ସୁନ୍ଦରଗଡ଼,୧୨।୧(ଡି.ଏନ୍.ଏ.): ସୁନ୍ଦରଗଡ଼ ଜିଲା ବଣାଇ ବ୍ଲକ ଉପାଧ୍ୟକ୍ଷା ବିନତି ବେହେରା ନିଖୋଜ ହୋଇଯାଇଛନ୍ତି। ସେ ଗତ ୪ ତାରିଖରେ ଅନୁଗୋଳ ଜିଲା ଖମାର ସ୍କୁଲରେ ପଢୁଥିବା ପୁଅକୁ ଛାଡିବାକୁ ଯାଇ ଘରକୁ ଫେରିନାହାନ୍ତି। ବୁଧବାର ବିନତିଙ୍କ ସ୍ବାମୀ ପ୍ରସନ୍ନ ବେହେରା ତାଙ୍କ ସ୍ତ୍ରୀଙ୍କୁ ଅପହରଣ କରାଯାଇଥିବା ନେଇ ବଣାଇ ଥାନାରେ ଏତଲା ଦେଇଛନ୍ତି। ପୋଲିସ ଏକ ନିଖୋଜ ମାମଲା ରୁଜୁକରି ତଦନ୍ତ ଆରମ୍ଭ କରିଛି। ହେଲେ ଏତଲାର ୨ ଦିନ ପରେ ବି ବ୍ଲକ ଉପାଧ୍ୟକ୍ଷାଙ୍କ କୌଣସି ପତ୍ତା ମିଳିପାରି ନାହିଁ।
ବ୍ଳକ ଉପାଧ୍ୟକ୍ଷାଙ୍କ ସ୍ବାମୀ ଏତଲାରେ ଦର୍ଶାଇଛନ୍ତି ଯେ, ବଡ଼ଦିନ ଛୁଟିରେ ଘରକୁ ଆସିଥିବା ପୁଅକୁ ହଷ୍ଟେଲରେ ଛାଡିବା ପାଇଁ ତାଙ୍କ ସ୍ତ୍ରୀ ବିନତୀ ବସ୍ରେ ଖମାର ଯାଇଥିଲେ। ପୁଅକୁ ହଷ୍ଟେଲରେ ଛାଡିବା ପରେ ସ୍ତ୍ରୀଙ୍କ ସହିତ ମଧ୍ୟ ଫୋନରେ କଥା ହୋଇଥିଲେ। ହେଲେ ଜଣେ ବ୍ୟକ୍ତି ତାଙ୍କ ସ୍ତ୍ରୀ ବିନତିଙ୍କୁ ଏକ ବାଇକ୍ରେ ବସାଇ କୁଆଡ଼େ ନେଇଯାଇଥିବା ଓ ଏହା ପରେ ତାଙ୍କ ଫୋନ ଲାଗୁ ନ ଥିବା ସ୍ବାମୀ ପ୍ରସନ୍ନ ଅଭିଯୋଗ ପତ୍ରରେ ଉଲ୍ଲେଖ କରିଛନ୍ତି।