ୱାଶିଂଟନ,୨୫ ।୫: ଆମେରିକାର ଟେକ୍ସାସରେ ଥିବା ଏକ ପ୍ରାଥମିକ ସ୍କୁଲରେ ହୋଇଥିବା ଗୁଳିକାଣ୍ଡରେ ୧୮ ନିରିହ ଶିଶୁଙ୍କ ସମେତ ୨୧ ଜଣଙ୍କ ମୃତ୍ୟୁ ସମ୍ପୂର୍ଣ୍ଣ ଆମେରିକାକୁ ସ୍ତବ୍ଧ କରିଦେଇଛି । ପ୍ରଥମରୁ ଚତୁର୍ଥ ଶ୍ରେଣୀର ପିଲାଙ୍କୁ ଜଣେ ୧୮ ବର୍ଷିୟ ବାଳକ ଗୁଳିକରି ହତ୍ୟା କରିଥିବା ସୂଚନା ମିଳିଛି । ସମ୍ପୂର୍ଣ୍ଣ ଦେଶରେ ଶୋକର ଛାୟା । ଏହି ଗୁଳିକାଣ୍ଡ ପରେ ଆମେରିକା ରାଷ୍ଟ୍ରପତି ଜୋ ବାଇଡେନ ରାଷ୍ଟ୍ରକୁ ସମ୍ବୋଧନ କରିଛନ୍ତି । ସେ କହିଛନ୍ତି ଏବେ ସମୟ ଆସିଛି ଏହା ଉପରେ ଆକ୍ସନ ନେବାର । ସୂଚନାଯୋଗ୍ୟ, କ୍ୱାଡ ସମ୍ମିଳନୀ ଲାଗି ବାଇଡେନ ଜାପାନ ଗସ୍ତ ସାରି ଫେରିବା ପରେ ଏହି ଦୁଃଖଦ ଘଟଣା ଘଟିଯାଇଛି । ଏକଥା ଜଣାପଡିବା ପରେ ବାଇଡେନ ଓ ତାଙ୍କ ସହଧର୍ମିଣୀ ଜିଲ ବାଇଡେନ ଶୋକ ପ୍ରକାଶ କରିଛନ୍ତି । ଏହି ଘଟଣାକୁ ନେଇ ବାଇଡେନ କହିଛନ୍ତି ବିଶ୍ୱର କୌଣସି ଦେଶରେ ଏମିତି ସାମୁହିକ ଗୁଳିକାଣ୍ଡ ହେଉନାହିଁ । ହେଲେ ଆମେରିକାରେ କାହିଁକି ବୋଲି ସେ ଜନତାଙ୍କୁ ପଚାରିଛନ୍ତି । ଏହି କ୍ରମରେ ରାଷ୍ଟ୍ରପତି ଅସ୍ତ୍ରଶସ୍ତ୍ର ବ୍ୟବସାୟୀଙ୍କୁ ଟାର୍ଗେଟ କରିବା ସହ ଏବେ ଏମିତି ଘଟଣା ଉପରେ ଆକ୍ସନ ନେବାର ସମୟ ଆସିଛି ବୋଲି କହିଛନ୍ତି ।
