ମୁମ୍ବାଇ: ମଲ୍ଟି ଷ୍ଟାରର ଫିଲ୍ମ ‘ଉଁଚାଇ’ ୧୧ ନଭେମ୍ବର ୨୦୨୨ରେ ରିଲିଜ୍ ହେବାକୁ ଯାଉଛି । ଏଥିରେ ଅମିତାଭ ବଚ୍ଚନ, ବୋମନ ଇରାନୀ, ଅନୁପମ ଖେର, ଡ୍ୟାନି ଡେନଜୋଂଗପା, ପରିଣିତି ଚୋପ୍ରା, ସାରିକା ଓ ନିନା ଗୁପ୍ତା ଲିଡ ରୋଲରେ ଦେଖିବାକୁ ମିଳିବେ । ଫିଲ୍ମର ପ୍ରମୋଶନ ପାଇଁ ଏହାର ଟିମ୍ ଏବେ ଲାଗି ପଡିଛନ୍ତି । ହେଲେ ଅମିତାଭ ବଚ୍ଚନ ତାଙ୍କ ଶୋ’ କୌନ ବନେଗା କରୋଡପତି ପାଇଁ ବ୍ୟସ୍ତ ଥିବାରୁ ସେ ଫିଲ୍ମର ପ୍ରମୋଶନ କରିପାରୁ ନାହାନ୍ତି । କିନ୍ତୁ ନିକଟରେ ସେ ଏମିତି ଏକ ଅପିଲ କରିଛନ୍ତି ଯାହା ଚର୍ଚ୍ଚାକୁ ଆସିଛି ।
ଅମିତାଭ ତାଙ୍କ ଶୋ’ର ସ୍ପେଶାଲ ଏପିସୋଡରେ ଲୋକଙ୍କୁ କହୁଛନ୍ତି , ‘ଥିଏଟର ଯାଇ ଟିକେଟ କିଣି ଫିଲ୍ମ ଦେଖିବାର ଯେଉଁ ମଜା ଅଛି, ଏହା କିଛି ଅଲଗା ହୋଇଥାଏ । କୃପାକରି ଟିକେଟ କିଣି ଆମ ଫିଲ୍ମ ଦେଖିବାକୁ ଥିଏଟର ଯାଆନ୍ତୁ, ଆଜିକାଲି ବଡ ମହାମାରୀ ଚାଲିଛି, କେହି ଥିଏଟର ଯାଉ ନାହାନ୍ତି । ଆମେ ଆପଣଙ୍କୁ ହାତ ଯୋଡୁଛୁ, ଟିକେଟ ନେଇ ଯାଆନ୍ତୁ ।’ ବିଗ ବିଙ୍କର ଏହି ବୟାନକୁ ନେଇ କେତେକ ତାଙ୍କ ଫିଲ୍ମ ଦେଖିବା କଥା କହୁଛନ୍ତି ତ କେତେଜଣ ନେଟିଜନ୍ସ କହୁଛନ୍ତି ଫିଲ୍ମ ରିଲିଜକୁ ନେଇ ଅମିତାଭ ହାତ ଯୋଡୁଛନ୍ତି ।
ଏହି ସମୟରେ ନିନା ଆଗକୁ ଆସି କହୁଛନ୍ତି, ବିଗ ବି ଲୋକଙ୍କୁ କୁହନ୍ତୁ ଟିକେଟର ଦାମ ୩୦୦-୪୦୦ରୁ କମ ହୋଇ ୧୫୦ ଟଙ୍କା ହୋଇଯାଇଛି । ଏହାଶୁଣି ସେଠାରେ ଥିବା ଲୋକେ ଖୁବ୍ ଖୁସି ହୋଇଛନ୍ତି । ନିନା ଏହି ସମୟରେ ଫିଲ୍ମ ଶୁଟିଂ ସମୟର ଏକ କଥା ଶେୟାର କରିଛନ୍ତି । ଗୋଟିଏ ଦିନ ବିଗ ବି କାହାକୁ କିଛି ନ କହି ଜ୍ୱରରେ ବି ଶୁଟିଂ ପାଇଁ ସେଟ୍ରେ ପହଞ୍ଚିଯାଇଛନ୍ତି । ଏହାକୁ ନେଇ ନିନା କହିଛନ୍ତି, ଚାକରିରି ସୁରକ୍ଷିତ ଥାଉ, ଏଥିପାଇଁ କ’ଣ କ’ଣ ନ କରିବାକୁ ପଡୁଛି ।
ସେ ଯାହା ହେଉ, ନିକଟରେ କେବିସି ବା କୌନ ବନେଗା କରୋଡପତିରେ ଆପଣମାନେ ‘ଉଁଚାଇ’ର ଟିମକୁ ଦେଖିବାକୁ ପାଇବେ । ଏଠି ଅନୁପମ ଖେର ବିଗ ବିଙ୍କୁ ମସାଜ କରୁଥିବା ଦେଖାଯିବ । ହେଲେ ଏହାରି ଭିତରେ ଏମିତି ମୁହୂର୍ତ୍ତ ଆସିବ ଯେତେବେଳେ ସମ୍ପୂର୍ଣ୍ଣ ଟିମ ଭାବୁକ ହୋଇଯାଉଥିବେ । ଏହି ଭିଡିଓକୁ ଦେଖିବା ପରେ ଦର୍ଶକେ ଖୁବ୍ ପସନ୍ଦ କରିଛନ୍ତି । ଏହାକୁ କଲର୍ସ ସେମାନଙ୍କ ଇନଷ୍ଟାଗ୍ରାମ ପେଜରେ ଶେୟାର କରିଛନ୍ତି ।
