ଜାକର୍ତ୍ତା,୮।୮ : ମିସ ଇଣ୍ଡୋନେସିଆ ୟୁନିଭର୍ସ ପ୍ରତିଯୋଗିତାର ୬ ଜଣ ପ୍ରତିଯୋଗୀ ଆୟୋଜକଙ୍କ ବିରୋଧରେ ଯୌନ ଉତ୍ପୀଡ଼ନ ଅଭିଯୋଗ କରିଛନ୍ତି। ପ୍ରତିଯୋଗୀମାନେ ଅଭିଯୋଗ କରିଛନ୍ତି ପ୍ରତିଯୋଗିତା ସମୟରେ ସେମାନଙ୍କ ଟପଲେସ ‘ଶରୀର ଯାଞ୍ଚ’ କରାଯାଇଥିଲା। ପୋଲିସ ନିଶ୍ଚିତ କରିଛି ପ୍ରତିଯୋଗୀମାନେ ଏକ ରିପୋର୍ଟ ଦାଖଲ କରିଛନ୍ତି ଯାହାର ତଦନ୍ତ ହେବ।
ପ୍ରତିଯୋଗିତା ୨୯ ଜୁଲାଇରୁ ୩ ଅଗଷ୍ଟ ପର୍ଯ୍ୟନ୍ତ ରାଜଧାନୀ ଜାକର୍ତ୍ତାରେ ଅନୁଷ୍ଠିତ ହୋଇଥିଲା। ପ୍ରତିଯୋଗୀମାନେ ଅଭିଯୋଗ କରିଛନ୍ତି ଆୟୋଜକମାନେ ସେମାନଙ୍କ ମଧ୍ୟରୁ ପାଞ୍ଚଜଣଙ୍କୁ ପୁରୁଷଙ୍କ ସମେତ ୨୦ରୁ ଅଧିକ ଲୋକଙ୍କ ଉପସ୍ଥିତିରେ କୋଠରୀରେ ଶାରୀରିକ ଯାଞ୍ଚ ପାଇଁ ସେମାନଙ୍କର ଅନ୍ତର୍ବସ୍ତ୍ରକୁ ଓହ୍ଲାଇବାକୁ କହିଥିଲେ।
ପ୍ରତିଯୋଗୀଙ୍କ ଆଇନଜୀବୀ ମେଲିସା ଆଙ୍ଗଗ୍ରେନି କହିଛନ୍ତି ଏଭଳି ତଦନ୍ତର ଆବଶ୍ୟକତା ନାହିଁ। ୬ ଜଣ ପ୍ରତିଯୋଗୀ ଅଭିଯୋଗ କରିଛନ୍ତି ବୋଲି ସେ କହିଛନ୍ତି। ଅଭିଯୋଗକାରୀଙ୍କ ମଧ୍ୟରୁ ଜଣେ ନ୍ୟୁଜ ଚ୍ୟାନେଲ କମ୍ପାସ ଟିଭି ଦ୍ୱାରା ପ୍ରସାରିତ ସାକ୍ଷାତକାରରେ କହିଛନ୍ତି ତାଙ୍କୁ ଗୋଡ ଖୋଲିବା ସହିତ ଅନୁପଯୁକ୍ତ ଭାବରେ ପୋଜ ଦେବାକୁ କୁହାଯାଇଥିଲା।
ତେବେ ଏପର୍ଯ୍ୟନ୍ତ ମିସ ୟୁନିଭର୍ସ ପ୍ରତିଯୋଗିତାର ଆୟୋଜକଙ୍କଠାରୁ କୌଣସି ଅଫିସିଆଲ ବିବୃତ୍ତି ଆସିନାହିଁ।
ଜାକର୍ତ୍ତା ପୋଲିସର ମୁଖପାତ୍ର ଟ୍ରୁନୋଇଡୋ ୱିସ୍ନୁ ଏଣ୍ଡିକୋ କହିଛନ୍ତି ପ୍ରତିଯୋଗୀମାନଙ୍କଠାରୁ ଏକ ରିପୋର୍ଟ ଗ୍ରହଣ କରାଯାଇଛି ଏବଂ ଏହାର ତଦନ୍ତ କରାଯିବ। ଅତୀତରେ, ଇଣ୍ଡୋନେସିଆର ଅନେକ ଧାର୍ମିକ ଗୋଷ୍ଠୀ ଏଭଳି ପ୍ରତିଯୋଗିତାକୁ ବିରୋଧ କରିଛନ୍ତି। ସୂଚନାଯୋଗ୍ୟ, ଇଣ୍ଡୋନେସିଆ ହେଉଛି ବିଶ୍ୱର ସର୍ବାଧିକ ମୁସଲମାନ ଜନସଂଖ୍ୟା ବିଶିଷ୍ଟ ଦେଶ ।