ନୂଆଦିଲ୍ଲୀ,୪।୧୨: ମଧ୍ୟପ୍ରଦେଶ, ରାଜସ୍ଥାନ ଏବଂ ଛତିଶଗଡରେ ଭାଜପା ସ୍ପଷ୍ଟ ସଂଖ୍ୟାଗରିଷ୍ଠତା ହାସଲ କରିଛି। ମଧ୍ୟପ୍ରଦେଶରେ ବିପୁଳ ସଂଖ୍ୟାଗରିଷ୍ଠତା ହାସଲ କରି ଭାଜପା ୧୬୩ଟି ଆସନ ଜିତିବାରେ ସଫଳ ହୋଇଥିଲା। ରାଜସ୍ଥାନରେ ଭାଜପା ୧୧୫ଟି ଆସନ ଜିତିଛି। ବିଜେପି ଛତିଶଗଡରେ ୫୪ଟ ଆସନ ଜିତି କ୍ଷମତା ହାସଲ କରିବାରେ ସଫଳ ହୋଇଛି। ଆଫ୍ରିକୀୟ-ଆମେରିକୀୟ ଗାୟିକ ତଥା ଅଭିନେତ୍ରୀ ମେରି ମିଲବେନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭାଜପାର ନିର୍ବାଚନୀ ବିଜୟ ପାଇଁ ପ୍ରଶଂସା କରିଛନ୍ତି।
ସୋସିଆଲ ମିଡିଆ ପ୍ଲାଟଫର୍ମରେ ମେରି ମିଲବେନ କହିଛନ୍ତି,ପ୍ରଧାନମନ୍ତ୍ରୀ ପଦ ପାଇଁ ପ୍ରାର୍ଥୀ ଭାବେ ମୋଦି ଭାରତର ପ୍ରଥମ ପସନ୍ଦ। ଏହା ବ୍ୟତୀତ ମୋଦି ଆମେରିକା-ଭାରତ ସମ୍ପର୍କ ପାଇଁ ସର୍ବଶ୍ରେଷ୍ଠ ନେତା ଅଟନ୍ତି।
ଭାରତୀୟ ଜନତା ପାର୍ଟି ଛତିଶଗଡ, ମଧ୍ୟପ୍ରଦେଶ ଏବଂ ରାଜସ୍ଥାନରେ ଚମତ୍କାର ବିଜୟ ହାସଲ କରିଛି। ଅନ୍ୟପକ୍ଷରେ ତେଲଙ୍ଗାନାରେ ହୋଇଥିବା ବଡ ବିଜୟରୁ କଂଗ୍ରେସ ସାନ୍ତ୍ୱନା ନେଇଛି। ଏହାପୂର୍ବରୁ ସେପ୍ଟେମ୍ବର ୭ରେ ଗାୟକ ମିଲବେନ ପ୍ରଧାନମନ୍ତ୍ରୀ ମୋଦିଙ୍କୁ ଜି-୨୦ର ସମ୍ପୂର୍ଣ୍ଣ ସଦସ୍ୟ ଭାବରେ ଆଫ୍ରିକୀୟ ୟୁନିଅନକୁ ସାମିଲ କରିବା ପ୍ରସ୍ତାବ ପାଇଁ ପ୍ରଶଂସା କରିଥିଲେ।
ଭାରତର ଜାତୀୟ ସଂଗୀତ ଏବଂ ଭକ୍ତି ଭଜନ ‘ଓମ ଜୟ ଜଗଦୀଶ ହରେ’ ପାଇଁ ମିଲବେନ ଭାରତରେ ଲୋକପ୍ରିୟ। ଜୁନ ମାସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆମେରିକା ଗସ୍ତ ସମୟରେ ଏକ କାର୍ଯ୍ୟକ୍ରମରେ ସେ ଭାରତର ଜାତୀୟ ସଂଗୀତ ‘ଜନ ଗଣ ମନ’ ଗାଇଥିଲେ। ସେ ପୂର୍ବରୁ ପ୍ରଧାନମନ୍ତ୍ରୀ ମୋଦିଙ୍କୁ ଅନେକ ଥର ପ୍ରଶଂସା କରିଛନ୍ତି।