କିଭ୍/ଓ୍ବାଶିଂଟନ୍, ୨୪।୮: ସୋଭିଏଟ୍ ସଂଘରୁ ଅଲଗା ହୋଇଥିବା ୟୁକ୍ରେନ୍ ବୁଧବାର ଏହାର ୩୧ତମ ସ୍ବାଧୀନତା ଦିବସ ପାଳନ କରିବାକୁ ଯାଉଥିବାବେଳେ ଏହି ଦିନ ରୁଷିଆ କିଭ୍ ଉପରେ ବଡ଼ଧରଣର ଆକ୍ରମଣ ଯୋଜନା କରିଥିବା ଆଶଙ୍କା ରହିଛି। ସାଧାରଣ ନାଗରିକ ଏବଂ ସରକାରୀ ଭିତ୍ତିଭୂମିକୁ ମସ୍କୋ ଟାର୍ଗେଟ କରିବା ଭୟ ଥିବାରୁ ୟୁକ୍ରେନ୍ ଛାଡ଼ିବାକୁ ଆମେରିକା ମଙ୍ଗଳବାର ଏହାର ନାଗରିକମାନଙ୍କୁ ପରାମର୍ଶ ଦେଇଛି। ସ୍ବାଧୀନତା ଦିବସରେ ଆକ୍ରମଣ କଲେ ରୁଷିଆକୁ ମୁହଁତୋଡ଼ ଜବାବ ଦିଆଯିବବୋଲି ୟୁକ୍ରେନ୍ ରାଷ୍ଟ୍ରପତି ଭୋଲଡମିର୍ ଜେଲେନ୍ସ୍କି କହିଛନ୍ତି। ଅପରପକ୍ଷେ ୟୁକ୍ରେନ୍ ଉପରେ ରୁଷିଆ ଆକ୍ରମଣକୁ ୬ ମାସ ପୂରିଥିବାରୁ ଅନେକ ଦେଶର ଲିଡର ଏବଂ ଅନ୍ତର୍ଜାତୀୟ ସଙ୍ଗଠନଗୁଡ଼ିକ ତଥାକଥିତ କ୍ରିମିଆ ପ୍ଲାଟ୍ଫର୍ମରେ ଭର୍ଚୁଆଲ ମାଧ୍ୟମରେ ଯୋଗଦେଇ ଏହି ପୂର୍ବ ୟୁରୋପୀୟ ରାଷ୍ଟ୍ରକୁ ସମବେଦନା ଜଣାଇଛନ୍ତି।
ପୂର୍ବ ୟୁକ୍ରେନ୍ର ଜାପୋରିଜିଝିଆସ୍ଥିତ ୟୁରୋପର ବୃହତ୍ତମ ନ୍ୟୁକ୍ଲିୟର ପାଓ୍ବାର ପ୍ଲାଣ୍ଟ ଉପରେ ରୁଷୀୟ ସୈନ୍ୟ ଆର୍ଟିଲାରି ମାଡ଼ କରିବା ସହ ଏୟାର ଷ୍ଟ୍ରାଇକ୍ କରିଥିବା କିଭ୍ ପକ୍ଷରୁ କୁହାଯାଇଛି। ୬ ମାସ ଧରି ଚାଲିଥିବା ଏହି ଯୁଦ୍ଧର ପରିଣାମ ଏବେ ଅନିଶ୍ଚିତତା ମଧ୍ୟରେ। ଏହା ମଧ୍ୟରେ ରୁଷିଆ କୃଷ୍ଣସାଗର ସମେତ ପୂର୍ବ ୟୁକ୍ରେନ୍ରେ ନିଜ ନିୟନ୍ତ୍ରଣ ବଢ଼ାଇଛି। କେତେକ ଛୋଟ ସହରକୁ ମଧ୍ୟ ମସ୍କୋ କବ୍ଜା କରିଛି। ସେଗୁଡ଼ିକୁ ରୁଷିଆରେ ମିଶାଇବା ପାଇଁ ଗଣଭୋଟ ନିମନ୍ତେ ମସ୍କୋର ଯୋଜନା ରହିଛି। ନିକଟରେ ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ଙ୍କ ଘନିଷ୍ଠ ସହଯୋଗୀଙ୍କ ଝିଅ ଡାରିଆ ଡଗିନାଙ୍କ କାର୍ ବିସ୍ଫୋରଣରେ ମୃତ୍ୟୁ ପାଇଁ ମସ୍କୋ ୟୁକ୍ରେନ୍କୁ ଦାୟୀ କରିଛି। ଏହି ଅଭିଯୋଗକୁ ୟୁକ୍ରେନ୍ ଖଣ୍ଡନ କରିଥିଲେ ହେଁ ରୁଷିଆ ପ୍ରତିଶୋଧ ପରାୟଣ ହୋଇ ଆକ୍ରମଣ କରିବା ଆଶଙ୍କା ରହିଛି। ମସ୍କୋ ଟାର୍ଗେଟରେ କିଭ୍ ଥିବାରୁ ସେଠାରେ ଗୁରୁବାର ପର୍ଯ୍ୟନ୍ତ ଜନଗହଳି ଏବଂ ସ୍ବାଧୀନତା ଦିବସ ରାଲି ଉପରେ କଟକଣା ଲାଗିଛି। ଅପରପକ୍ଷେ ଜାପୋରଜିଝିଆ ପ୍ଲାଣ୍ଟ ଉପରେ ଆଲୋଚନା ପାଇଁ ମସ୍କୋ ଜାତିସଂଘ ସୁରକ୍ଷା ପରିଷଦକୁ ମଙ୍ଗଳବାର ଅନୁରୋଧ କରିଛି।
ମାସର ଯୁଦ୍ଧରେ ଅନୂ୍ୟନ ୧ କୋଟି ୨୦ ଲକ୍ଷ ଲୋକ ୟୁକ୍ରେନ୍ ଛାଡ଼ିଛନ୍ତି। ଜାତିସଂଘ ମାନବାଧିକାର ଉଚ୍ଚାୟୁକ୍ତଙ୍କ ସୂଚନା ଅନୁସାରେ, ଫେବୃୟାରୀ ୨୪ରୁ ଅଗଷ୍ଟ ୨୧ ମଧ୍ୟରେ ଏହି ଯୁଦ୍ଧରେ ୫,୫୮୭ ସାଧାରଣ ଜନତା ପ୍ରାଣ ହରାଇଛନ୍ତି। ୭,୮୯୦ ଜଣ ଆହତ ହୋଇଛନ୍ତି। ମୃତାହତଙ୍କ ମଧ୍ୟରେ ୯୭୨ ଶିଶୁ ଥିବା ୟୁନିସେଫ୍ କହିଛି। ସେହିପରି ରୁଷିଆ ଆକ୍ରମଣରେ ୟୁକ୍ରେନ୍ର ପ୍ରାୟ ୯ ହଜାର ସୈନ୍ୟ ନିହତ ହୋଇଥିବା ୟୁକ୍ରେନ ସଶସ୍ତ୍ର ବଳ ମୁଖ୍ୟ ଭାଲେରି ଜାଲୁଝ୍ନି କହିଛନ୍ତି। ମସ୍କୋ ଏହାର ନିହତ ସୈନ୍ୟଙ୍କ ବାବଦରେ ତଥ୍ୟ ଦେଇ ନ ଥିବାବେଳେ ଏହି ସଂଖ୍ୟା ୪୫,୪୦୦ ବୋଲି ୟୁକ୍ରେନ୍ କହିଛି।