ଲଣ୍ଡନ, ୨୯।୬- ଇଂଲଣ୍ଡ ଓ ଭ୍ରମଣକାରୀ ଓ୍ବେଷ୍ଟଇଣ୍ଡିଜ ମଧ୍ୟରେ ଜୁଲାଇ ୮ରୁ ୩ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଆରମ୍ଭ ହେବ। ଏଥିଲାଗି ଘରୋଇ ଇଂଲଣ୍ଡ ପକ୍ଷରୁ ଟ୍ରେନିଂ କ୍ୟାମ୍ପ୍ ଲାଗି ୩୦ ଜଣିଆ ଖେଳାଳି ତାଲିକା ପ୍ରକାଶ ପାଇଛି। ଯେଉଁଥିରେ ଭାରତୀୟ ବଂଶୋଦ୍ଭବ ଶିଖ୍ କ୍ରିକେଟର୍ ଅମର ଭିର୍ଦି ସ୍ଥାନ ପାଇଛନ୍ତି। ଇଂଲଣ୍ଡ ପକ୍ଷରୁ କ୍ୟାମ୍ପ୍ରେ ସ୍ଥାନ ପାଇଥିବା ସ୍ପିନରଙ୍କ ମଧ୍ୟରେ ଭିର୍ଦି ସର୍ବକନିଷ୍ଠ। ଚୂଡ଼ାନ୍ତ ଦଳରେ ସ୍ଥାନ ପାଇବା ଲାଗି ଭିର୍ଦିଙ୍କୁ ଜ୍ୟାକ୍ ଲିଚ୍, ମୋଇନ ଅଲୀଙ୍କ ପରି ଅଭିଜ୍ଞ ସ୍ପିନର ସହ କଡ଼ା ଚ୍ୟାଲେଞ୍ଜର ସାମ୍ନା କରିବାକୁ ପଡ଼ିବ। କାଉଣ୍ଟି କ୍ଲବ ସରେ ପକ୍ଷରୁ ପ୍ରତିନିଧିତ୍ୱ କରୁଥିବା ୨୧ ବର୍ଷୀୟ ଏହି ଅଫ୍ସ୍ପିନର ଚୂଡ଼ାନ୍ତ ଏକାଦଶରେ ସ୍ଥାନ ପାଇବା ପାଇଁ ବେଶ୍ ଆଶାବାଦୀ ରହିଛନ୍ତି। ଏଥିଲାଗି ସେ କଠିନ ପରିଶ୍ରମ କରୁଥିବା କହିଛନ୍ତି। ଯଦି ଭିର୍ଦି ଇଂଲଣ୍ଡର ଚୂଡ଼ାନ୍ତ ଏକାଦଶରେ ସ୍ଥାନ ପାଆନ୍ତି ତେବେ ୩ୟ ଶିଖ୍ କ୍ରିକେଟର୍ ଭାବେ ଇଂଲଣ୍ଡ ଜାତୀୟ ଦଳ ପକ୍ଷରୁ ପ୍ରତିନିଧିତ୍ୱ କରିବାର ସୌଭାଗ୍ୟ ଲାଭ କରିବେ। ପୂର୍ବରୁ ଶିଖ୍ କ୍ରିକେଟର୍ ଭାବେ ମଣ୍ଟି ପାନେସର ଓ ରବି ବୋପାରା ଇଂଲଣ୍ଡ ପକ୍ଷରୁ ଖେଳି ସାରିଛନ୍ତି।
ପୁରା ନାମ ଗୁରାମର ସିଂ ଭିର୍ଦି। ତାଙ୍କ ବଂଶୋଦ୍ଭବ ଭାରତର ପଞ୍ଜାବରେ ରହୁଛନ୍ତି। କିନ୍ତୁ ଭିର୍ଦିଙ୍କ ବାପା ଓ ମା ଇଂଲଣ୍ଡରେ ସ୍ଥାୟୀ ଭାବେ ରହି ଆସୁଛନ୍ତି। ଭିର୍ଦିଙ୍କ ବାପା ଜଣେ ଟେନିସ ଖେଳାଳି। ୨୦୧୭ରେ ଭିର୍ଦି କାଉଣ୍ଟି କ୍ଲବ ସରେ ପକ୍ଷରୁ ପଦାର୍ପଣ କରିଥିଲେ। ବର୍ତ୍ତମାନ ସୁଦ୍ଧା ସେ ୨୩ ପ୍ରଥମ ଶ୍ରେଣୀ ମ୍ୟାଚ୍ ଖେଳି ୬୯ ଉଇକେଟ୍ ଅକ୍ତିଆର କରିଛନ୍ତି।