ପଦ୍ମପୁର ୪।୧୨(ଡି.ଏନ୍.ଏ.): ପଦ୍ମପୁର ଉପନିର୍ବାଚନ ପାଇଁ ପ୍ରଚାର ଶେଷ ହେବା ପରେ ଜିଲା ପ୍ରଶାସନ ପକ୍ଷରୁ ଅନ୍ୟ ଜିଲାରୁ ଆସିଥିବା ରାଜନୈତିକ ଅତିଥି, ପ୍ରଚାରକଙ୍କୁ ଶନିବାର ଅପରାହ୍ନ ୪ଟା ସୁଦ୍ଧା ପଦ୍ମପୁର ଅଞ୍ଚଳ ଛାଡିବାକୁ ନିର୍ଦ୍ଦେଶ ଦିଆଯାଇଥିଲା। ଏନେଇ ବହୁ ରାଜନୈତିକ ବ୍ୟକ୍ତି ପଦ୍ମପୁର ଛାଡି ଚାଲିଯାଇଥିଲେ। ତେବେ ଜୁନାଗଡ଼ର ପୂର୍ବତନ ବିଧାୟକ ହିମାଂଶୁ ଶେଖର ମେହେର ରବିବାର ଲଖମରାଠାରେ ଥିବା ଖବର ପାଇ କେତେକ ଯୁବକ ସେଠାରେ ପହଞ୍ଚି ଥିଲେ। ପ୍ରଶାସନର ଆଦେଶକୁ ବେଖାତିର କରିଥିବାରୁ ଉକ୍ତ ଯୁବକ ଏବଂ ମେହେରଙ୍କ ମଧ୍ୟରେ ବଚସା ହୋଇଥିଲା। ଏହି ସମୟରେ ଜଗଦଲପୁର ଥାନା ଅଧିକାରୀ ସୁଷମା କୁଅଁର ସଦଳବଳ ପହଞ୍ଚି ପୂର୍ବତନ ବିଧାୟକ ମେହେରଙ୍କୁ ଥାନାକୁ ଆଣିଥିଲେ। ସେଠାରେ ସମସ୍ତ କାଗଜପତ୍ର ଯାଞ୍ଚ ପରେ ଏକ ଚୁକ୍ତିପତ୍ର ସ୍ବାକ୍ଷର କରି ତାଙ୍କୁ ଛାଡି ଦିଆଯାଇଥିଲା। ଅନ୍ୟପକ୍ଷେ ଲଖମରାକୁ ପୂର୍ବତନ ବିଧାୟକ ହିମାଂଶୁ ଶେଖର ମେହେର ଟଙ୍କା ବାଣ୍ଟିବା ପାଇଁ ଆସିଥିବା ବିଜେଡି ଅଭିଯୋଗ କରିଛି।