ଭୁବନେଶ୍ବର, ୧୯ା୮(ବ୍ୟୁରୋ):ବାରମ୍ବାର ନିର୍ଦ୍ଦେଶ ସତ୍ତ୍ୱେ ସରକାରୀ ଅଧିକାରୀମାନେ ସେମାନଙ୍କ ସମ୍ପତ୍ତି ତାଲିକା ଦାଖଲ କରିବାରେ ଆଗ୍ରହ ଦେଖାଉନାହାନ୍ତି। ନିୟମତଃ ଗ୍ରୁପ୍ ‘ଏ’ ଠାରୁ ଆରମ୍ଭ କରି ଗ୍ରୁପ ‘ଡି’ କର୍ମଚାରୀଙ୍କ ପର୍ଯ୍ୟନ୍ତ ସମସ୍ତେ ନିଜର ସମ୍ପତ୍ତି ତାଲିକା ପ୍ରତ୍ୟେକ ବର୍ଷ ଜାନୁୟାରୀ ୧ ତାରିଖ ସୁଦ୍ଧା ଦାଖଲ କରିବା କଥା। ହେଲେ ୨୦୨୧ ଜାନୁୟାରୀ ୧ ସୁଦ୍ଧା ଦାଖଲ କରିବାକୁ ଥିବା ତାଲିକା ଏପର୍ଯ୍ୟନ୍ତ ବହୁ ଅଧିକାରୀ କରିନାହାନ୍ତି। ଏନେଇ ଏକାଧିକ ବାର ଅବଧି ବୃଦ୍ଧି କରାଯାଇଥିଲେ ସୁଦ୍ଧା କୌଣସି ସୁଫଳ ମିଳୁ ନାହିଁ। ଏଭଳିସ୍ଥିତିରେ ବୁଧବାର ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗ ପକ୍ଷରୁ ଆଉ ଥରେ ଅବଧିକୁ ବୃଦ୍ଧି କରାଯାଇ ସେପ୍ଟେମ୍ବର ୩୦ସୁଦ୍ଧା ସମସ୍ତ ସରକାରୀ ଅଧିକାରୀ ଏବଂ କର୍ମଚାରୀ ସମ୍ପତ୍ତି ତାଲିକା ଦାଖଲ କରିବାକୁ ଚିଠି କରାଯାଇଛି।
ରାଜ୍ୟ ସରକାରଙ୍କ ସମସ୍ତ ବିଭାଗ, ଆର୍ଡିସି ଏବଂ ଜିଲାପାଳମାନଙ୍କୁ ଏହି ଚିଠି ପଠାଯାଇଛି। ଏଥିରେ ସମସ୍ତ ସରକାରୀ କର୍ମଚାରୀ ସେମାନଙ୍କ ୧ ଜାନୁୟାରୀ ୨୦୨୧ରୁ ୩୧ ଡିସେମ୍ବର ୨୦୨୧ ମଧ୍ୟର ସମସ୍ତ ସମ୍ପତ୍ତି ତାଲିକାକୁ ସେପ୍ଟେମ୍ବର ୩୦ ସୁଦ୍ଧା ଦାଖଲ କରିବାକୁ କୁହାଯାଇଛି। ସରକାରୀ ଅଧିକାରୀମାନେ ସରକାରୀ କର୍ମଚାରୀ କଣ୍ଡକ୍ଟ ରୁଲ୍, ୨୦୨୧ ଅନୁଯାୟୀ ସମସ୍ତ କର୍ମଚାରୀ ପ୍ରକୃତ ସମ୍ପତ୍ତି ତାଲିକା ଜାନୁୟାରୀ ୧ କିମ୍ବା ସେହି ବର୍ଷ ଜାନୁୟାରୀ ୩୧ ସୁଦ୍ଧା ଦାଖଲ କରିବା କଥା। ତେବେ ୨୦୨୧ ବର୍ଷର ତାଲିକା ଯାହା ୩୧ ଜାନୁୟାରୀ ୨୦୨୨ ସୁଦ୍ଧା କରିବା କଥା ତାହାର ସମୟ ସୀମା ରାଜ୍ୟ ସରକାର ୩୦ ଜୁନ୍ ୨୦୨୨ ପର୍ଯ୍ୟନ୍ତ ବଢାଇଥିଲେ। ହେଲେ ବହୁ ଅନୁରୋଧ ପରେ ଏହି ସମୟ ଅବଧିକୁ ଆଉ ଥରେ ବୃଦ୍ଧି କରାଯାଇଛି। ଆସନ୍ତା ସେପ୍ଟେମ୍ବର ୩୦ ସୁଦ୍ଧା ସମ୍ପତ୍ତି ତାଲିକା ରାଜ୍ୟ ସରକାରଙ୍କ ସମସ୍ତ କର୍ମଚାରୀ ଦାଖଲ କରିପାରିବେ। ତେବେ ସବୁ ସରକାରୀ କାର୍ଯ୍ୟାଳୟରେ କାର୍ଯ୍ୟ କରୁଥିବା କର୍ମଚାରୀମାନେ ଶେଷ ତାରିଖ ପର୍ଯ୍ୟନ୍ତ ଅପେକ୍ଷା ନ କରି ଏହା ପୂର୍ବରୁ ସମ୍ପତ୍ତି ତାଲିକା ଦାଖଲ କରିବା ଲାଗି କୁହାଯାଇଛି।