ପାରାଦୀପ,୨।୭(ସ୍ବ.ପ୍ର.): ପାରାଦୀପ ଅଭୟଚାନ୍ଦପୁର ଥାନା ଅନ୍ତର୍ଗତ ଢିଙ୍କିଆ ଗ୍ରାମରେ ଶୁକ୍ରବାର ଜଣେ ନବବଧୂଙ୍କୁ ଯୌତୁକ ପାଇଁ ହତ୍ୟା କରାଯାଇଥିବା ଅଭିଯୋଗ ହୋଇଛି। ସେ ହେଲେ କେନ୍ଦ୍ରାପଡା ଜିଲା ମାର୍ଶାଘାଇ ଥାନା ଅନ୍ତର୍ଗତ ଘୋଡାବନ୍ଧ ଗ୍ରାମର ରୁବି ଦାସ। ଏନେଇ ତାଙ୍କ ମା’ ପଦ୍ମାବତୀ ଥାନାରେ ଅଭିଯୋଗ କରିବା ପରେ ପୋଲିସ ମାମଲା (ନଂ. ୨୫୯/୨୨) ରୁଜୁ କରିଛି। ମୃତଦେହକୁ ଜବତ ପରେ କୁଜଙ୍ଗ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ସଂରକ୍ଷିତ ରଖାଯାଇଛି। ଅଭିଯୋଗ ଅନୁଯାୟୀ, ରୁବିଙ୍କ ସହ ଢିଙ୍କିଆ ଗ୍ରାମର ପ୍ରଭାତ ଦାସଙ୍କ ଗତ ମେ’୧୩ରେ ଗଡକୁଜଙ୍ଗ ମନ୍ଦିରରେ ବୈଦିକ ରିତିରେ ବିବାହ ହୋଇଥିଲା। ସେତେବେଳେ ଦାବି ମୁତାବକ ୧ ଲକ୍ଷ ଟଙ୍କା, ସୁନା ଗହଣା ଆଦି ଦିଆଯାଇଥିଲା। ମାତ୍ର ପରେ ଅଧିକ ଯୌତୁକ ଦାବିକରି ରୁବିଙ୍କୁ ମାନସିକ ଓ ଶାରୀରିକ ନିର୍ଯାତନା ଦିଆଯାଉଥିଲା। ଶାଶୁଘର ଲୋକଙ୍କ ନିର୍ଯାତନା ସହି ନ ପାରି ଜୁନ ୧୯ରେ ରୁବି ବାପ ଘରକୁ ଚାଲି ଯାଇଥିଲୋ। ଗତ ସପ୍ତାହରେ ଶାଶୁଘର ଲୋକେ ପହଞ୍ଚତ୍ ବୁଝାଶୁଝା କରି ରୁବିଙ୍କୁ ନେଇଥିଲେ। ଏହାପରେ ଶୁକ୍ରବାର ତାଙ୍କୁ ମାରି ଦେବା ପରେ ଆତ୍ମହତ୍ୟାର ରୂପ ଦିଆଯାଇଛି ବୋଲି ପଦ୍ମାବତୀ ଅଭିଯୋଗରେ ଦର୍ଶାଇଛନ୍ତି। ଏହାକୁ ଭିତ୍ତି କରି ପୋଲିସ ତଦନ୍ତ ଚଳାଇଛି।
