ବରଗଡ଼ ଅଫିସ୍,୨୫।୫: ବରଗଡ଼ ଜିଲା ଭଟଲି ବ୍ଲକ ଅଧୀନ ଭଡିଗାଁ ଗ୍ରାମର ରୋହିଦାସ ପଡ଼ା(ଚମାର ପଡ଼ା)ବାସୀଙ୍କୁ ଗ୍ରାମରେ ସାମାଜିକ ବାସନ୍ଦ କରାଯାଇଥିବା ଅଭିଯୋଗ ହୋଇଛି। ଏଭଳି ଅଭିଯୋଗ ନେଇ ପଡ଼ାବାସୀ ଶୁକ୍ରବାର ଏସ୍ପି ପି.ଏସ୍.ମୀନାଙ୍କୁ ଫେରାଦ ହୋଇଥିଲେ। ଏସ୍ପିଙ୍କୁ ଏକ ଅଭିଯୋଗ ପତ୍ର ଦେଇ ଘଟଣାର ସମାଧାନ କରି ନ୍ୟାୟ ପ୍ରଦାନ କରିବାକୁ ପଡ଼ାବାସୀ ନିବେଦନ କରିଛନ୍ତି। ଗ୍ରାମର ଏକ ମନ୍ଦିର ପ୍ରତିଷ୍ଠା ନେଇ ଗତ ୬ତାରିଖ ଗ୍ରାମରେ ଏକ ସଭା ହୋଇଥିଲା। ସଭାକୁ ରୋହିଦାସ ପଡ଼ାବାସୀଙ୍କୁ ମଧ୍ୟ ଡକାଯାଇଥିଲା। ଫଳରେ ପଡ଼ାର ପ୍ରତିନିଧିଭାବେ ପ୍ରାୟ ୧୩ଜଣ ସଭାକୁ ଆସିଥିଲେ। ସଭାରେ ତାଙ୍କୁ ମନ୍ଦିରକୁ ପ୍ରବେଶ ତଥା ପ୍ରତିଷ୍ଠା ଉତ୍ସବର ଅନ୍ନ ପ୍ରସାଦରୁ ବାରଣ ରହିବାକୁ କୁହାଯାଇଥିଲା। କାରଣ ପଚାରିବାରୁ କେତେକ ଲୋକ ଗ୍ରାମରୁ ତଡ଼ି ଦେବାକୁ ମଧ୍ୟ ଧମକ ଦେଇଥିବା ପଡ଼ାବାସୀ ଅଭିଯୋଗ କରିଛନ୍ତି। ଏଭଳି ଅପମାନ ସହି ନ ପାରି ପଡ଼ାବାସୀ ସଭାରୁ ଫେରି ଆସିଥିଲେ ଏବଂ ଭଟଲି ଥାନାରେ ଏତଲା ଦେଇଥିଲେ। ପୋଲିସ ତାଙ୍କ ଏତଲାକୁ ଭିତ୍ତି କରି ଏକ ମାମଲା ରୁଜୁ କରିଥିଲା। ସେମାନଙ୍କ ବିରୋଧରେ ମଧ୍ୟ ପାଲଟା ଅଭିଯୋଗ ହୋଇଥିଲା। ପୋଲିସ ଥାନାକୁ ଉଭୟ ପକ୍ଷକୁ ଡାକିଥିଲା ଏବଂ ଧାରା ୪୧(କ) ନୋଟିସ୍ରେ ସମସ୍ତଙ୍କୁ ଜାମିନରେ ଛାଡିଥିଲା । ଏହା ସହିତ ଗତ ୧୨ତାରିଖ ଉଭୟ ପକ୍ଷକୁ ନେଇ ଭଟଲି ପଞ୍ଚାୟତ ସମିତି କାର୍ଯ୍ୟାଳୟରେ ବିଡ଼ିଓ, ତହସିଲଦାର, ଥାନା ଅଧିକାରୀଙ୍କ ଉପସ୍ଥିତିରେ ଶାନ୍ତି କମିଟି ବୈଠକ ବସିଥିଲା। ବୈଠକରେ ଘଟଣାର ସମାଧାନ ହେବା ସହିତ ସେ ନେଇ ଉଭୟ ପକ୍ଷ ସହମତି ପ୍ରକାଶ କରିବା ସହିତ ଦସ୍ତଖତ ମଧ୍ୟ କରିଥିଲେ। କିନ୍ତୁ ଏହାସତ୍ତ୍ବେ ଅପରଗୋଷ୍ଠୀ ସେମାନଙ୍କୁ ସାମାଜିକ ବାସନ୍ଦ କରୁଛନ୍ତି ବୋଲି ରୋହିଦାସ ପଡ଼ାବାସୀ ଅଭିଯୋଗ କରିଛନ୍ତି। ଦୋକାନ, ବଜାର, ଗାଧୁଆ ତୁଠ, ମନ୍ଦିର ଆଦିରେ ସେମାନଙ୍କୁ ବାସନ୍ଦ କରାଯାଇଥିବା ଯୋଗୁ ସେମାନେ ବହୁତ ଅସୁବିଧାର ସମ୍ମୁଖୀନ ହେଉଥିବା ପଡ଼ାବାସୀ କହିଛନ୍ତି। ଫକୀର ରୋହିଦାସ, କିଶନ ରୋହିଦାସଙ୍କ ସମେତ ପଡ଼ାବାସୀ ଏଭଳି ଅଭିଯୋଗ ନେଇ ଏସ୍ପି ଅଫିସକୁ ଆସିଥିଲେ ।