ମେଲବୋର୍ନ,୯।୧୧: ବ୍ୟାଟରଙ୍କୁ ଭୟବିତ କରିବା ପାଇଁ ଫଲୋ ଥ୍ରୁରେ ବୋଲର ବଲ ଫୋପାଡ଼ିବା କିଛି ନୂଆ କଥା ନୁହେଁ। କିନ୍ତୁ ଅଷ୍ଟ୍ରେଲିଆନ ପେସର ଜେମ୍ସ ପାଟିନସନଙ୍କ ଥ୍ରୋରେ ଆହତ ହୋଇଛନ୍ତି ବ୍ୟାଟର ଡାନିଏଲ ହୁଗ୍ସ। ଏଭଳି ଘଟଣା ଲାଗି ପାଟିନସନଙ୍କୁ ପ୍ରଶଂସକ, ପୂର୍ବତନ କ୍ରିକେଟର, ଭାଷ୍ୟକାର ସୋସିଆଲ ମିଡିଆରେ ସମାଲୋଚନା କରିଛନ୍ତି।
ମେଲବୋର୍ନ କ୍ରିକେଟ ଗ୍ରାଉଣ୍ଡରେ ଭିକ୍ଟୋରିଆ ଓ ନ୍ୟୁ ସାଉଥ୍ ଓ୍ବେଲ୍ସ ମଧ୍ୟରେ ଚାଲିଥିବା
ଶିଫିଲ୍ଡ ଶିଲ୍ଡ ଟୁର୍ନାମେଣ୍ଟର ମ୍ୟାଚ୍ର ଚତୁର୍ଥ ଦିନ ତଥା ସୋମବାର ପାଟିନସନଙ୍କ ଥ୍ରୋରେ ବ୍ୟାଟର ହୁଗ୍ସ ଆହତ ହୋଇଛନ୍ତି। ଦ୍ୱିତୀୟ ଇନିଂସରେ ୬୪ ରନ୍ର ଅପରାଜିତ ପାଳି ଖେଳିଥିବା ହୁଗ୍ସ ପାଟିନସନଙ୍କ ବଲରେ ଏକ ଡିଫେନ୍ସିଭ ଶଟ୍ ଖେଳିଥିଲେ। ଫଲୋ ଥ୍ରୁରେ ବଲ ଧରି ପାଟିନସନ ଫୋପାଡ଼ିଥିଲେ। ବଲ ସିଧା ହୁଗ୍ସଙ୍କ ପାଦରେ ବାଜିଥିଲା। ତୁରନ୍ତ ପାଟିନସନ କ୍ଷମା ମାଗିଥିଲେ। କିନ୍ତୁ ଯନ୍ତ୍ରଣାରେ ଛଟପଟ ହେଉଥିବା ହୁଗ୍ସ ପଡ଼ିଯାଇଥିଲେ ପଡ଼ିଆରେ। ଏହି ଘଟଣା ପୂର୍ବରୁ ମ୍ୟାଚ୍ରେ ଦୁଇ ଖେଳାଳି ବହୁବାର ମୁହଁାମୁହିଁ ହୋଇଥିଲେ। ଏପରି କି ଟି ବ୍ରେକ୍ ବେଳେ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ଉଲ୍ଲେଖଯୋଗ୍ୟ, ଶେଷ ଥର ୨୦୨୦ରେ ଅଷ୍ଟ୍ରେଲିଆ ପାଇଁ ଖେଳିଥିବା ପାଟିନସନ ଅନ୍ତର୍ଜାତୀୟ କ୍ରିକେଟରେ ୨୧ ଟେଷ୍ଟ ଓ ୧୫ ଦିନିକିଆ ଖେଳିଛନ୍ତି।