ଦଶରଥପୁର,୧ା୪(ଡି.ଏନ.ଏ.): ଯାଜପୁର ଜିଲା ଦଶରଥପୁର ତହସିଲ ଅଧୀନ ବୈତରଣୀ ନଦୀର ପଲ୍ଲାସାହି ବାଲିଘାଟରୁ ମଙ୍ଗଳବାର ବେଆଇନ ଭାବେ କେତେକ ଟ୍ରାକ୍ଟର ବାଲି ଉଠାଉଥିଲେ। ଖବର ପାଇ ତହସିଲଦାର ଅବିନାଶ ବିଶ୍ୱଜିତ୍ ସେଠୀ ଚଢ଼ାଉ କରିଥିଲେ। ଏହି ସମୟରେ ଏକ ଟ୍ରାକ୍ଟର ନିକଟରେ ଛିଡ଼ା ହୋଇଥିବା ମଙ୍ଗଳପୁର ଥାନା ଅଧୀନ ମଲ୍ଲିକାପୁର ପଞ୍ଚାୟତ ମଲ୍ଲିକାପୁର ଗ୍ରାମର ରାଜେଶ ସାହୁ(ପପି)ଙ୍କୁ ତହସିଲଦାର କାବୁକରି ପୋଲିସ ଜିମା ଦେଇଥିଲେ। ପୋଲିସ ଘଟଣା ସମ୍ପର୍କରେ ତଦନ୍ତ ନ କରି ସମ୍ପୃକ୍ତ ବ୍ୟକ୍ତିଙ୍କୁ ଗିରଫ କରି କୋର୍ଟଚାଲାଣ କରିଛି। ତେବେ ସେ ନିର୍ଦ୍ଦୋଷ ବୋଲି ତାଙ୍କ ସ୍ତ୍ରୀ ଅଭିଯୋଗ କରିଛନ୍ତି। ତେଣୁ ପପିଙ୍କ ସ୍ତ୍ରୀ ଶୁକ୍ରବାର ଯାଜପୁର ଏସ୍ପିଙ୍କୁ ଭେଟି ଏକଥା ଜଣାଇବେ ବୋଲି ଗୁରୁବାର ଗଣମାଧ୍ୟମ ଆଗରେ ପ୍ରକାଶ କରିଛନ୍ତି।
ଚଢ଼ାଉ ସମୟରେ ପପିଙ୍କୁ ଟ୍ରାକ୍ଟର ଚାଳକ ଭାବି ତହସିଲଦାର କଡ଼ା ଭାଷାରେ ପାଟି କରିଥିଲେ। ପପି ଏହାର ପ୍ରତିବାଦ କରିବା ସହ ସେ ଟ୍ରାକ୍ଟର ଚାଳକ ନୁହନ୍ତି ବୋଲି କହିଥିଲେ। ହେଲେ ତହସିଲଦାର କିଛି ନ ଶୁଣି ତାଙ୍କୁ ବିଭିନ୍ନ ଧମକଚମକ ଦେଇଥିଲେ। ଏହାପରେ ତହସିଲଦାର ପପିଙ୍କ ନାମରେ ମଙ୍ଗଳପୁର ଥାନାରେ ହତ୍ୟା ଧମକ ଦେଇଥିବା ଅଭିଯୋଗ କରିଥିଲେ। ଫଳରେ ପୋଲିସ ତାଙ୍କୁ ଗିରଫ କରିଥିଲା। ମାତ୍ର ତହସିଲଦାର ଦେଇଥିବା ଏତଲାରେ ଟ୍ରାକ୍ଟର ନମ୍ବର ଉଲ୍ଲେଖ କରିନାହାନ୍ତି। ପୋଲିସ ଜବତ କରିଥିବା ଟ୍ରାକ୍ଟରଟି ସଞ୍ଜିତ ସାହୁଙ୍କ ନାମରେ ରହିଛି। ଉକ୍ତ ଗାଡିର ଡ୍ରାଇଭର ତହସିଲଦାରଙ୍କୁ ଦେଖି ଘଟଣାସ୍ଥଳରୁ ଚମ୍ପଟ ମାରିଥିବା ପପିଙ୍କ ସ୍ତ୍ରୀ କହିଛନ୍ତି। ଅପରପକ୍ଷେ ତହସିଲଦାର ଏତଲାରେ ଉଲ୍ଲେଖ କରିଛନ୍ତି ଯେ, ପପି ଟ୍ରାକ୍ଟର ଚଳାଇ ଆସି ତାଙ୍କ ସରକାରୀ ବୋଲେରୋ ଗାଡ଼ିକୁ ଧକ୍କା ଦେଇଥିଲେ। ହେଲେ ବୋଲେରୋ ଗାଡ଼ିର କୌଣସି ସ୍ଥାନରେ ଧକ୍କା ଚିହ୍ନ ନ ଥିବା ଦେଖାଯାଇଛି। ଘଟଣା ସମ୍ପର୍କରେ ତହସିଲଦାର ସେଠୀଙ୍କୁ ପଚାରିବାରେ ସେ କହିଛନ୍ତି, ମୋ ଗାଡ଼ି ସମ୍ମୁଖକୁ ଏକ ଟ୍ରାକ୍ଟର ମାଡ଼ି ଆସିଥିଲା। ତେଣୁ ସେ ମୋତେ ମାରିଦେବାକୁ ଉଦ୍ୟମ କରିଥିବା ଅନୁଭବ କରି ମୁଁ ଥାନାରେ ଏପରି ଏତଲା ଦେଇଛି। ଏ ସମ୍ପର୍କରେ ଥାନା ଅଧିକାରୀ ଏନ୍ନାମାମୁଲ ହକ୍ କହିଛନ୍ତି, ତହସିଲଦାରଙ୍କ ଏତଲା ଆଧାରରେ ଆମେ ଅଭିଯୁକ୍ତଙ୍କୁ ଗିରଫ କରିଛୁ। ତଦନ୍ତ ପରେ ଯାହାକିଛି ପଦକ୍ଷେପ ନିଆଯିବ।