା ସହିତ ଚିକିତ୍ସାରେ ଅବହେଳା କରିଥିବା ଡାକ୍ତରଙ୍କ ବିରୋଧ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ଲାଗି ମେଡ଼ିକାଲ କର୍ତ୍ତୃପକ୍ଷ ପ୍ରତିଶ୍ରୁତି ଦେବା ପରେ ପରିସ୍ଥିତି ସ୍ବାଭାବିକ ହୋଇଥିଲା। ତେବେ ଉତ୍ତେଜନା ଲାଗି ରହିଥିବାରୁ ମେଡ଼ିକାଲ ପରିସରରେ ପୋଲିସ ମୃତୟନ ହୋଇଛନ୍ତି ା
ସୂଚନା ଅନୁଯାୟୀ, ଶାମାଖୁଣ୍ଟା ବ୍ଲକ ଅଧୀନ ରଙ୍ଗାମାଟିଆ ଗ୍ରାମର ସୁନାରାମ ପାତ୍ରଙ୍କ ଝିଅ ସୁପ୍ରିୟା (୧୭) ଜଣେ ଥାଲାସେମିଆ ରୋଗୀ। ଦେହ ଅସୁସ୍ଥ ହେବାରୁ ୩ଦିନ ପୂର୍ବେ ପରିବାର ଲୋକେ ତାଙ୍କୁ ପିଆର୍ଏମ୍ ମେଡିକାଲରେ ଭର୍ତ୍ତି କରିଥିଲେ। ତେବେ ଦିନକୁ ଦିନ ତାଙ୍କ ଅବସ୍ଥା ଗୁରୁତର ହେବାରେ ଲାଗିଥିଲା। ରବିବାର ରାତିରେ ରକ୍ତ ଅଭାବ ଜଣାପଡ଼ିବାରୁ ତାଙ୍କ ବାପା ନିଜେ ରକ୍ତ ଦେବାକୁ ନିବେଦନ କରିଥିଲେ। ମାତ୍ର ସୁପ୍ରିୟାଙ୍କ ଶରୀର ତାପମାତ୍ରା ଅଧିକ ଥିବାରୁ ରକ୍ତ ଦିଆଯାଇପାରିବ ନାହିଁ ବୋଲି ଦାୟିତ୍ୱରେ ଥିବା ଡାକ୍ତର ଜଣାଇଥିଲେ। ଏପରିସ୍ଥଳେ ସୋମବାର ସକାଳେ ନାବାଳିକାଙ୍କ ମୃତ୍ୟୁ ଘଟିଥିଲା। ଏହି ଖବର ପ୍ରଚାରିତ ହେବା ପରେ ଚିକିତ୍ସା ଅବହେଳା ପାଇଁ ଝିଅର ମୃତ୍ୟୁ ହୋଇଛି ବୋଲି ଅଭିଯୋଗ କରି ପରିବାର ଲୋକେ ଡାକ୍ତରଖାନା କର୍ତ୍ତୃପକ୍ଷଙ୍କୁ ଦୋଷ ଦେଇଥିଲେ। ସେଠାରେ ଉତ୍ତେଜନା ପ୍ରକାଶ ପାଇବା ପରେ ମେଡିକାଲ ସୁପରିଣ୍ଟେଣ୍ଡଣ୍ଟ ଡା.ମହାପାତ୍ର ଘଟଣାସ୍ଥଳରେ ପହଞ୍ଚି ବୁଝାସୁଝା କରିବା ସମୟରେ ଉତ୍ତ୍ୟକ୍ତ ଲୋକଙ୍କ ରୋଷର ଶିକାର ହୋଇଥିଲେ। ଏହି ଘଟଣାକୁ ନେଇ ଡାକ୍ତରଖାନା ପରିସରରେ ଅଭାବନୀୟ ପରିସ୍ଥିତି ସୃଷ୍ଟି ହୋଇଥିଲା ା ଦୁଇ ପ୍ଲାଟୁନ ପୋଲିସ ଫୋର୍ସ ସହିତ ଅତିରିକ୍ତ ଉପଜିଲାପାଳ ପ୍ରକାଶ ଚନ୍ଦ୍ର ବେହେରା ଓ ସଦର ଏସଡିପିଓ କେ.କେ. ହରିପ୍ରସାଦ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିଥିଲେ। ଅପରପକ୍ଷରେ ଜିଲା କଂଗ୍ରେସର ସଭାପତି ହେମନ୍ତ ଦାସ, ମହିଳା ସଭାନେତ୍ରୀ ସୁସ୍ମିତା ଘୋଷାଲ, ଶାନ୍ତନୁ ପାଲ, ଯୋଗେଶ ଅଗ୍ରୱାଲ, ଅରବିନ୍ଦ ଦାସ, ଇତିଶ୍ରୀ ମିଶ୍ର, ରଶ୍ମିତା ମିଶ୍ର, ନିର୍ମଳ ପ୍ରଧାନ ପ୍ରମୁଖ ଘଟଣାକୁ ନିନ୍ଦା କରିବା ସହିତ ମେଡିକାଲ କଲେଜରେ ଦିନିକୁ ଦିନ ରୋଗୀ ସେବା ବିପର୍ଯ୍ୟସ୍ତ ହୋଇ ପଡ଼ୁଥିବାରୁ ଏଥିପ୍ରତି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ଦାବି କରିଛନ୍ତି ା ଏ ସଂକ୍ରାନ୍ତରେ ମେଡିକାଲ ସୁପରିଣ୍ଟେଣ୍ଡଣ୍ଟ ଡା.ମହାପାତ୍ରଙ୍କୁ ପଚାରିବାରୁ ଥାଲାସେମିଆ ରୋଗୀଙ୍କ ଠିକ୍ ଚିକିତ୍ସା କରାଯାଇଥିଲା। ମାତ୍ର ଜ୍ୱର ଥିବାରୁ ତାଙ୍କୁ ରକ୍ତଦେବା ସମ୍ଭବ ହୋଇ ନ ଥିଲା। ଏହି ଘଟଣାର ତଦନ୍ତ କରାଯାଇ ୧୫ ଦିନ ମଧ୍ୟ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ତେବେ ରିପୋର୍ଟ ଲେଖା ହେବା ସୁଦ୍ଧା ଏନେଇ ଥାନାରେ କୌଣସି ଅଭିଯୋଗ କରାଯାଇ ନ ଥିଲା।