ଇମ୍ଫାଲ,୨୭ ।୧୨: ସ୍ୱରାଷ୍ଟ୍ରମନ୍ତ୍ରୀ ଅମିତ ଶାହା ରବିବାର ମଣିପୁରର ରାଜଧାନୀ ଇମ୍ଫାଲ ପହଞ୍ଚିଛନ୍ତି । ବିମାନ ବନ୍ଦରରେ ତାଙ୍କୁ ସ୍ୱାଗତ କରାଯିବା ପରେ ସେ ମଣିପୁର ବିକାଶ ଯାତ୍ରାକୁ ସମ୍ବୋଧିତ କରିଥିଲେ । ଏହି ସମୟରେ ସେ କେତେଗୁଡିଏ ବିକାଶ ଯୋଜନାର ଉଦଘାଟନ କରିଛନ୍ତି । ଶାହା ତାଙ୍କ ସମ୍ବୋଧନରେ କହିଛନ୍ତି ଗତ ୩ ବର୍ଷ ମଧ୍ୟରେ ମଣିପୁରରେ କୌଣସି ବନ୍ଦ ଆମେ ଦେଖିନୁ । ଆଉ ୬ ବର୍ଷ ମଧ୍ୟରେ ସମସ୍ତ ସଶସ୍ତ୍ର ସମୁହ ଜଣକ ପରେ ଜଣେ ହିଂସା ଛାଡି ଦେଇଛନ୍ତି । ଏହା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦୂରଦୃଷ୍ଟି ଯାଗୁ ସମ୍ଭବ ହୋଇପାରିଛି । ଶାହା ଇମ୍ଫାଲରେ ଏକ ରାଲିକୁ ସମ୍ବୋଧନ କରିବା ସମୟରେ କହିଛନ୍ତି ପୂର୍ବରୁ ମଣିପୁର ନିୟମିତ ଭାବେ ଅବରୋଧ କାରଣରୁ ଜରୁରୀ ସାମଗ୍ରୀର ସଙ୍କଟକୁ ସାମ୍ନା କରୁଥିଲା । ହେଲେ ଗତ ୩ ବର୍ଷରେ ଏମିତି କୌଣସି ବନ୍ଦ ନଜରକୁ ଆସି ନାହିଁ । ଏଥିପାଇଁ ସେ ମୁଖ୍ୟମନ୍ତ୍ରୀ ବିରେନ ସିଂଙ୍କୁ ଧନ୍ୟବାଦ ଦେଇ କହିଛନ୍ତି ମୁଖ୍ୟମନ୍ତ୍ରୀ ରାଜ୍ୟର ଏକ ନୂଆ ପରିଚୟ ତିଆରି କରିଛନ୍ତି । ପୂର୍ବୋତ୍ତର ରାଜ୍ୟ ସବୁବେଳେ ହିଂସା ପାଇଁ ଚର୍ଚ୍ଚାରେ ରହି ଆସୁଥିଲା । ହେଲେ ଗତ ୬ ବର୍ଷ ହେଲା ଏହା ଆଉ ଦେଖାଯାଉ ନାହିଁ । ହିଂସା କମି ହୋଇଛି । ଏବେ ଆଉ ଯେଉଁମାନେ ସଶସ୍ତ୍ରଧାରୀ ଅଛନ୍ତି ସେମାନେ ବି ମୁଖ୍ୟ ସ୍ରୋତେରେ ସାମିଲ ହୋଇଯିବେ ବୋଲି ଶାହା ଅଶା ପୋଷଣ କରିଛନ୍ତି ।
