ୱାଶିଂଟନ,୨୧ ।୨: ଆମେରିକାର ପୂର୍ବତନ ରାଷ୍ଟ୍ରପତି ଜର୍ଜ ୱାଶିଂଟନ, ଜନ ଏଫ କେନେଡି, ହ୍ୱାଇଟ ଡି ଆଇଜନହାବର ଓ ରୋନାଲ୍ଡ ରିଗନଙ୍କ କେଶର ସାମ୍ପଲକୁ ମହାକାଶ ପଠାଯିବାକୁ ପ୍ରସ୍ତୁତି ଚାଲିଛି । ଟେକ୍ସାସ ସ୍ଥିତ କମ୍ପାନୀ ସେଲେଷ୍ଟିସ ଏହି କେଶର ସାମ୍ପଲକୁ ମହାକାଶକୁ ପଠାଇବ ।
ସେଲେଷ୍ଟିସ ହେଉଛି ମହାକାଶକୁ ଚିତାଭଷ୍ମ ବା ଅବଶେଷ ପଠାଇବାର କମ୍ପାନୀ । ଆମେରିକାରରେ ରାଷ୍ଟ୍ରପତି ଦିବସ ଅବସରରେ ପୂର୍ବତନ ରାଷ୍ଟ୍ରପତିଙ୍କ ଡିଏନଏ କେଶ ଆକାରରେ ରକେଟ ଦ୍ୱାରା ମହାକାଶକୁ ଉତକ୍ଷେପଣ କରାଯିବ । ଏହି ମିଶନ ଚଳିତ ବର୍ଷ ଶେଷରେ ଆରମ୍ଭ ହେବ ।
ସୂଚନା ଅନୁଯାୟୀ, ଆମେରିକାର ରାଷ୍ଟ୍ରପତିଙ୍କ ବ୍ୟତୀତ ପ୍ରସିଦ୍ଧ ଟେଲିଭଜନ ସିରିଜ ଷ୍ଟାର ଟ୍ରେକର ନିର୍ମାତା ଜିନ ରୋଡେନଭେରୀ ଏବଂ ଧାରାବାହିକର ଅନ୍ୟ କଳାକାରଙ୍କର ଅବଶେଷ ମଧ୍ୟ ମହାକାଶକୁ ପଠାଯିବ । କୁହାଯାଉଛି କି ପୂର୍ବତନ ରାଷ୍ଟ୍ରପତିଙ୍କ କେଶ ନମୁନାକୁ ଜଣେ ଅଜ୍ଞାତ ବ୍ୟକ୍ତି ଦାନ କରିଛନ୍ତି ଏବଂ ଏହାସହ ଏକ ପ୍ରମାଣ ପତ୍ର ରହିଛି । ସେଲେଷ୍ଟିସ କହିଛି ଯେ ମହାକାଶକୁ ପଠାଯିବାକୁ ଥିବା କେଶ ନମୁନାକୁ ଗତ କିଛି ବର୍ଷ ଧରି ଜଳବାୟୁ ନିୟନ୍ତ୍ରଣ ସୁବିଧାରେ ରଖାଯାଇଥିଲା ।
ସେଲେଷ୍ଟିସର ସହ-ପ୍ରତିଷ୍ଠାତା ତଥା ସିଇଓ ଚାର୍ଲସ ଶେଫର କହିଛନ୍ତି, ଆମେରିକାର ଏହି ପୂର୍ବତନ ରାଷ୍ଟ୍ରପତିଙ୍କ ଏହି ଡିଏନଏକୁ ମହାକାଶକୁ ପଠାଇ ଆମେ ମଣିଷଙ୍କୁ ମହାକାଶକୁ ପଠାଇବା ମିଶନ ପାଇଁ ମୁଳଦୁଆ ପକାଉଛୁ । ଏହା ସହିତ ଏହା ମହାକାଶରେ ମନୁଷ୍ୟର ଏକ ଐତିହାସିକ ରେକର୍ଡ ହେବ । କେଶ ନମୁନା ପଠାଇଥିବା ଏହି ରକେଟ ଫ୍ଲୋରିଡାର କେପ କାନଭେରାଲରୁ ଉତକ୍ଷେପଣ ଆରମ୍ଭ କରିବ ।
