ଭେଡ଼େନ,୮ା୭ (ସୁଦନ ମହାକୁର ): ବରଗଡ଼ ଜିଲା ଭେଡ଼େନ ବ୍ଲକ ଦେଶଭଟଲି ଗ୍ରାମପଞ୍ଚାୟତ ଅନ୍ତର୍ଗତ ଉଦେପୁର ଗ୍ରାମର ମୁଡ଼ାବନ୍ଧ ପୋଖରୀ ଉନ୍ନତୀକରଣରେ ବ୍ୟାପକ ଅନିୟମିତତା କରାଯାଇଥିବା ଅଭିଯୋଗ ହୋଇଛି। ଏ ନେଇ ଗ୍ରାମବାସୀ ଭେଡ଼େନ ବିଡ଼ିଓଙ୍କୁ ଫେରାଦ ହେବା ସହ ଲିଖିତ ଅଭିଯୋଗ କରିଛନ୍ତି। ଏହାର ତଦନ୍ତ କରି ବିହିତ ପଦକ୍ଷେପ ଗ୍ରହଣ କରା ନ ଗଲେ ଗ୍ରାମର ଆନନ୍ଦ ସାହୁ, ଦୂତିଆ ଭୂଜ, ଗୀତାଞ୍ଜଳି ଖେତି, ଅହଲ୍ୟା ସାହୁ, ଆରତୀ ସେଠ, ହରିହର ଦନ୍ତା, ପଦ୍ମିନୀ ଦନ୍ତା, ପାର୍ବତୀ ଓ ମହାଲକ୍ଷ୍ମୀ ଏସ୍ଏଚ୍ଜିର ସଦସ୍ୟାଙ୍କ ସମେତ ଗ୍ରାମବାସୀ ଅନିର୍ଦ୍ଦିଷ୍ଟ ସମୟ ପାଇଁ ଗ୍ରାମପଞ୍ଚାୟତ କାର୍ଯ୍ୟାଳୟରେ ତାଲା ପକାଇ ଆନ୍ଦୋଳନ କରିବାକୁ ଚେତାବନୀ ଦେଇଛନ୍ତି।
ପ୍ରକାଶ ଯେ, ଉଦେପୁରସ୍ଥିତ ମୁଡ଼ାବନ୍ଧ ପୋଖରୀ ଉପରେ ଗ୍ରାମବାସୀ ସ୍ନାନ ଶୌଚ ପାଇଁ ନିର୍ଭର କରିଥାନ୍ତି। ଏହାର ଉନ୍ନତୀକରଣ ପାଇଁ ସ୍ଥାନୀୟ ଗ୍ରାମପଞ୍ଚାୟତ କର୍ତ୍ତୃପକ୍ଷ ଗତ ଏପ୍ରିଲ ମାସରେ ପୋଖରୀ ହିଡ଼ କାଟି ଜଳ ନିଷ୍କାସନ କରିଥିଲେ। ପୋଖରୀ ଉନ୍ନତୀକରଣ ହେବ ଭାବି ଗ୍ରାମବାସୀ ଖରାଦିନେ ବହୁ ଅସୁବିଧାର ସମ୍ମୁଖୀନ ହୋଇ ଜଳକଷ୍ଟକୁ ସହିନେଲେ। ଏପରିକି ବିନା ସୂଚନା ଫଳକରେ ମାତ୍ର କେତେ ଜଣ ଶ୍ରମିକଙ୍କୁ ନିୟୋଜିତ କରି ମେଶିନ ସାହାଯ୍ୟରେ ପଙ୍କୋଦ୍ଧାର ଏବଂ ମାଟିକାମ କରାଗଲା। ବର୍ତ୍ତମାନ ବର୍ଷା ଆସିଯାଇଥିବାରୁ ପୋଖରୀ କାମ ଅଧାପନ୍ତରିଆ କରି ବନ୍ଦ ଦିଆଗଲା। ଏହାର ଘାଈ ମୁକୁଳା ଥିବାରୁ ପୋଖରୀଟି ଶୁଷ୍କ ହୋଇ ପଡ଼ିରହିଛି। ଫଳରେ ଗ୍ରାମବାସୀ ସ୍ନାନ ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି। ପୋଖରୀକୁ ଯିବା ପାଇଁ ରାସ୍ତାଟିଏ ମଧ୍ୟ ନାହିଁ। ସେହିପରି ପୋଖରୀର ଏଭଳି ଅବସ୍ଥା ହୋଇଛି ଯେ ଗ୍ରାମର ଦୁଇଜଣ ବୃଦ୍ଧାବୃଦ୍ଧ ଖସିପଡ଼ି ପ୍ରାଣ ହରାଇଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏ ସମ୍ପର୍କରେ ଭେଡେନ ବିଡିଓ ରଘୁନାଥ ପାଣିଗ୍ରାହୀଙ୍କୁ ପଚାରିବାରୁ ମୁ ଗ୍ରାମବାସୀଙ୍କଠାରୁ ଲିଖିତ ଅଭିଯୋଗ ପାଇଛି। ଶନିବାର କନିଷ୍ଠ ଯନ୍ତ୍ରୀଙ୍କୁ ପଠାଇ ଏହାର ତଦନ୍ତ କରାଯିବ ବୋଲି ସେ କହିଥିଲେ।