ନୂଆଦିଲ୍ଲୀ,୯ା୯: ଜି୨୦ ସମ୍ମିଳନୀରେ ଯୋଗଦେବା ପାଇଁ ଆମେରିକା ରାଷ୍ଟ୍ରପତି ଜୋ ବାଇଡେନ୍ଙ୍କ ସହ କେତେଜଣ ଖବରଦାତା ଭାରତ ଆସିଛନ୍ତି। ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ବାଇଡେନ୍ଙ୍କ ମଧ୍ୟରେ ହୋଇଥିବା ଦ୍ୱିପାକ୍ଷିକ ଆଲୋଚନା ବେଳେ ଉଭୟଙ୍କୁ ପ୍ରଶ୍ନ କରିବା ସୁଯୋଗ ସେମାନଙ୍କୁ ଦିଆଯାଇ ନ ଥିବା ହ୍ବାଇଟ୍ ହାଉସ୍ ପକ୍ଷରୁ କୁହାଯାଇଛି।
ଆମେରିକା ଜାତୀୟ ସୁରକ୍ଷା ପରାମର୍ଶଦାତା (ଏନ୍ଏସ୍ଏ) ଜାକ୍ ସୁଲିଭାନ୍ କହିଛନ୍ତି, ଜି୨୦ ସମ୍ମିଳନୀ ଅବସରରେ ପ୍ରଧାନମନ୍ତ୍ରୀଙ୍କ ବାସଭବନରେ ଅନୁଷ୍ଠିତ ଏହି ବୈଠକର ପ୍ରୋଟୋକଲ ସେ ନିଜେ ସ୍ଥିର କରିଛନ୍ତି। ତେଣୁ ସାମ୍ବାଦିକମାନେ ଅଧିକ ପ୍ରଶ୍ନ କରିପାରିବେ ନାହିଁ।
ଭାରତରେ ନିରପେକ୍ଷ ରିପୋର୍ଟିଂକୁ ନେଇ ଗଣମାଧ୍ୟମ ଉପରେ କଟକଣାକୁ ନେଇ ଅନ୍ତର୍ଜାତୀୟ ସ୍ତରରେ ସମାଲୋଚିତ ହୋଇଥିବା ମୋଦି କ୍ଷମତାକୁ ଆସିବା ପରଠୁ ପ୍ରାୟ କୌଣସି ଖବରଦାତାଙ୍କ ପ୍ରଶ୍ନର ଉତ୍ତର ଦେବାକୁ ଉଚିତ ମଣିନାହାନ୍ତି। ଗତ ଜୁନ୍ରେ ମୋଦି ଆମେରିକା ଗସ୍ତ ବେଳେ ଉଭୟ ପକ୍ଷରୁ ବିସ୍ତୃତ ଆଲୋଚନା ପରେ ହ୍ବାଇଟ୍ ହାଉସ୍ରେ ଅନୁଷ୍ଠିତ ଏବଂ ଖବରଦାତା ସମ୍ମିଳନୀରେ ଯୋଗଦେବା ପାଇଁ ରାଜି ହୋଇଥିଲେ। ସେତେବେଳେ ପ୍ରେସ୍ କନ୍ଫରେନ୍ସ ଆୟୋଜନ ଲାଗି ହ୍ବାଇଟ୍ ହାଉସ୍ ପକ୍ଷରୁ ଜୋର୍ ଦିଆଯିବାରୁ ଭାରତୀୟ ଅଧିକାରୀମାନେ ଏଥିରେ ବାଧା ଦେଇଥିଲେ। ଫଳରେ ମୋଦିଙ୍କ ଶାସନ କାଳରେ ଗଣମାଧ୍ୟମର ସ୍ବାଧୀନତା ଓ ମାନବୀୟ ପ୍ରସଙ୍ଗଗୁଡ଼ିକ ଉପରେ ମୋଦିଙ୍କୁ ସମାଲୋଚନା କରିବା ନେଇ ରାଷ୍ଟ୍ରପତିଙ୍କ ଆଗ୍ରହ ସମ୍ପର୍କରେ ବାଇଡେନ୍ ପ୍ରଶାସନ ତତ୍କାଳ ଇଙ୍ଗିତ କରିଥିଲା। ମୋଦିଙ୍କ ଏହି ଗସ୍ତ ସମୟରେ କଂଗ୍ରେସକୁ ଦେଇଥିବା ଉଦ୍ବୋଧନକୁ ୬ ଡେମୋକ୍ରାଟିକ୍ ଆଇନପ୍ରଣେତା ବର୍ଜନ କରିଥିଲେ। ଭାରତରେ ସଂଖ୍ୟାଲଘୁ ମୁସଲମାନଙ୍କ ପ୍ରତି ବ୍ୟବହାରକୁ ନେଇ କ୍ଷୁବ୍ଧ ହାଉସ୍ ଅଫ୍ ରିପ୍ରେଜେଣ୍ଟେଟିଭ୍ସ ପ୍ରତିନିଧି ରାଶିଦା ତଲାଇବ୍, ଇହାନ୍ ଓମାର ଏବଂ ଆଲେକ୍ଜାଣ୍ଡ୍ରଆ ଓକାସିଓ-କୋର୍ଟେଜ୍ ଏହି ବର୍ଜନରେ ସାମିଲ ହୋଇଥିଲେ। କିନ୍ତୁ ବାଇଡେନ୍ ଭାରତୀୟ ପ୍ରଧାନମନ୍ତ୍ରୀଙ୍କୁ ହ୍ବାଇଟ୍ ହାଉସ୍କୁ ଭବ୍ୟ ସ୍ବାଗତ କରି ଏକ ଆନୁଷ୍ଠାନିକ ନୈଶଭୋଜିର ଆୟୋଜନ କରିଥିଲେ।
ହ୍ବାଇଟ୍ ହାଉସ୍ ପ୍ରେସ୍ ସେକ୍ରେଟାରି କେରିନ୍ ଜିନ୍-ପିଏରେ ଗୁରୁବାର ଖବରଦାତାମାନଙ୍କୁ କହିଛନ୍ତି, ବାଇଡେନ୍ଙ୍କ ଭାରତ ଗସ୍ତ ବେଳେ ଗଣମାଧ୍ୟମକୁ ଅଧିକ ସୁଯୋଗ ଦେବା ପାଇଁ ପ୍ରଶାସନ ପକ୍ଷରୁ ଯଥାସମ୍ଭବ ଉଦ୍ୟମ କରାଯାଉଛି। ସୁଲିଭାନ୍ଙ୍କ ସମେତ ହ୍ବାଇଟ୍ ହାଉସ୍ ଯୋଗାଯୋଗ ନିର୍ଦ୍ଦେଶକ ବେନ୍ ଲାବୋଲ୍ଟ, ଡେପୁଟି ଏନ୍ଏସ୍ଏ ଜନ୍ ଫିନର, ରାଷ୍ଟ୍ରପତିଙ୍କ ଡେପୁଟି ଆସିଷ୍ଟାଣ୍ଟ ତଥା ଇଣ୍ଡୋ-ପାସିଫିକ୍ କୋ-ଅର୍ଡିନେଟର କୁର୍ଟ କାମ୍ପବେଲ୍ଙ୍କ ଭଳି ଆଉ କେତେଜଣ ଅଧିକାରୀ ପ୍ରେସ୍କୁ ଅଧିକ ପ୍ରବେଶ ଅଧିକାର ନିମନ୍ତେ ଯୁକ୍ତି ବାଢ଼ିବା ପାଇଁ ସେମାନଙ୍କ ଭାରତୀୟ ପ୍ରତିପକ୍ଷମାନଙ୍କ ସହ ଯୋଗାଯୋଗ କରିଥିଲେ ହେଁ ତାହା ସମ୍ଭବ ହୋଇପାରି ନ ଥିଲା। ସମ୍ମିଳନୀ ଶେଷରେ ବାଇଡେନ୍ ନୂଆଦିଲ୍ଲୀ ପରିବର୍ତ୍ତେ ଭିଏଟ୍ନାମରେ ଖବରଦାତା ସମ୍ମିଳନୀ କରିବେ, ଯେଉଁଠି ଖବରଦାତାଙ୍କ ପ୍ରଶ୍ନର ଉତ୍ତର ଦେବା ତାଙ୍କୁ ସହଜ ହେବ ବୋଲି ହ୍ବାଇଟ୍ ହାଉସ୍ ପକ୍ଷରୁ କୁହାଯାଇଛି।