ନୂଆଦିଲ୍ଲୀ,୧୮।୨: ଆମ ଆଦମୀ ପାର୍ଟି(ଏଏପି) ସୁପ୍ରିମୋ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ କୁମାର ବିଶ୍ୱାସଙ୍କ ଅଭିଯୋଗ ଉପରେ ମୁହଁ ଖୋଲିଛନ୍ତି। ଏକ ସାକ୍ଷାତକାରରେ ସେ କହିଛନ୍ତି, କୁମାର ବିଶ୍ୱାସ ଜଣେ ହାସ୍ୟ କବି, ସେ କିଛି କହିପାରିବେ, ଯାହାକୁ ମୋଦୀଜୀ ଏବଂ ରାହୁଲଜୀ ଗୁରୁତର ସହ ନେଇଛନ୍ତି। କୁମାର ହୁଏତ ଏକ ହାସ୍ୟ କବିତା କହିଥିବେ। ଯଦି ମୁଁ ୧୦ ବର୍ଷ ହେବ ଭାରତକୁ ଦୁଇ ଭାଗରେ ବିଭକ୍ତ କରିବାକୁ ଯୋଜନା କରୁଛି, ମୁଁ ଜଣେ ଆତଙ୍କବାଦୀ ତେବେ ସରକାର ଏପର୍ଯ୍ୟନ୍ତ କୌଣସି ପଦକ୍ଷେପ ନେଇ ନାହାଁନ୍ତି କାହିଁକି? ଏଭଳି ଅଭିଯୋଗ ହାସ୍ୟାସ୍ପଦ।
ଦିଲ୍ଲୀ ମୁଖ୍ୟମନ୍ତ୍ରୀ କହିଛନ୍ତି ଯେ, ମୁଁ ନିଶ୍ଚୟ ଦୁନିଆର ଭଲ ଆତଙ୍କବାଦୀ, ଯିଏ କି ଲୋକଙ୍କୁ ସ୍କୁଲ, ଡାକ୍ତରଖାନା, ବିଦ୍ୟୁତ, ସଡକ, ଜଳ ଯୋଗାଉଛି। ୧୦ ବର୍ଷ କଂଗ୍ରେସ ସରକାର ଥିଲା ଏବଂ ଗତ ୭ ବର୍ଷ ହେବ ଭାଜପା ସରକାର ଅଛି। ଯଦି ମୁଁ ଏତେ ବଡ ଆତଙ୍କବାଦୀ ଯୋଜନା କରୁଛନ୍ତି, ତେବେ ଏହି ସରକାରମାନେ ଶୋଇଥିଲେ କି? କାହିଁକି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନ ଥିଲା ବୋଲି କେଜ୍ରିଓ୍ବାଲ୍ ପ୍ରଶ୍ନ କରିଛନ୍ତି।
ସୂଚନାଯୋଗ୍ୟ, ନିକଟରେ ଏଏପିର ପୂର୍ବତନ ନେତା କୁମାର ବିଶ୍ୱାସ ପ୍ରକାଶ କରିଛନ୍ତି ଯେ, ଅରବିନ୍ଦ କେଜ୍ରିୱାଲ ଜଣେ ବିଚ୍ଛିନ୍ନତାବାଦୀ ସମର୍ଥକ। ତାଙ୍କ ସ୍ବପ୍ନ ହେଉଛି ଯେକୌଣସି ଉପାୟରେ ପଞ୍ଜାବର ଶକ୍ତି ହାସଲ କରିବା। କେଜ୍ରିୱାଲ ମୋତେ ଥରେ କହିଥିଲେ ଯେ ମୁଁ ପଞ୍ଜାବର ମୁଖ୍ୟମନ୍ତ୍ରୀ ହେବାକୁ ଚାହୁଁଛି କିମ୍ବା ମୁଁ ଖଲିସ୍ତାନର ପ୍ରଧାନମନ୍ତ୍ରୀ ହେବାକୁ ଚାହୁଁଛି।
ନିକଟରେ ଆବୋହରରେ ଏକ ସାଧାରଣ ସଭାରେ ସମ୍ବୋଧିତ କରିବାକୁ ଆସିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପୂର୍ବତନ ଆମ ଆଦମୀ ଦଳର ନେତା କୁମାର ବିଶ୍ୱାଙ୍କ ଅଭିଯୋଗ ଉପରେ କେଜ୍ରିଓ୍ବାଲଙ୍କୁ ଘେରି ଥିଲେ। ତାଙ୍କ ଉଦ୍ଦେଶ୍ୟ ଅଧିକ ବିପଜ୍ଜନକ ବୋଲି ମୋଦି କହିଥିଲେ।