କେସିଙ୍ଗା,୧୨ା୮(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକର ଉତକେଲା ପଞ୍ଚାୟତର କୋକୋଡ଼ମାଲ ଗ୍ରାମର ସୁଲୋଚନା ବାଗ୍ (୮୦) ଓ ସୁମିତ୍ରା ପଟ୍ଟନାୟକ ଏକ ବର୍ଷ ହେଲା ଭତ୍ତା ପାଇ ନ ଥିବାର କେସିଙ୍ଗା ବିଡିଓ କୌଣସି ସୂତ୍ରରୁ ଖବର ପାଇ ତଦନ୍ତ ପାଇଁ ଶନିବାର ଉକ୍ତ ଗ୍ରାମକୁ ଯାଇଥିଲେ। ସେହି ଗ୍ରାମର ଲକ୍ଷ୍ମୀ ଗୌଡ଼, ଜଗନ୍ନାଥ ବେହେରା, ସୁଭଦ୍ରା କହର,ତନୟା ଗୌଡ଼ଙ୍କ ଘରକୁ ଘର ବୁଲି ତଦନ୍ତ କରିଥିଲେ। ସମସ୍ତ ହିତାଧିକାରୀ ଜୁଲାଇ ୨୦୨୩ ଯାଏ ଭତ୍ତା ପାଇଥିବା ଜାଣିବାକୁ ମିଳିଥିଲା। ଚାଉଳ ମଧ୍ୟ ପାଇଥିବାର ତଦନ୍ତରୁ ଜଣାପଡ଼ିଥିଲା।
ଏହି ତଦନ୍ତରେ କେସିଙ୍ଗା ବିଡିଓ ପ୍ରଫୁଲ୍ଲ କୁମାର ଅଦୁ, ଉତକେଲା ସରପଞ୍ଚ ନରେନ୍ଦ୍ର ମାଝି ଏବଂ ନିର୍ବାହୀ ଅଧିକାରୀ ଲମ୍ବୁ ଶିଖା, ଓ୍ବାର୍ଡସଭ୍ୟ ଓ ଗ୍ରାମବାସୀ ମଧ୍ୟ ଉପସ୍ଥିତ ଥିଲେ।
ଏ ସଂକ୍ରାନ୍ତରେ କେସିଙ୍ଗା ବିଡିଓ ପ୍ରଫୁଲ୍ଲ କୁମାର ଅଦୁଙ୍କୁ ପଚାରିବାରୁ ବାର୍ଦ୍ଧକ୍ୟ ହେତୁ ସେମାନେ ପଞ୍ଚାୟତ ଯାଇ ପାରି ନ ଥିଲେ। ଘରକୁ ଆଣି ଭତ୍ତା ସୂଚାରୁରୂପେ ବଣ୍ଟନ କରାଯାଇଛି। ଏଥିରେ କୌଣସି ଦୁର୍ନୀତି ହୋଇନାହିଁ କି ହଡ଼ପ ହୋଇନାହିଁ ବୋଲି ପ୍ରକାଶ କରିଥିଲେ।
ଏ ନେଇ ଉତକେଲା ସରପଞ୍ଚ ନରେନ୍ଦ୍ର ମାଝିଙ୍କୁ ପଚାରିବାରୁ ଠିକ୍ ଭାବେ ଭତ୍ତା ଓ ଚାଉଳ ବଣ୍ଟନ ହେଉଛି। ଉତକେଲା ପଞ୍ଚାୟତକୁ ବଦନାମ କରିବାକୁ କେତେକ ଖଳକୃତିର ଲୋକ ଚକ୍ରାନ୍ତ କରୁଛନ୍ତି ବୋଲି ପ୍ରକାଶ କରିଥିଲେ।
ଏ ବାବଦରେ ଉତକେଲା ପଞ୍ଚାୟତ ନିର୍ବାହୀ ଅଧିକାରୀ ଲମ୍ବୁ ଶିଖାଙ୍କୁ ପଚାରିବାରୁ ମୁଁ ଜଣେ ପିଇଓ ଚାଞ୍ଚେର ଓ ଉତକେଲା ଦୁଇଟି ପଞ୍ଚାୟତରେ ଚାଉଳ ବାଣ୍ଟୁଛି, ଆଉ ଗୋଟିଏ ଫିଙ୍ଗର ମେଶିନ ଥିବାରୁ ଚାଉଳ ଦେବାରେ ବିଳମ୍ବ ହେଉଛି। ଭତ୍ତା ମଧ୍ୟ ଠିକ୍ ଭାବେ ବଣ୍ଟନ କରାଯାଉଛି ବୋଲି ପ୍ରକାଶ କରିଥିଲେ।
