ଟିକିରି(ଡି.ଏନ୍.ଏ.)/ଭବାନୀପାଟଣା(ସ୍ବ.ପ୍ର.),୧୮ା୧୧:କଳାହାଣ୍ଡି ଜିଲାର ଅନେକ ଦୁର୍ଗମ ଅଞ୍ଚଳକୁ ଏବେବି ପକ୍କାରାସ୍ତା ହୋଇପାରି ନାହିଁ। ଫଳରେ ଅନେକ ସମୟରେ ରୋଗୀ ଏବଂ ଗର୍ଭବତୀଙ୍କୁ ଖଟିଆ, ଭାର ଏବଂ ଷ୍ଟ୍ରେଚରରେ ବୋହି ଡାକ୍ତରଖାନା ନେବାକୁ ପଡ଼ୁଛି। ବିଭିନ୍ନ ସମୟରେ ଲୋକଙ୍କୁ ଠିକ୍ ସମୟରେ ଆମ୍ବୁଲାନ୍ସ ସେବା ମଧ୍ୟ ମିଳୁନାହିଁ। ଫଳରେ ଡାକ୍ତରଖାନାରେ ପହଞ୍ଚିବା ପୂର୍ବରୁ ଗର୍ଭବତୀ ଏବଂ ଶିଶୁଙ୍କ ମୃତ୍ୟୁ ମଧ୍ୟ ଘଟୁଛି। ଥୁଆମୂଳରାମପୁର ବ୍ଲକ ସିଲେଟ ପଞ୍ଚାୟତ ଅନ୍ତର୍ଗତ ଦାଣ୍ଡପଦର ଗ୍ରାମରେ ଗୁରୁବାର ଏଭଳି ଅଭାବନୀୟ ଘଟଣା ଘଟିଛି। ଠିକ୍ ସମୟରେ ଡାକ୍ତରଖାନାରେ ପହଞ୍ଚି ନ ପାରିବାରୁ ଦାଣ୍ଡପଦର ଗ୍ରାମର ଦାନସିଂ ମାଝିଙ୍କ ସ୍ତ୍ରୀ ଜୀବନଦେଈ ଘରେ ପ୍ରସବ କରିଛନ୍ତି। ପରେ ଶିଶୁପୁତ୍ରର ମୃତ୍ୟୁ ଘଟିବା ସହ ପ୍ରସୂତି ଗୁରୁତର ହୋଇଛନ୍ତି। ଥୁଆମୂଳରାମପୁରରେ ସମସ୍ତ ୧୦୮ ଆମ୍ବୁଲାନ୍ସ ଅନ୍ୟ କାମରେ ଯାଇଥିବାରୁ ପଡ଼ୋଶୀ ରାୟଗଡ଼ା ଜିଲା କାଶୀପୁର ବ୍ଲକରୁ ଆମ୍ବୁଲାନ୍ସ ଯାଇ ୬ କି.ମି. ରାସ୍ତା ଯାଇ ଜୀବନଦେଈଙ୍କୁ ଷ୍ଟ୍ରେଚରରେ ବୋହି ଆଣିବା ପରେ କାଶୀପୁର ଓ ପରେ ରାୟଗଡ଼ା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି।
କାଶୀପୁର ବ୍ଲକର ଆମ୍ବୁଲାନ୍ସ ଡ୍ରାଇଭର ପରିକ୍ଷିତ ନାୟକ କହିଛନ୍ତି, ଦାଣ୍ଡପଦର ଗାଁକୁ ଯିବାପାଇଁ ଭଲ ରାସ୍ତା ନ ଥିଲା। ଷ୍ଟ୍ରେଚର ନେଇ ୬ କି.ମି. ଚାଲିଚାଲି ଯିବା ବେଳକୁ ଶିଶୁପୁତ୍ରର ମୃତ୍ୟୁ ଘଟିସାରିଥିଲା। ଅତ୍ୟଧିକ ରକ୍ତସ୍ରାବ ଯୋଗୁ ପ୍ରସୂତି ଜୀବନଦେଈ ମଧ୍ୟ ଅଚେତ ଅବସ୍ଥାରେ ପଡ଼ି ରହିଥିଲେ। ଗାଁ ଲୋକେ ଡାକ୍ତରଖାନା ନେବା ପାଇଁ କିମ୍ବା ସାହାଯ୍ୟ କରିବାକୁ ରାଜିହୋଇ ନ ଥିଲେ। ପରିକ୍ଷିତ ନିଜେ ଗାଁର କେତେଜଣ ଲୋକଙ୍କୁ ୩୦୦ ଟଙ୍କା ଦେଇ ସେମାନଙ୍କ ସହାୟତାରେ ମହିଳାଙ୍କୁ ୬ କି.ମି. ଷ୍ଟ୍ରେଚରରେ ବୋହି ଆମ୍ବୁଲାନ୍ସ ନିକଟକୁ ଆଣିଥିଲେ। ସେଠାରୁ ତାଙ୍କୁ ରାୟଗଡ଼ା ଜିଲାକୁ ଆଣିଥିଲେ ବୋଲି ସେ କହିଛନ୍ତି। ପରିକ୍ଷିତଙ୍କ ଭଳି କେତେଜଣ ଆମ୍ବୁଲାନ୍ସ ଚାଳକଙ୍କ ମହତ କାର୍ଯ୍ୟ ଯୋଗୁ ଅନେକ ସମୟରେ ଅଞ୍ଚଳର ଗର୍ଭବତୀଙ୍କ ଜୀବନ ମଧ୍ୟ ବଞ୍ଚିଯାଉଥିବା ଜଣାପଡ଼ିଛି।