ନୟାଗଡ଼,୫।୧୦(ଲୋକନାଥ ମିଶ୍ର): ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟରୁ ଭୁବନେଶ୍ୱର ରେଫର ହୋଇଥିବା ଜଣେ ଶିଶୁ କନ୍ୟାଙ୍କୁ ଆମ୍ବୁଲାନ୍ସ ମିଳି ନ ଥିବା ଅଭିଯୋଗ ହୋଇଛି। ଶିଶୁକନ୍ୟା ଗୁରୁତର ଭାବେ ଜିଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଛନ୍ତି। ଅଭିଯୋଗ ଅନୁସାରେ ଦଶପଲ୍ଲା ବ୍ଲକ ମଧ୍ୟଖଣ୍ଡ ଦୁଆର ର ଲକ୍ଷ୍ମୀପ୍ରିୟାର ପ୍ରଧାନ (୧୦) ଫିଡସ୍ ମାରିବା ପରେ ଦଶପଲ୍ଲା ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ। ଅବସ୍ଥାରେ ଉନ୍ନତି ନ ଆସିବାରୁ ଜିଲା ମୁଖ୍ୟଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିଲା। ନୟାଗଡ଼ରୁ ପୁଣି ଡାକ୍ତର ଭୁବନେଶ୍ୱର ରେଫର କରିଥିଲେ। ହେଲେ ବୁଧବାର ସକାଳୁ ଲକ୍ଷ୍ମୀପ୍ରିୟା ଭୁବନେଶ୍ୱର ଯାଇ ପାରି ନାହାହିଁ। ଅମ୍ବୁଲାନ୍ସ ଆସିବ ଆସିବ କହୁଥିଲେ ମଧ୍ୟ ଆସିଲାନି। ଏନେଇ ଲକ୍ଷ୍ମୀପ୍ରିୟାଙ୍କ ବାପା ପ୍ରଫୁଲ ପ୍ରଧାନ କୁହନ୍ତି, ଆମେ ଗରୀବ ଲୋକ ବୋଲି ଆମକୁ କ’ଣ ସ୍ବାସ୍ଥ୍ୟସେବା ମିଳିବନି। ନୟାଗଡ ଡାକ୍ତର ଭୁବନେଶ୍ୱରକୁ ରେଫର କରିଦେବା ପରେ ସରକାରୀ ଆମ୍ବୁଲାନ୍ସ ନ ମିଳିବା ଦୁଃଖର ବିଷୟ। ଆମ ପରି ଗରୀବ ଲୋକ କୁଆଡେ ବେସରକାରୀ ଆମ୍ବୁଲାନ୍ସରେ ଭୁବନେଶ୍ୱର ଯିବ। ଏହାର ତଦନ୍ତ କରାଯାଉ। ଅନ୍ୟପକ୍ଷେ ମୋ ଝିଅକୁ ତୁରନ୍ତ ଭୁବନେଶ୍ୱର ପଠାଯାଉ ବୋଲି ସେ କହିଛନ୍ତି।