ୱାଶିଂଟନ,୫ ।୬: ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ସୁରକ୍ଷାରେ ସାମାନ୍ୟ ଢିଲା ନଜର ଆସିଛି । ଡୋଲାବେୟରର ରେହୋବୋଥ ବିଚରେ ଛୁଟି କାଟିବାକୁ ଯାଇଥିବା ବାଇଡେନଙ୍କ ଭ୍ୟାକେସନ ହୋମ ଉପରେ ଏକ ଅଜ୍ଞାତ ବିମାନ ନଜର ଆସିବାକୁ ନେଇ ଚର୍ଚ୍ଚା ଯୋର ଧରିଥିଲା । ସୁରକ୍ଷା ଦୃଷ୍ଟିରୁ ଏହି ଘଟଣା ପରେ ସୁରକ୍ଷା ଏଜେନ୍ସି ଆଲର୍ଟ ହୋଇଯାଇଥିଲେ । ପରେ ସୁରକ୍ଷା ଦାୟିତ୍ୱରେ ଥିବା ସିକ୍ରେଟ ସର୍ଭିସ ତୁରନ୍ତ ଆମେରିକା ରାଷ୍ଟ୍ରପତିଙ୍କୁ ସେଫ୍ ହାଉସ୍ ସିଫ୍ଟ କରିଦେଇଥିଲେ । ହ୍ୱାଇଟ ହାଉସ ପକ୍ଷରୁ ଏକ ବୟାନ ଜାରି କରାଯାଇ ଘଟଣା ସମ୍ପର୍କରେ ସୂଚନା ଦିଆଯାଇଛି ।
ହ୍ୱାଇଟ ହାଉସ ପକ୍ଷରୁ ଦିଆଯାଇଥିବା ବୟାନରେ କୁହାଯାଇଛି, ଏକ ଅଜଣା ବିମାନ ଭ୍ୟାକେଶନ ହୋମ ଉପରେ ଆକାଶ ମାର୍ଗର ଉଲ୍ଲଂଘନ କରିଥିଲା । ଏହି କାରଣରୁ ରାଷ୍ଟ୍ରପତିଙ୍କ ସୁରକ୍ଷାକୁ କଡାକଡି କରାଯାଇଥିଲା । ହେଲେ ଏହାକୁ ନେଇ ରାଷ୍ଟ୍ରପତି ଅବା ତାଙ୍କ ପରିବାର ପାଇଁ କୌଣସି ବିପଦ ନ ଥିଲା ।