ଜଗତ୍ସିଂହପୁର ଅଫିସ, ୩ା୮: କେନ୍ଦ୍ର ସରକାରଙ୍କ ଆଇନ ଓ ବିଚାର ବିଭାଗ ମନ୍ତ୍ରଣାଳୟ ଦ୍ୱାରା ଲୋକ ପ୍ରତିନିଧି ଆଇନ ୧୯୫୦/୫୧ର ପରିବର୍ତ୍ତନ ସହ ଭୋଟର ତାଲିକାରେ ସଂଶୋଧନ ପାଇଁ ନିଷ୍ପତ୍ତି ନିଆଯାଇଛି। ଅଗଷ୍ଟ ୧ରୁ ଏହା କାର୍ଯ୍ୟକାରୀ ହୋଇଛି। କୌଣସି ବ୍ୟକ୍ତି ନାମ ପଞ୍ଜୀକରଣ କରିବାକୁ ହେଲେ ଏଣିକି ଗୋଟିଏ ନୁହେଁ, ୪ଟି ଯୋଗ୍ୟତାସୂଚକ ତାରିଖ ଅର୍ଥାତ୍ ଜାନୁଆରୀ ୧, ଅପ୍ରେଲ ୧, ଜୁଲାଇ ୧ ଓ ଅକ୍ଟୋବର ୧ରେ ସଂଯୋଗ କରିପାରିବେ । ଅନ୍ୟପଟେ ୧ା୪ା୨୩ ସୁଦ୍ଧା ଚାଲିକାଭୁକ୍ତ ହୋଇଥିବା ଭୋଟରମାନେ ସେମାନଙ୍କ ଆଧାର ନମ୍ବର ନିର୍ବାଚନ ପଞ୍ଜିକରଣ ଅଧିକାରୀଙ୍କୁ ଦେବେ। ଏହି ଆଧାର ବିବରଣୀ ଦାଖଲ କରିବା ପାଇଁ ନୂଆ ଫର୍ମ ନଂ. ୬(ଖ) ପ୍ରଚଳନ କରାଯାଇଛି। ନିର୍ବାଚନ ଆୟୋଗଙ୍କ ୱେବ୍ସାଇଟ୍, ଇଆର୍ଓଏନ୍ଇଟି (ଏରୋନେଟ୍), ଗରୁଡ, ଏନ୍ଭିଏସ୍ପି ଓ ଭିଏଚ୍ଏ ଆଦିରେ ଏସବୁ ଅଗଷ୍ଟ ୧ରୁ ଉପଲବ୍ଧ ହେଉଛି। ଜିଲାପାଳଙ୍କ କାର୍ଯ୍ୟାଳୟ ପରିସର ସଦ୍ଭାବନା ସଭାଗୃହରେ ରାଜନୈତିକ ଦଳ ଓ ଗଣମାଧ୍ୟମ ପ୍ରତିନିଧିମାନଙ୍କୁ ନେଇ ଅନୁଷ୍ଠିତ ବୈଠକରେ ଜିଲାପାଳ ପାରୁଲ ପଟାୱରୀ ଏହା କହିଛନ୍ତି। ସେ କହିଥିଲେ, ଭାରତୀୟ ନିର୍ବାଚନ ଆୟୋଗଙ୍କ ନିର୍ଦ୍ଦେଶକ୍ରମେ ସ୍ବତନ୍ତ୍ର ଭୋଟର ତାଲିକା ସଂଶୋଧନ ପ୍ରକ୍ରିୟାରେ କରାଯାଇଥିବା କିଛିଟା ପରିବର୍ତ୍ତନ ସମ୍ପର୍କରେ ଜନସାଧାରଣଙ୍କୁ ସଚେତନ କରିିବା ଉଦ୍ଦେଶ୍ୟରେ ଏଭଳି ବୈଠକର ଆୟୋଜନ କରାଯାଇଥିଲା। ତେବେ ପଞ୍ଜୀକରଣ ଫର୍ମରେ କିଛି ଗୁରୁତ୍ୱପୂର୍ଣ୍ଣ ସଂଶୋଧନ ହୋଇଛି। ଫର୍ମ ନଂ. ୬ରେ ପୂର୍ବରୁ ନୂଆ ଭୋଟରଙ୍କ ପଞ୍ଜୀକରଣ, ଗୋଟିଏ ନିର୍ବାଚନ ମଣ୍ଡଳୀରୁ ଅନ୍ୟ ନିର୍ବାଚନ ମଣ୍ଡଳୀକୁ ସ୍ଥାନାନ୍ତରଣ ପାଇଁ ସୁବିଧା ଥିଲା । କିନ୍ତୁ ଏବେ କେବଳ ନୂତନ ଭୋଟରଙ୍କ ନାମ ପଞ୍ଜୀକରଣ ହେବ। ପୂର୍ବରୁ ଫର୍ମ ନଂ.୭ରେ ଭୋଟର ତାଲିକାରୁ ନାମ ବାଦଦେବା କିମ୍ବା ଅନ୍ତର୍ଭୁକ୍ତ ସଂକ୍ରାନ୍ତୀୟ ଆପତ୍ତି ଅଭିଯୋଗ ନେଇ ଆବେଦନ କରିହେଉଥିଲା । କିନ୍ତୁ ଏବେ ଫର୍ମ ନଂ.୭ ସହ ମୃତ୍ୟୁ ପ୍ରମାଣପତ୍ର ସଂଲଗ୍ନ କରିବାକୁ ପଡ଼ିବ। ଫର୍ମ ନଂ. ୮ରେ ଭୋଟର ତାଲିକାରେ ତ୍ରୁଟି ଥିବା ବିବରଣୀଗୁଡିକର ସଂଶୋଧନ କରାଯାଉଥିଲା। ଏବେ ନିର୍ବାଚନ ମଣ୍ଡଳୀ ମଧ୍ୟରେ କିମ୍ବା ବାହାରକୁ ବାସସ୍ଥାନ ସ୍ଥାନାନ୍ତରଣ, ଭୋଟର ତାଲିକାରେ ଥିବା ବିବରଣୀର ସଂଶୋଧନ, ଭୋଟର ପରିଚୟପତ୍ର ବଦଳ ଓ ଦିିବ୍ୟାଙ୍ଗ ଭୋଟରଙ୍କ ଚିହ୍ନଟ ନିମନ୍ତେ ଏହି ଫର୍ମ ଲାଗୁହେବ। ଏସବୁ ନିମନ୍ତେ ନିର୍ବାଚନ ପଞ୍ଜୀକରଣ ଆଇନ ୧୯୬୦ର ସଂଶୋଧନ କରାଯାଇଥିବା କୁହାଯାଇଥିଲା। ବୈଠକରେ ଅନ୍ୟମାନଙ୍କ ମଧ୍ୟରେ ଅତିରିକ୍ତ ଜିଲାପାଳ ସଚ୍ଚିଦାନନ୍ଦ ସାହୁ, ଉପଜିଲାପାଳ ଧର୍ମେନ୍ଦ୍ର ମଲ୍ଲିକ, ଡେପୁଟି କଲେକ୍ଟର (ନିର୍ବାଚନ) ବିନୀତା ଦାଶ, ସହକାରୀ ଜିଲାପାଳ, ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ, ରାଜନୈତିକ ଦଳଗୁଡିକର ପ୍ରତିନିଧି, ଗଣମାଧ୍ୟମ ପ୍ରତିନିଧି, ଅନ୍ତଃଦୃଷ୍ଟି ସ୍ବେଚ୍ଛାସେବୀ ସଙ୍ଗଠନ ଓ ନେହେରୁ ଯୁବକେନ୍ଦ୍ରର କର୍ମକର୍ତ୍ତାମାନେ ସାମିଲ ହୋଇଥିଲେ।