କେନ୍ଦୁଝର,୬।୯(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ମୁଖ୍ୟ ଯୋଗାଣ ବିଭାଗ ପକ୍ଷରୁ ଆଉ ୨୫ ଜଣ ପେଟ୍ରୋଲ ପମ୍ପ ମାଲିକଙ୍କୁ ଚିଠି କରି ଜାତୀୟ ରାଜପଥ ପ୍ରାଧିକରଣ ପକ୍ଷରୁ ମିଳିଥିବା ନୋ ଅବଜେକ୍ସନ ସାର୍ଟିଫିକେଟ (ଏନ୍ଏଓସି) ଦାଖଲ କରିବାକୁ ଆଦେଶ କରିଛନ୍ତି। ଖିଲାପ କଲେ ବିକ୍ରି ଲାଇସେନ୍ସ ବାତିଲ ହେବ ବୋଲି ଚେତାବନୀ ଦିଆଯାଇଛି। ଏହାକୁ ମିଶାଇ ସପ୍ତାହକ ମଧ୍ୟରେ ୪୭ଟି ତେଲପମ୍ପ ମାଲିକଙ୍କୁ ନୋଟିସ୍ କରାଯାଇଛି। ଫଳରେ ତେଲପମ୍ପ ମାଲିକମାନେ କିଭଳି ନିର୍ଦ୍ଧାରିତ ସମୟରେ ଏନଓସି ଆଣିବେ ସେ ନେଇ ଚିନ୍ତା ବଢ଼ିଯାଇଛି। ଅନ୍ୟପକ୍ଷରେ ବିନା ଏନ୍ଏଚ୍ଆଇଇ ବିଭାଗର ଏନ୍ଓସିରେ କିଭଳି ବେଆଇନ ଭାବେ ତେଲ ପମ୍ପ ଚାଲିଆସୁଥିଲା ବୋଲି ପ୍ରଶ୍ନବାଚୀ ସୃଷ୍ଟି କରିଛି।
ଜିଲାରେ ଜାତୀୟ ରାଜପଥ, ରାଜ୍ୟ ରାଜପଥ, ଜିଲା ରାସ୍ତା ତଥା ସହର ମଧ୍ୟରେ ଶତାଧିକ ତେଲ ପମ୍ପ ଚାଲିଛି। ତେଲ କମ୍ପାନୀ ପକ୍ଷରୁ ନିର୍ଦ୍ଧାରିତ ନୀତିନିୟମକୁ ଅନେକ ତେଲ ପମ୍ପ ମାଲିକ ମାନୁ ନ ଥିବା ବେଳେ ପ୍ରଶାସନ ପକ୍ଷରୁ ନିୟମିତ ତଦାରଖ କରାଯାଉନାହିଁ। ଫଳରେ ତେଲ ପକାଇବାକୁ ଆସୁଥିବା ଗ୍ରାହକ ମାଗଣା ପାନୀୟଜଳ, ପ୍ରେସର ଚେକ ଭଳି ସୁବିଧା ପାଉନାହାନ୍ତି। ଏହାର ତଦାରଖ କରିବାକୁ ଥିବା ବିଭିନ୍ନ କମ୍ପାନୀର ସେଲ୍ସ ଅଫିସରମାନେ ନିୟମିତ ତେଲ ପମ୍ପକୁ ଯାଇ ଯାଞ୍ଚ ନ କରି ସଲାସୁତୁରା କରି ଚୁପ ବସୁଥିବାରୁ ଅନେକ ପମ୍ପ ବ୍ୟାପକ ଅବ୍ୟବସ୍ଥା ଘେରରେ ରହିଛି। ସେହିପରି ଏନ୍ଏଚ୍ ବା ଅନ୍ୟ ରାସ୍ତା କଡରେ ନିର୍ମାଣ ହୋଇଥିଲେ ହେଁ ସୁରକ୍ଷିତ ଯାତାୟାତ ପାଇଁ ସର୍ଭିସ ରୋଡ ଏବଂ ଟ୍ରାଫିକ ସମସ୍ୟା ଯେଭଳି ନ ଉପୁ ଯେ ସେ ନେଇ ପାର୍କିଂ ବ୍ୟବସ୍ଥା ମଧ୍ୟ କରାଯାଇନାହିଁ। ବିଳମ୍ବରେ ହେଉ ପଛେ ପ୍ରଶାସନ ପକ୍ଷରୁ ପଦକ୍ଷେପ ନିଆଯାଇଛି ବୋଲି ମତପ୍ରକାଶ ପାଇଛି। ଏନ୍ଏଚ୍ଏଆଇ ପକ୍ଷରୁ ଠିକ୍ ଭାବରେ ଯାଞ୍ଚ କରାଯାଇ ଏନ୍ଓସି ଦେବାକୁ ସଚେତନ ନାଗରିକମାନେ ଦାବି କରିଛନ୍ତି। ଜିଲା ମୁଖ୍ୟ ଯୋଗାଣ ବିଭାଗ ଅଧିକାରୀ ଅଜୟ କୁମାର ରଥ କହିଛନ୍ତି, ଏନ୍ଓସି ଜମା ନ କଲେ ସେମାନଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ବିକ୍ରି ଲାଇସେନ୍ସ ରଦ୍ଦ କରାଯିବ।