ନୂଆଦିଲ୍ଲୀ,୧୭।୯: ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦ ଶୁକ୍ରବାର ନୂଆଦିଲ୍ଲୀରେ ‘ଆମ୍ବେଡ୍କର ଆଣ୍ଡ୍ ମୋଦି: ରିଫର୍ମର୍ସ ଆଇଡିଆଜ୍, ପର୍ଫର୍ମର୍ସ ଇମ୍ପି୍ଲମେଣ୍ଟେଶନ’ପୁସ୍ତକ ଉନ୍ମୋଚନ କରିଛନ୍ତି। ପୁସ୍ତକ ଉନ୍ମୋଚନ ସମାରୋହରେ କେନ୍ଦ୍ରମନ୍ତ୍ରୀ ଅନୁରାଗ ଠାକୁର, ପୂର୍ବତନ ସିଜେଆଇ କେ.ଜି. ବାଲକ୍ରିଷ୍ଣନ, କେନ୍ଦ୍ର ସୂଚନା ଓ ପ୍ରସାରଣ ରାଷ୍ଟ୍ରମନ୍ତ୍ରୀ ଏଲ୍. ମୁରୁଗାନ ଏବଂ ବ୍ଲୁକାର୍ଟ ଡିଜିଟାଲ ଫାଉଣ୍ଡେଶନର ନିର୍ଦ୍ଦେଶକ ହିତେଶ ଜୈନ ପ୍ରମୁଖ ଉପସ୍ଥିତ ଥିଲେ। ଏହି ପୁସ୍ତକ କେବଳ ମହାନ୍ ସଂସ୍କାରକ ବାବା ସାହେବ ଡ. ଭୀମରାଓ ଆମ୍ବେଡ୍କରଙ୍କର ମହାନ ନୀତି ଆଦର୍ଶ ଓ ଦୂରଦୃଷ୍ଟିର ସଂକଳନ ନୁହେଁ, ସେଗୁଡ଼ିକ କିପରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱାରା କାର୍ଯ୍ୟକାରୀ ହୋଇଛି, ତାହାର ଏକ ସଂକଳନ। ଆମ୍ବେଡ୍କରଙ୍କ ଦୂରଦୃଷ୍ଟିକୁ ହୃଦୟଙ୍ଗମ କରିବା ଲାଗି ଏହା ମହାନ ପ୍ରୟାସର ଏକ ପ୍ରଲେଖନ ବୋଲି ଅନୁରାଗ କହିଛନ୍ତି। ଏହି ଅବସରରେ ପୂର୍ବତନ ରାଷ୍ଟ୍ରପତି କୋବିନ୍ଦ ପ୍ରଧାନମନ୍ତ୍ରୀ ମୋଦିଙ୍କୁ ଉଚ୍ଚ ପ୍ରଶଂସା କରିଥିଲେ। ଆମ୍ବେଡକରଙ୍କୁ ଦୂରଦୃଷ୍ଟିକୁ ବାସ୍ତବରେ ପରିଣତ କରିବା ଦିଗରେ କାର୍ଯ୍ୟ କରୁଥିବା ମୋଦିଙ୍କୁ ସେ ସମାଜ ସଂସ୍କାରକଙ୍କ ପ୍ରକୃତ ଅନୁଗାମୀ ବୋଲି ଅଭିହିତ କରିଥିଲେ। ସେହିପରି ପୂର୍ବତନ ସିଜେଆଇ ଜଷ୍ଟିସ ବାଲ୍କ୍ରିଷ୍ଣନ୍ ତାଙ୍କ ଉଦ୍ବୋଧନରେ ଆମ୍ବେଡ୍କରଙ୍କ ଅବଦାନ ସମ୍ପର୍କରେ ସ୍ମରଣ କରିବା ସହ ତାଙ୍କୁ ଭାରତର ମହାନ ଚିନ୍ତାନାୟକ ବୋଲି କହିଥିଲେ।