ଭୁବନେଶ୍ୱର,୭।୧୧(ବ୍ୟୁରୋ): ରାୟଗଡ଼ାର ବିଷମ କଟକ ଭଳି ଅନୁନ୍ନତ ଅଞ୍ଚଳରେ କରୋନା ରୋଗୀଙ୍କୁ ଆମ୍ବୁଲାନ୍ସ ସେବା ମିଳିବ। ନୂଆଦିଲ୍ଲୀସ୍ଥିତ ସାମାଜିକ ଅନୁଷ୍ଠାନ ‘ଆଶ୍ରା’ ପକ୍ଷରୁ ଏପରି ଉଦ୍ୟମ ଆରମ୍ଭ ହୋଇଛି। ଶୁକ୍ରବାର ମଞ୍ଚେଶ୍ବରସ୍ଥିତ ଓଡ଼ିଶା ଡିଜେଲ୍ ଇଞ୍ଜିନ୍ସ ପ୍ରାଇଭେଟ୍ ଲିମିଟେଡ୍ ପରିସରରେ ଅନୁଷ୍ଠାନର ଉପଦେଷ୍ଟା ସସ୍ମିତା ଦଳେଇ ଓ ସେଣ୍ଟ୍ରାଲ୍ ଏକ୍ସସାଇଜ୍ ଆଣ୍ଡ୍ କଷ୍ଟମ୍ସର ପୂର୍ବତନ ଉପଆୟୁକ୍ତ ମହେନ୍ଦ୍ର ଚନ୍ଦ୍ର ସାହୁ ଆଶ୍ରାର ସଦସ୍ୟ ମହେଶ୍ବର ନାୟକଙ୍କୁ ଆମ୍ବୁଲାନ୍ସର ଚାବି ପ୍ରଦାନ କରିଥିଲେ।
ସୂଚନାଯୋଗ୍ୟ, ‘ଆଶ୍ରା’ ୨୦୦୨ରୁ ଓଡ଼ିଶା, ଝାଡ଼ଖଣ୍ଡ, ଦିଲ୍ଲୀ, ଉତ୍ତରପ୍ରଦେଶ ଓ ଆସାମରେ ଅବହେଳିତ ଲୋକଙ୍କ ପାଇଁ କାମ କରି ଆସୁଥିବାବେଳେ କରୋନା ମହାମାରୀ ସମୟରେ ମାର୍ଚ୍ଚ ୧୮ ପରଠୁ ୧୮ ରାଜ୍ୟର ୩ଲକ୍ଷ ପ୍ରବାସୀ ଶ୍ରମିକଙ୍କୁ ସହାୟତାର ହାତ ବଢ଼ାଇଥିଲା। ସମ୍ପ୍ରତି ବିଷମ କଟକର ୫ହଜାର ପରିବାର ପାଇଁ ଅନୁଷ୍ଠାନ କାମ କରୁଛି। ‘ଆଶା ହିଁ ଜୀବନ’ ଅଭିଯାନ ମାଧ୍ୟମରେ ୫ବର୍ଷ ହେଲା ଖାଦ୍ୟ, ବାସଗୃହ, ଶିକ୍ଷା, ସ୍ବାସ୍ଥ୍ୟ ଓ ଜୀବିକା ଯୋଗାଇ ଆସୁଛି। ମହେନ୍ଦ୍ର କହିଛନ୍ତି, ଆମ୍ବୁଲାନ୍ସ ଅଭାବରୁ ସେହି ଅଞ୍ଚଳର କରୋନା ରୋଗୀ ରିକ୍ସାରେ ଯାଉଥିବାରୁ ସେମାନଙ୍କୁ ହସ୍ପିଟାଲ୍ରେ ଭର୍ତ୍ତି କରାଇ ଦିଆଯାଉ ନାହିଁ। କରୋନା ସଂକ୍ରମିତ ହୋଇ ମଧ୍ୟ ଅନେକ ହସ୍ପିଟାଲରେ ପହଞ୍ଚି ପାରୁନାହାନ୍ତି। ଏହାକୁ ହୃଦୟଙ୍ଗମ ପୂର୍ବକ ଆଦିବାସୀ ଓ ରୋଜଗାର ନ ଥିବା ଗୋଷ୍ଠୀଙ୍କ ଉଦ୍ଦେଶ୍ୟରେ ଆମ୍ବୁଲାନ୍ସ ସେବା ଯୋଗାଇ ଦିଆଯାଇଛି ବୋଲି ସେ କହିଛନ୍ତି। ଆଶ୍ରାର ମୁଖ୍ୟ ଶୁଭଜିତ ସାହୁ କହିଛନ୍ତି, ସେଠାରେ ଏଣିକି କେହି ଆମ୍ବୁଲାନ୍ସ ସେବାରୁ ବଞ୍ଚିତ ହେବେ ନାହିଁ। ଏହି ଅବସରରେ ଆଶ୍ରାର ଉପସଭାପତି ପ୍ରଶାନ୍ତ ଘଡ଼େଇ, କର୍ମୀ ଉମାଶଙ୍କର ପାତ୍ର, ରାଜକିଶୋର ଦାସ, ଶୁଭଙ୍କରୀ ଦାସ ପ୍ରମୁଖ ଉପସ୍ଥିତ ଥିଲେ।
