ଚିତ୍ରକୋଣ୍ଡା,୨୫।୭(କ୍ଷିରୋଦ କୁମାର ବେହେରା): ଆଦିବାସୀ ଅଧୁଷିତ ଉପାନ୍ତ ମାଲକାନଗିରି ଜିଲା ଚିତ୍ରକୋଣ୍ଡା ସ୍ବାଭିମାନ ଅଞ୍ଚଳ ପାପରମେଟେଲା ପଞ୍ଚାୟତ କଦଳୀବନ୍ଧା ଗାଁରେ ଚଳିତ ବର୍ଷ ଚିତ୍ରକୋଣ୍ଡା ବ୍ଳକ ମହାତ୍ମାଗାନ୍ଧୀ ଜାତୀୟ ନିଶ୍ଚିନ୍ତ କର୍ମ ନିଯୁକ୍ତି ଯୋଜନା କାର୍ଯ୍ୟକ୍ରମ ମାଧ୍ୟମରେ ଅମୃତ ସରୋବର ନିର୍ମାଣ କରାଯାଇଥିଲା। ଚଳିତ ଲଗାଣ ବର୍ଷାରେ ଉକ୍ତ ଅମୃତ ସରୋବରଟିର ହିଡ଼ ଭାଙ୍ଗିଯିବାରୁ ପାଖରେ ଥିବା ଜମି ମାନଙ୍କରେ ପାଣି, ମାଟି ଓ ପଥର ମାଡ଼ିଯାଇ ଫସଲ ନଷ୍ଟ ହେବା ସହ ଜମି ରେ ମଧ୍ୟ ବାଲି, ପଥର ଓ ମାଟି ଚରି ଯାଇଥିବାରୁ କଦଳୀବନ୍ଧା ଗ୍ରାମବାସୀ କ୍ଷୟକ୍ଷତି ପାଇଁ ବ୍ଳକ ପ୍ରଶାସନ ତଥା ତହସିଲଦାରଙ୍କୁ ଜଣାଇଥିଲେ ।
ମଙ୍ଗଳବାର ସକାଳୁ ଚିତ୍ରକୋଣ୍ଡା ବିଡ଼ିଓ ରଘୁନାଥ ମୁଣ୍ଡାରୀ ଏବଂ ଏପିଓ ଉଚ୍ଚବ ଗିରି ଉକ୍ତ କଦଳିବନ୍ଧା ଗ୍ରାମକୁ ଯାଇ ଅମୃତ ସରୋବର ବୁଲି ଦେଖିବା ସହ ନଷ୍ଟ ହୋଇଥିବା ଫସଲ ଓ ଜମି ବୁଲି ଦେଖି ଗ୍ରାମବାସୀଙ୍କ ସହ ଆଲୋଚନା କରିଥିଲେ। ଗ୍ରାମବାସୀଙ୍କ ଦାବି ମୁତାବକ ଅମୃତ ସରୋବରର ଭାଙ୍ଗିଥିବା ହିଡ଼କୁ ତିଆରି କରିବାକୁ ଯୋଜନା କରିବା ସହ ବ୍ୟକ୍ତିଗତ ଭାବରେ ୭ଜଣ ଚାଷୀଙ୍କର ଅଧିକ ନଷ୍ଟ ହୋଇଥିବା ଚାଷୀଙ୍କୁ ମିଶାଇ ୨୦ଜଣ ଚାଷୀଙ୍କୁ ଜମି ମରାମତି ପାଇଁ ଚାରି ଲକ୍ଷ ଟଙ୍କା ଦିଆଯିବ ବୋଲି ପ୍ରକାଶ କରିଛନ୍ତି। ଏଥି ସହିତ କଦଳିବନ୍ଧା ଗ୍ରାମ ଠାରୁ ର୍ସିଲିମେଟା ପର୍ଯ୍ୟନ୍ତ ପାହାଡ଼ବାଟରେ ରାସ୍ତା ର୍ନିମାଣ ପାଇଁ ପ୍ରତିଶ୍ରୁତି ଦେଇଛନ୍ତି l ସେଇଭଳି ନଷ୍ଟ ହୋଇଥିବା ଫସଲ ପାଇଁ ଚିତ୍ରକୋଣ୍ଡା ତହସିଲ କାର୍ଯ୍ୟାଳୟ ତରଫରୁ ଏକ ହେକ୍ଟର ଚାଷ ପିଛା ଆଠ ହଜାର ଟଙ୍କା କ୍ଷୟକ୍ଷତି ଦିଆଯିବ ବୋଲି ଚିତ୍ରକୋଣ୍ଡା ତହସିଲଦାର ଟି. ପଦ୍ମନାଭ ଦୋରା ପ୍ରକାଶ କରିଛନ୍ତି।