କେବଳ ଆତଙ୍କବାଦ ନୁହେଁ, ସମ୍ପୂର୍ଣ୍ଣ ସିଷ୍ଟମକୁ ଧ୍ୱଂସ କରିବାକୁ ହେବ, ଅମିତ ଶାହା

ନୂଆଦିଲ୍ଲୀ,୫।୧୦: କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଗୁରୁବାର ନୂଆଦିଲ୍ଲୀରେ ଜାତୀୟ ଅନୁସନ୍ଧାନ ଏଜେନ୍ସି (ଏନଆଇଏ)ର ତୃତୀୟ ଦୁଇ ଦିନିଆ ଆତଙ୍କବାଦ ବିରୋଧୀ ସମ୍ମିଳନୀକୁ ଉଦଘାଟନ କରିଛନ୍ତି।

ଏହି ସମ୍ମିଳନୀକୁ ସମ୍ବୋଧିତ କରି ସ୍ବରାଷ୍ଟ୍ର ମନ୍ତ୍ରୀ ଶାହା କହିଛନ୍ତି ଯେ କେବଳ ଆତଙ୍କବାଦ ନୁହେଁ ଏହାର ସମଗ୍ର ସିଷ୍ଟମକୁ ସମ୍ପୂର୍ଣ୍ଣ ରୂପେ ଧ୍ୱଂସ କରିବା ପାଇଁ ମୋଦି ସରକାର ଏକ ଅଭିଯାନରେ ନିୟୋଜିତ ଅଛନ୍ତି। ଏଥିପାଇଁ ସମସ୍ତ ଆତଙ୍କବାଦ ବିରୋଧୀ ଏଜେନ୍ସି ପାଇଁ କଡ଼ା ଆଭିମୁଖ୍ୟ ଗ୍ରହଣ କରିବା ଅତ୍ୟନ୍ତ ଜରୁରୀ ଅଟେ ଯାହା ଦ୍ୱାରା କୌଣସି ନୂତନ ଆତଙ୍କବାଦୀ ସଂଗଠନ ଗଠନ ହୋଇପାରିବ ନାହିଁ।
ଶାହା ଆହୁରି ମଧ୍ୟ କହିଛନ୍ତି ଯେ ମୋଦି ସରକାରଙ୍କ କଠୋର ନିଷ୍ପତ୍ତି ଯୋଗୁଁ ଜମ୍ମୁ କଶ୍ମୀର, ନକ୍ସଲ ପ୍ରଭାବିତ ଅଞ୍ଚଳ ତଥା ଉତ୍ତର-ପୂର୍ବରେ ହିଂସା ହ୍ରାସ କରିବାରେ ବହୁତ ସଫଳତା ମିଳିଛି। ଆତଙ୍କବାଦ ବିରୋଧରେ ଲଢେଇ ବିଶ୍ୱବ୍ୟାପୀ ତୃଣମୂଳ ସ୍ତର ପର୍ଯ୍ୟନ୍ତ ସହଯୋଗ ଏବଂ ଦେଶର ବିଭିନ୍ନ ରାଜ୍ୟର ଅଂଶଗ୍ରହଣ ଆବଶ୍ୟକ କରେ।
ଏହି ସମ୍ମିଳନୀକୁ ସମ୍ବୋଧିତ କରି ଶାହା କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଗତ ୯ବର୍ଷ ମଧ୍ୟରେ ଦେଶର ସମସ୍ତ ପ୍ରକାର ଆତଙ୍କବାଦକୁ ଦୃଢ ଭାବରେ ଦମନ କରିବାରେ କେନ୍ଦ୍ରୀୟ ତଥା ରାଜ୍ୟ ଏଜେନ୍ସିମାନେ ସଫଳ ହୋଇଛନ୍ତି। କେବଳ ଆତଙ୍କବାଦ ନୁହେଁ ଏହାର ସମଗ୍ର ସିଷ୍ଟମକୁ ନଷ୍ଟ କରିବା ଆବଶ୍ୟକ।
ସେ କହିଛନ୍ତି ଯେ ଆତଙ୍କବାଦକୁ ଶେଷ କରିବା ପାଇଁ ଏନଆଇଏ ଅଧୀନରେ ଆତଙ୍କବାଦ ବିରୋଧୀ ଏକ ମଡେଲ ଗଠନ କରିବାକୁ ପଡ଼ିବ। ଏଥିପାଇଁ ସମସ୍ତ ରାଜ୍ୟରେ ଆତଙ୍କବାଦ ବିରୋଧୀ ଏଜେନ୍ସିର କ୍ରମ, ଗଠନ ଏବଂ ଅନୁସନ୍ଧାନ ଇତ୍ୟାଦି ସମ୍ବନ୍ଧରେ ୟୁନିଫର୍ମ ଏସଓପି ପ୍ରସ୍ତୁତ କରିବାକୁ ପଡିବ। ଏହା କେନ୍ଦ୍ରର ଏଜେନ୍ସି ଏବଂ ରାଜ୍ୟଗୁଡ଼ିକ ମଧ୍ୟରେ ଉତ୍ତମ ସମନ୍ବୟକୁ ସକ୍ଷମ କରିବ।