ଓ୍ବାଶିଂଟନ୍, ୫ା୪: ରିଲାଏନ୍ସ ଗ୍ରୁପ୍ ଅଧ୍ୟକ୍ଷ ମୁକେଶ ଅମ୍ବାନୀ ପୁଣିଥରେ ଏସିଆର ସବୁଠୁ ଧନୀ ବ୍ୟକ୍ତି ପରିଚୟ ହାସଲ କରିଛନ୍ତି। ମଙ୍ଗଳବାର ଆମେରିକୀୟ ବ୍ୟବସାୟିକ ମାଗାଜିନ୍ ଫୋର୍ବସ୍ ପକ୍ଷରୁ ବିଶ୍ୱର ସବୁଠୁ ଧନୀ ବ୍ୟକ୍ତିଙ୍କ ନାମ ତାଲିକା ପ୍ରକାଶ ପାଇଛି। ଏହି ସୂଚୀରେ ଗୌତମ ଆଦାନୀ ୨୪ତମ ସ୍ଥାନକୁ ଖସିଥିବାବେଳେ ଅମ୍ବାନୀ ୯ମ ସ୍ଥାନରେ ଅଛନ୍ତି। ବର୍ତ୍ତମାନ ଅମ୍ବାନୀ ୮୩.୪ ବିଲିୟନ୍ ଡଲାର ସମ୍ପତ୍ତିର ମାଲିକ।
ଜାନୁୟାରୀ ୨୪ରେ ଧନୀଙ୍କ ସୂଚୀରେ ଆଦାନୀ ୧୨୯ ବିଲିୟନ୍ ଡଲାର ସମ୍ପତ୍ତି ସହ ବିଶ୍ୱର ୩ୟ ସ୍ଥାନରେ ରହିଥିଲେ। କିନ୍ତୁ ଆଦାନୀଙ୍କୁ ନେଇ ହିଣ୍ଡେନବର୍ଗ ରିସର୍ଚ୍ଚ ରିପୋର୍ଟ ପ୍ରକାଶ ପାଇବା ପରେ ସେ ଏହି ତାଲିକାରୁ କ୍ରମାଗତ ଭାବେ ତଳକୁ ଖସିଥିବା ଫୋର୍ବସ୍ ପକ୍ଷରୁ କୁହାଯାଇଛି। ଆଦାନୀ ବର୍ତ୍ତମାନ ୪୭.୨ ବିଲିୟନ ଡଲାର ସମ୍ପତ୍ତିର ମାଲିକ ଥିବାବେଳେ ଏହି ସୂଚୀରେ ସେ ଦ୍ୱିତୀୟ ଧନୀ ଭାରତୀୟ। ଗତବର୍ଷ ଅମ୍ବାନୀଙ୍କ ଅଏଲ୍-ଟୁ-ଟେଲିକମ୍ ବ୍ୟବସାୟରୁ ଆୟ ୧୦୦ ବିଲିୟନ୍ ଡଲାର ଟପିଥିବା ଫୋର୍ବସ୍ ଉଲ୍ଲେଖ କରିଛି। ୨୦୨୨ରେ ମୁକେଶ ତାଙ୍କ ବଡ଼ ପୁଅ ଆକାଶଙ୍କୁ ଟେଲିକମ୍ ଆର୍ମ ଜିଓ ଇନ୍ଫୋକୋମ୍ର ଅଧ୍ୟକ୍ଷ ଦାୟିତ୍ୱ ପ୍ରଦାନ କରିଥିବାବେଳେ ଝିଅ ଈଶାଙ୍କୁ ରିଟେଲ୍ ବିଜ୍ନେସ୍ ହେଡ୍ ଏବଂ ସାନପୁଅ ଅନନ୍ତଙ୍କୁ ରିଲାଏନ୍ସର ନୂଆ ଏନର୍ଜି ଭେଞ୍ଚର ଦାୟିତ୍ୱ ଦେଇଛନ୍ତି। ଚଳିତବର୍ଷ ଏହି ୨୫ ଜଣିଆ ଧନୀ ତାଲିକାରେ ଥିବା ବ୍ୟକ୍ତିମାନଙ୍କ ମୋଟ ସମ୍ପତ୍ତି ୨.୧ ଟ୍ରିଲିୟନ୍ ଡଲାର ଆକଳନ କରାଯାଇଛି। ଗତବର୍ଷ ଏହି ସମ୍ପତ୍ତି ୨.୩ ଟ୍ରିଲିୟନ୍ ଡଲାର ଥିଲା।
ତେବେ ପୂର୍ବବର୍ଷ ତୁଳନାରେ ଚଳିତ ବର୍ଷ ମୋଟ ସମ୍ପତ୍ତିରେ ୨୦୦ ବିଲିୟନ୍ ଡଲାରର ହ୍ରାସ ଘଟିଛି। ଫୋର୍ବସ୍ ଧନୀ ତାଲିକାର ଶୀର୍ଷରେ ଫ୍ରାନ୍ସ ଲଗ୍ଜୁରି ଗୁଡ୍ସ୍ ଟାଇକୁନ୍ ବର୍ନାର୍ଡ ଅର୍ନଲ୍ଟ ରହିଛନ୍ତି। ଲୁଇସ୍ ଭୁଟୋନ୍, ଖ୍ରୀଷ୍ଟିଆନ ଡିଓର ଭଳି ଦାମୀ ବ୍ରାଣ୍ଡର ମାଲିକ ବର୍ନାର୍ଡ ୨୧୧ ବିଲିୟନ୍ ଡଲାର ସମ୍ପତ୍ତିର ମାଲିକ। ସେହିପରି ଫୋର୍ବସ୍ର ଧନୀ ତାଲିକାରେ ଟେସ୍ଲା ମାଲିକ ଏଲନ ମସ୍କ (୧୮୦ ବିଲିୟନ୍ ଡଲାର) ଦ୍ୱିତୀୟସ୍ଥାନ ଏବଂ ଆମାଜନ୍ ମାଲିକ ଜେଫ୍ ବେଜୋସ୍ (୧୧୪ ବିଲିୟନ୍ ଡଲାର) ତୃତୀୟ ସ୍ଥାନ ଅଧିକାର କରିଛନ୍ତି।