ଜୋଧପୁର,୧୦।୯: କଂଗ୍ରେସର ‘ଭାରତ ଯୋଡୋ’ ଯାତ୍ରାକୁ ନେଇ କଟାକ୍ଷ କରିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହା। ରାହୁଲ ବିଦେଶୀ ଟି-ଶର୍ଟ ପିନ୍ଧି ଭାରତ ଯୋଡ଼ିବାକୁ ବାହାରିଛନ୍ତି ବୋଲି ସେ କହିଛନ୍ତି।
ଶାହା ଏବେ ଦୁଇଦିନିଆ ରାଜସ୍ଥାନ ଗସ୍ତରେ ଅଛନ୍ତି। ଏହି ଅବସରରେ ସେ ଶନିବାର ଜୋଧପୁରରେ ‘ବୁଥ୍ ସଂକଳ୍ପ ମହାସମ୍ମେଳନ’ରେ ଦଳର କର୍ମୀଙ୍କୁ ସମ୍ବୋଧିତ କରିଥିଲେ। ଏଥିରେ ସେ ରାହୁଲଙ୍କୁ କଟାକ୍ଷ କରି କହିଥିଲେ ଯେ, ରାହୁଲ ବାବା ଏବେ ଏବେ ଭାରତ ଯୋଡୋ ଯାତ୍ରାରେ ବାହାରିଛନ୍ତି। ମୁଁ ତାଙ୍କୁ ଏବଂ କଂଗ୍ରେସକୁ ସଂସଦରେ ଦେଇଥିବା ଏକ ଭାଷଣ ମନେ ପକାଇବାକୁ ଚାହୁଁଛି। ରାହୁଲ ବାବା କହିଥିଲେ ଭାରତ ରାଷ୍ଟ୍ର ହିଁ ନୁହେଁ। ଆପଣ କେଉଁ ପୁସ୍ତକରେ ପଢ଼ିଛନ୍ତି ଏ କଥା। ଭାରତ ଏଭଳି ଏକ ରାଷ୍ଟ୍ର ଯାହା ଲାଗି ଲକ୍ଷ ଲକ୍ଷ ଲୋକ ନିଜ ପ୍ରାଣର ଆହୁତି ଦେଇଛନ୍ତି। ରାହୁଲ ବିଦେଶୀ ଟି- ଶର୍ଟ ପିନ୍ଧି ଭାରତ ଯୋଡ଼ିବାକୁ ବାହାରିଛନ୍ତି, ମୋତେ ଲାଗୁଛି ତାଙ୍କୁ ଭାରତ ଇତିହାସ ବିଷୟରେ ଜାଣିବାର ଆବଶ୍ୟକତା ଅଛି।
ସେହିଭଳି ରାଜସ୍ଥାନ ସରକାରଙ୍କୁ ନେଇ ସେ କହିଛନ୍ତି, ଏହି କଂଗ୍ରେସ ସରକାର ରାଜ୍ୟର ବିକାଶ କରିବାରେ ବିଫଳ ହୋଇଛି। ଏବେ ଦେଶର ଦୁଇଟି ରାଜ୍ୟ ରାଜସ୍ଥାନ ଏବଂ ଛତିଶଗଡ଼ରେ କଂଗ୍ରେସ ସରକାର ଅଛି। ଯଦି ଏହି ଦୁଇଟି ରାଜ୍ୟରେ ଭାଜପା ସରକାର ହୋଇଯାଏ ତେବେ କଂଗ୍ରେସ ପାଖରେ କିଛି ବାକି ରହିବ ନାହିଁ। ୨୦୧୮ ନିର୍ବାଚନରେ କଂଗ୍ରେସ ରାଜ୍ୟବାସୀଙ୍କୁ ବଡ଼ ବଡ଼ ପ୍ରତିଶ୍ରୁତି ଦେଇଥିଲା। ଏଥିରୁ କୌଣସିଟି ପୂରଣ ହୋଇନାହିଁ। ତେବେ କଂଗ୍ରେସ ରାସ୍ତା କରିପାରିବ ନାହିଁ, ବିଜୁଳି ଦେଇ ପାରିବ ନାହିଁ, ରୋଜଗାର ଦେଇ ପାରିବ ନାହିଁ। ଦଳ କେବଳ ଭୋଟବ୍ୟାଙ୍କ ଏବଂ ତୁଷ୍ଟିକରଣ ରାଜନୀତି କରିପାରେ। ଭାଜପା ହିଁ ରାଜ୍ୟର ବିକାଶ କରିପାରେ। ଏଥିଲାଗି ୨୦୨୩ରେ ଭାଜପାକୁ ଦୁଇ ତୃତିୟାଂଶ ବହୁମତ ସହ ସରକାର ଗଠନ କରିବାକୁ ହେବ। ୨୦୨୪ରେ ସମସ୍ତ ସିଟ୍ ଜିତିବାକୁ ହେବ ବୋଲି ସେ କହିଛନ୍ତି।