ଚଣ୍ଡିଖୋଲ/ବଡ଼ଚଣା,୨ା୪(ପ୍ରଦୀପ୍ତ କୁମାର ପୃଷ୍ଟି/ଦିଲୀପ କୁମାର ମହାନ୍ତି):ବଡ଼ଚଣାରେ ରାଜ୍ୟ ସରକାରଙ୍କ ବିଭିନ୍ନ ଯୋଜନା ସକାରାତ୍ମକ ଭାବେ କାର୍ଯ୍ୟ କରିଛି। ବଡ଼ଚଣାବାସୀ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପ୍ରତି ଅସ୍ଥା ରଖିଛନ୍ତି। କେତେଜଣ ଲୋକ ମିଥ୍ୟା ଅପପ୍ରଚାର କରୁଛନ୍ତି। ଆଜିର ଅଦ୍ଭୁତ ପୂର୍ବ ସମାବେଶ ତା’ର ଜବାବ୍ ଦେଇଛି। ଏଠାରେ ସାଙ୍ଗଠନିକ ସ୍ଥିତି ସବୁଠାରୁ ମଜଭୁତ ଅଛି। ବିକାଶର ବାର୍ତ୍ତା ହିଁ ଲୋକଙ୍କ ମଧ୍ୟରେ ଉତ୍ସାହ ଉନ୍ମାଦନା ସୃଷ୍ଟି କରିଛି। ପ୍ରତ୍ୟେକ ପଞ୍ଚାୟତରେ ଦୀର୍ଘ ୨୪ ବର୍ଷ ମଧ୍ୟରେ ନୂତନ ବିକାଶର କଥା ଦେଖାଯାଉଛି। ଏଠାରେ କୌଣସି ଦ୍ୱନ୍ଦ୍ୱ ନାହିଁ। ନବୀନ ପଟ୍ଟନାୟକଙ୍କ ନୂଆ ଓଡ଼ିଶାରେ ଖୁସିର ଲହରୀ ଖେଳି ଯାଇଛି ବୋଲି ସୋମବାର ବଡ଼ଚଣା ମହୋତ୍ସବ ପଡ଼ିଆରେ ବିଜେଡିର ମହାସମାବେଶରେ ଯୋଗ ଦେଇ ବିଧାୟକ ଅମର ପ୍ରସାଦ ଶତପଥୀ ପ୍ରକାଶ କରିଛନ୍ତି।
ବଡ଼ଚଣା ବିଜୁ ଜନତା ଦଳର ସଭାପତି ଅରବିନ୍ଦ ସାମଲଙ୍କ ଅଧ୍ୟକ୍ଷତାରେ ଅନୁଷ୍ଠିତ ମହାସମାବେଶରେ ଛାତ୍ର ଜନତା ସଭାପତି ଯଚିନ୍ଦ୍ର କୁମାର ନାୟକ ଯୋଗଦେଇ ଗତ ୨୯ ତାରିଖରେ ଖଇରା ମେଲଣ ପଡ଼ିଆରେ କେତେଜଣ ବ୍ୟକ୍ତି କହିଥିଲେ ବିଧାୟକଙ୍କ ଲୋକ ସମ୍ପର୍କ ନାହିଁ ା ସେମାନେ ଆସି ଦେଖିଯିବା ଆବଶ୍ୟକ ଯେ ଆଜିର ସମାବେଶରେ କିପରି ସ୍ବତପ୍ରବୃତ୍ତ ଭାବେ ୨୫ ହଜାର ଲୋକଙ୍କ ସମାଗମ ହୋଇଛି। ଦୀର୍ଘ ୩୪ ବର୍ଷ ଧରି ବଡ଼ଚଣାବାସୀଙ୍କ ସେବା କରି ଜଣେ ଲୋକପ୍ରିୟ ବିଧାୟକ ହୋଇଛନ୍ତି। ସେଥିପାଇଁ ବଡ଼ଚଣାବାସୀ ବିଧାୟକଙ୍କୁ ୬ ଥର ବିଧାୟକ ଭାବେ ନିର୍ବାଚିତ କରି ପଠାଇଛନ୍ତି ବୋଲି ସେ ମତବ୍ୟକ୍ତ କରିଥିଲେ ା
ଅନ୍ୟମାନଙ୍କ ମଧ୍ୟରେ ଦଳର ସମ୍ପାଦକ ବିପିନ ବିହାରୀ ଜେନା, ଉପ ସଭାପତି ନିରଞ୍ଜନ ସେନାପତି, ପଞ୍ଚାନନ ଧଳ, ଜିଲା ଉପ ସଭାପତି ସାରଦା ପ୍ରସନ୍ନ ମହାନ୍ତି, ପୂର୍ବତନ ଜିଲା ପରିଷଦ ସଭ୍ୟ ସୁମତି ବାସ୍କେ,ମନୋରଞ୍ଜନ ଜେନା,ପଞ୍ଚାୟତ ସମିତି ଅଧ୍ୟକ୍ଷା ମିନତୀ ସେନାପତି, ଉପାଧ୍ୟକ୍ଷ ବିଭାସ ଚନ୍ଦ୍ର ନନ୍ଦ ଓ ସମସ୍ତ ସରପଞ୍ଚ ଓ ସମିତି ସଭ୍ୟମାନେ ଯୋଗ ଦେଇଥିଲେ। ସୂଚନାଯୋଗ୍ୟ, ଗତ ୨୯ ତାରିଖରେ ବିଧାୟକଙ୍କ ବିରୋଧରେ କେତେକ କର୍ମୀ ଏକ ସମ୍ମିଳନୀ କରି ବିଭିନ୍ନ ମନ୍ତବ୍ୟ ଦେଇ ଥିଲେ। ଏହାକୁ ଜବାବ୍ ଦେବା ପାଇଁ ସୋମବାର ବିଧାୟକଙ୍କ ପକ୍ଷରୁ ଏପରି ଶକ୍ତି ପ୍ରଦର୍ଶନ କରାଯାଇଥିଲା।