ଓ୍ବାଶିଂଟନ,୨୧।୧୧: ଓପନ୍ଏଆଇରୁ ବହିଷ୍କୃତ ହୋଇଥିବା ପୂର୍ବତନ ସିଇଓ ସାମ୍ ଅଲ୍ଟମ୍ୟାନ୍ ଏବଂ ପଦ ଛାଡ଼ିଥିବା ପୂର୍ବତନ ଅଧ୍ୟକ୍ଷ ଗ୍ରେଗ୍ ବ୍ରୋକ୍ମ୍ୟାନ୍ ମାଇକ୍ରୋସଫ୍ଟରେ ଯୋଗଦେଇ କୃତ୍ରିମ ବୁଦ୍ଧିମତ୍ତା (ଏଆଇ) ଉପରେ ଗବେଷଣା କରୁଥିବା ନୂଆ ଟିମ୍ର ନେତୃତ୍ୱ ନେବେ। ମାଇକ୍ରୋସଫ୍ଟ କାର୍ଯ୍ୟନିର୍ବାହୀ ଅଧ୍ୟକ୍ଷ ତଥା ସିଇଓ ସତ୍ୟ ନାଡେଲା ସୋମବାର ଏହା ଘୋଷଣା କରିଛନ୍ତି। ଏକ୍ସ’ରେ କରିଥିବା ଏକ ପୋଷ୍ଟରେ ନାଡେଲା ଲେଖିଛନ୍ତି, ଓପନ୍ଏଆଇ ସହ ମାଇକ୍ରୋସଫ୍ଟର ସହଭାଗିତା ବଜାୟ ରଖିବାକୁ ଆମେ ପ୍ରତିଶ୍ରୁତିବଦ୍ଧ। ଆମ ଉତ୍ପାଦନର କାର୍ଯ୍ୟଯୋଜନା ଉପରେ ଆମର ଆତ୍ମବିଶ୍ୱାସ ରହିଛି। ମାଇକ୍ରୋସଫ୍ଟ ଇଗ୍ନାଇଟ୍ରେ ଆମେ ଘୋଷଣା କରିଥିବା ପ୍ରତ୍ୟେକ ଇନୋଭେଶନ ଜାରି ରଖିବୁ ଏବଂ ଆମ ଗ୍ରାହକ ଓ ପାର୍ଟନରଙ୍କୁ ସହଯୋଗ କରିବୁ ବୋଲି ନାଡେଲା କହିଛନ୍ତି। ଅଲ୍ଟମ୍ୟାନ୍ ଏବଂ ବ୍ରୋକ୍ମ୍ୟାନ୍ଙ୍କ ସହ ସେମାନଙ୍କ ସହକର୍ମୀମାନେ ମଧ୍ୟ ମାଇକ୍ରୋସଫ୍ଟର ଅଗ୍ରିମ ଏଆଇ ଗବେଷଣା ଟିମ୍ରେ ଯୋଗଦେଉଥିବାରୁ ଆମେ ଅତ୍ୟନ୍ତ ଖୁସି ବୋଲି ମାଇକ୍ରୋସଫ୍ଟ ସିଇଓ କହିଛନ୍ତି। ନେତୃତ୍ୱ ବଜାୟ ରଖିବାରେ ଅଲ୍ଟମ୍ୟାନ୍ଙ୍କ ସାମର୍ଥ୍ୟ ଉପରେ ବୋର୍ଡର ଭରସା ନ ଥିବାରୁ ତାଙ୍କୁ ବହିଷ୍କାର କରାଗଲା ବୋଲି ଓପନ୍ଏଆଇ ପକ୍ଷରୁ କୁହାଯାଇଥିଲା।