ଭବାନୀପାଟଣା,୨୬।୯(ଡି.ଏନ୍.ଏ.): କଳାହାଣ୍ଡି ଜିଲା କୋକସରା ତହସିଲ ଆମପାଣି ଆର୍ଆଇ ଲାଞ୍ଚ ନେଉଥିବା ଦର୍ଶାଇ ଏକ ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହେବାରେ ଲାଗିଛି। ଜଣେ ବ୍ୟକ୍ତି ମ୍ୟୁଟେସନ୍ ପାଇଁ କହିଲା ପରେ ସମ୍ପୃକ୍ତ ଆର୍ଆଇ ୨ ହଜାର ଟଙ୍କା ଲାଞ୍ଚ ମାଗିଥିଲେ। ଟଙ୍କାଦେଲେ ୫/୭ ଦିନରେ କାମ ହେବ, ନ ଦେଲେ କାମକୁ ଅଟକାଇ ଦେବି ବୋଲି କହୁଥିବା ଏଥିରେ ଜଣାପଡିଛି। ଅନ୍ୟଜଣେ ଗରିବ ଲୋକ କୌଣସି କାର୍ଯ୍ୟପାଇଁ ୫ ଶହ ଟଙ୍କା ଲାଞ୍ଚ ଦେଉଛନ୍ତି। କିନ୍ତୁ ସଂପୃକ୍ତ କର୍ମଚାରୀ ଆହୁରି ଟଙ୍କା ମାଗୁଥିବା ଭିଡିଓରେ ଦେଖାଯାଉଛି। ତେବେ ସମ୍ପୃକ୍ତ ଆର୍ଆଇଙ୍କୁ ଫୋନ୍ରେ ଯୋଗାଯୋଗ କରାଯାଇଥିଲେ ମଧ୍ୟ ସେ କଲ୍ ଗ୍ରହଣ କରି ନ ଥିଲେ। ଏନେଇ କୋକସରା ତହସିଲଦାର ମନୋଜ ପାଢୀଙ୍କୁ ପଚାରିବାରୁ ତଦନ୍ତକରି କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି।
