ଚେନ୍ନାଇ,୨୮।୨: ତାମିଲନାଡୁ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ସ୍ବରାଷ୍ଟ୍ୟ ମନ୍ତ୍ରୀ ଅମିତ ଶାହା ରବିବାର ଭିଲୁପୁରମରେ ଏକ ସାଧାରଣ ସଭାରେ ଯୋଗ ଦେଇଥିଲେ। ସଭାକୁ ସମ୍ବୋଧିତ କରି ସେ କହିଛନ୍ତି, ମୁଁ ଦୁଃଖିତ ଯେ ମୁଁ ତାମିଲ ଭାଷାରେ କଥାବାର୍ତ୍ତା କରିପାରିବି ନାହିଁ। ଏହା ଭାରତର ସର୍ବପୁରାତନ ଏବଂ ମଧୁର ଭାଷା ମଧ୍ୟରୁ ଅନ୍ୟତମ। ମୁଁ ତୁମକୁ କ୍ଷମା ମାଗୁଛି। ଏହା ପରେ କଂଗ୍ରେସ ଏବଂ ଡିଏମକେ ଉପରେ ଆକ୍ରମଣ କରି ଶାହା କହିଛନ୍ତି ଯେ ଏଆଇଏଡିଏମକେ ଏବଂ ଏନଡିଏ ଗରିବ ଲୋକଙ୍କ ହିତ ପାଇଁ ଚିନ୍ତା କରୁଥିବାବେଳେ ଡିଏମକେ ଏବଂ କଂଗ୍ରେସ ଦୁର୍ନୀତିଗ୍ରସ୍ତ ଏବଂ ବିଭାଜନ ରାଜନୀତି କରୁଛନ୍ତି। ସେ କହିଛନ୍ତି, ରାହୁଲ ବାବାଙ୍କୁ ପ୍ରଧାନମନ୍ତ୍ରୀ କରିବା ପାଇଁ ସୋନିଆ ଜୀ ଏବଂ ଉଦୟନିଧିଙ୍କୁ ମୁଖ୍ୟମନ୍ତ୍ରୀ କରିବା ପାଇଁ ଷ୍ଟାଲିନ ଚିନ୍ତିତ ଅଛନ୍ତି।
ସେ କହିଛନ୍ତି ଯେ କ୍ଷମତାରେ ଥିବାବେଳେ ୧୨ ଲକ୍ଷ କୋଟି ଟଙ୍କା ସ୍କାମରେ କଂଗ୍ରେସ ସମ୍ପୃକ୍ତ ଥିଲା ଏବଂ ସେତେବେଳେ ଡିଏମକେ ଏହା ସହ ମିଳିତ ଥିଲା। ଏହି ତିନୋଟି – ୨ଜି, ୩ଜି ଏବଂ ୪ଜି ତାମିଲନାଡୁରେ ଉପସ୍ଥିତ ଅଛି। ୨ଜିର ଅର୍ଥ ହେଉଛି ଦ୍ୱିତୀୟ ପିଢି ମାରନ ପରିବାର, ୩ଜିର ଅର୍ଥ ହେଉଛି ତୃତୀୟ ପିଢି କରୁଣାନିଧିଙ୍କ ପରିବାର ଏବଂ ୪ଜିର ଅର୍ଥ ହେଉଛି ଚତୁର୍ଥ ପିଢି ଗାନ୍ଧୀ ପରିବାର ବୋଲି ଶାହା କହିଛନ୍ତି।
ସେ ଆହୁରି ମଧ୍ୟ କହିଛନ୍ତି ଯେ, ଗତ ସାଢେ ଛଅ ବର୍ଷ ମଧ୍ୟରେ ଆମେ ଦେଶର ପ୍ରାୟ ପ୍ରତ୍ୟେକ ବ୍ୟକ୍ତିଙ୍କୁ ଘର ଦେବା ଲକ୍ଷ୍ୟରେ ଅଛୁ। ୨୦୨୨ରେ, ଏପରି ଜଣେ ବ୍ୟକ୍ତି ରହିବେ ନାହିଁ, ଯାହାର ପକ୍କା ଘର ନ ଥିବ। କଂଗ୍ରେସ ଯେଉଁ କାମ ୬୦-୭୦ ବର୍ଷରେ କରିପାରି ନାହିଁ, ଭାଜପା ତାହା ୬ ବର୍ଷରେ କରି ଦେଖାଇଛି ବୋଲି ସେ କହିଛନ୍ତି।