ଖଡ଼ିଆଳ,୧୦।୪(ଡି.ଏନ.ଏ.): ନୂଆପଡ଼ା ଜିଲା ଖଡ଼ିଆଳ ବ୍ଲକ ଅନ୍ତର୍ଗତ ବିରିଘାଟ ଗ୍ରାମ ପଞ୍ଚାୟତ କୁଶମାଲ ଗ୍ରାମ ମାଲିମୁଢ଼ିଆ ପଡାକୁ ହେଉଥିବା ରାସ୍ତା କାର୍ଯ୍ୟ ବିନା ସୂଚନା ଫଳକରେ ନିମ୍ନମାନର କାର୍ଯ୍ୟ ହେଉଥିବା ଅଭିଯୋଗ ହୋଇଛି। ପଡାବାସୀଙ୍କ ଅଭିଯୋଗ ଅନୁଯାୟୀ ଲାଞ୍ଜିକୁ ସଂଯୋଗ କରୁଥିବା ଗ୍ରାମ୍ୟ ଉନ୍ନୟନ ବିଭାଗ ରାସ୍ତାଠାରୁ ମାଲିମୁଢିଆ ପଡାକୁ ବର୍ତ୍ତମାନ ରାସ୍ତା ନିର୍ମାଣ କାର୍ଯ୍ୟ ଚାଲିଛି। ହେଲେ ରାସ୍ତା ନିର୍ମାଣ କାର୍ଯ୍ୟ ସରକାରୀ ନିୟମ ଅନୁଯାୟୀ ହେଉ ନ ଥିବା ବେଳେ ନିମ୍ନମାନର ଧଳା ମେଟାଲ ରାସ୍ତା ନିର୍ମାଣରେ ବ୍ୟବହାର କରାଯାଉଛି। ଅନେକ ସ୍ଥାନରେ କମ ପରିମାଣର ଧଳା ମେଟାଲ ବିଛା ଯାଇଛି। ଫଳରେ ରାସ୍ତାର ସ୍ଥାୟିତ୍ୱ ନେଇ ପ୍ରଶ୍ନବାଚୀ ସୃଷ୍ଟି ହେଉଛି। ଏହି ରାସ୍ତା ୫୦୦ ମିଟର ପର୍ଯ୍ୟନ୍ତ ହେଉଥିବା ବେଳେ ଖଡ଼ିଆଳ ପଞ୍ଚାୟତ ସମିତି ଅଧୀନରେ ହେଉଥିବା ଜଣାପଡ଼ିଛି। ଏହି ରାସ୍ତାର ଅଟକଳ ପରିମାଣ ଜଣା ପଡି ନ ଥିବା ବେଳେ ୮ ଲକ୍ଷ ଟଙ୍କାରୁ ଅଧିକ ହେବ ବୋଲି ଅନୁମାନ କରାଯାଉଛି। ଗ୍ରାମବାସୀଙ୍କ ଅଭିଯୋଗ ଅନୁଯାୟୀ ଯେଉଁ ଠିକାଦାରମାନେ କାର୍ଯ୍ୟ କରୁଛନ୍ତି, ସେମାନେ ନିଜ ଇଛାରେ କାର୍ଯ୍ୟ କରୁଛନ୍ତି। ସରକାରୀ ନିୟମ ଅନୁଯାୟୀ ପଞ୍ଚାୟତସ୍ତରୀୟ କାର୍ଯ୍ୟ ଆରମ୍ଭ କରିବା ପୂର୍ବରୁ ସୂଚନା ଫଳକରେ ରାସ୍ତାର କାର୍ଯ୍ୟ ବିଷୟରେ ଜନସାଧାରଣଙ୍କୁ ଅବଗତ କରାଇବା କଥା। ହେଲେ ଏଠାରେ ତାର ବ୍ୟତିକ୍ରମ ଦେଖା ଦେଇଛି। ଏ ନେଇ ଦାୟିତ୍ୱରେ ଥିବା କନିଷ୍ଠ ଯନ୍ତ୍ରୀ ମଧୁସ୍ମିତା ସିଂଙ୍କୁ ଯୋଗାଯୋଗ କରିବାରୁ ଇଷ୍ଟିମେଟରେ ଯାହା ଅଛି ସେହିପରି ହେବ, କ୍ରଶର ମେଟାଲରେ କାମ ହେବ, ସୂଚନା ଫଳକ ତୁରନ୍ତ ତିଆରି କରାଯିବ ବୋଲି ପ୍ରକାଶ କରିଥିଲେ।
