କୋଲକତା,୨୫।୭: ନୋବେଲ ପୁରସ୍କାର ବିଜେତା ତଥା ବିଶିଷ୍ଟ ଅର୍ଥନୀତିଜ୍ଞ ଅମର୍ତ୍ତ୍ୟ ସେନ ପଶ୍ଚିମବଙ୍ଗର ସର୍ବୋଚ୍ଚ ନାଗରିକ ପୁରସ୍କାର ‘ବଙ୍ଗବିଭୂଷଣ’ ଗ୍ରହଣ କରିବାକୁ ମନା କରି ଦେଇଛନ୍ତି। ଏହି ବିଶେଷ ସମ୍ମାନ ପଶ୍ଚିମବଙ୍ଗ ସରକାରଙ୍କ ପକ୍ଷରୁ ପ୍ରଦାନ କରାଯାଏ। ଅମର୍ତ୍ତ୍ୟ ସେନଙ୍କ ନିଷ୍ପତ୍ତି ସମ୍ପର୍କରେ ତାଙ୍କ ଝିଅ ଅନ୍ତରା ଦେବ ସେନ କହିଛନ୍ତି, ଅମର୍ତ୍ତ୍ୟ ସେନ ବର୍ତ୍ତମାନ ଭାରତରେ ନାହାଁନ୍ତି। ସେ କିଛି ଗୁରୁତ୍ୱପୂର୍ଣ୍ଣ କାର୍ଯ୍ୟ ପାଇଁ ୟୁରୋପ ଯାଇଛନ୍ତି। ତାଙ୍କୁ ଅନେକ ପୁରସ୍କାରରେ ସମ୍ମାନିତ କରାଯିବାର ସୌଭାଗ୍ୟ ମିଳିଛି ଏବଂ ସେ ଚାହୁଁଛନ୍ତି ଯେ, ‘ବଙ୍ଗବିଭୂଷଣ’ ବର୍ତ୍ତମାନ ଅନ୍ୟମାନଙ୍କୁ ଦିଆଯାଉ।
ଜୁଲାଇ ପ୍ରଥମ ସପ୍ତାହରେ ଅମର୍ତ୍ତ୍ୟ ସେନ ରାଜ୍ୟ ସରକାରୀ ଅଧିକାରୀଙ୍କ ସହ ଯୋଗାଯୋଗ କରି ସମ୍ବର୍ଦ୍ଧନା ସମାରୋହବେଳେ ସେ ଭାରତରେ ରହିବେ ନାହିଁ ବୋଲି କହିଥିଲେ।
ସୂଚନାଯୋଗ୍ୟ, ପଶ୍ଚିମବଙ୍ଗ ପ୍ରାଥମିକ ଶିକ୍ଷା ପରିଷଦ ଓ ପଶ୍ଚିମବଙ୍ଗ ସ୍କୁଲ ଶିକ୍ଷା ସେବା କମିଶନ ନିଯୁକ୍ତି ପରୀକ୍ଷା ଦୁର୍ନୀତି ତଦନ୍ତ କରିବାକୁ ଯାଇ ପ୍ରବର୍ତ୍ତନ ନିର୍ଦ୍ଦେଶାଳୟ ଚଢ଼ାଉ କରିଥିଲା। ଏହି ଚଢାଉରେ ପଶ୍ଚିମବଙ୍ଗ ମନ୍ତ୍ରୀ ପାର୍ଥ ଚାଟାର୍ଜୀଙ୍କ ସହଯୋଗୀ ଅର୍ପିତା ମୁଖାର୍ଜୀଙ୍କ ଘରୁ ନଗଦ ୨୧ କୋଟି ଟଙ୍କା ମିଳିଥିଲା। ଏହି ମାମଲାରେ ପାର୍ଥ ଚାଟାର୍ଜୀଙ୍କୁ ଗିରଫ କରାଯାଇଥିଲା। ସିପିଆଇ (ଏମ) ନେତା ସୁଜନ ଚକ୍ରବର୍ତ୍ତୀ ଟିଏମସି ସରକାରଙ୍କ ତରଫରୁ ପୁରସ୍କାର ଗ୍ରହଣ ନ କରିବାକୁ ଅମର୍ତ୍ତ୍ୟ ସେନଙ୍କୁ ଅନୁରୋଧ କରିଥିଲେ।