ବଅଁରପାଳ,୩୦ା୭(ଡି.ଏନ୍.ଏ.): ନବରତ୍ନପ୍ରାପ୍ତ ରାଷ୍ଟ୍ରାୟତ ଉଦ୍ୟୋଗରୁ ଘରୋଇକରଣ ବନ୍ଦ କରାଯିବା ଏବଂ ଶ୍ରମ ଆଇନ ସଂଶୋଧନ ବିରୋଧରେ ଗୁରୁବାର ନାଲ୍କୋ ଆଲୁମିନିୟମ ମଜଦୂର ସଂଘ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଥିଲା। ସଂଘ ପକ୍ଷରୁ ସରକାର ଜାଗୋ କାର୍ଯ୍ୟକ୍ରମ ସହ ଏହି ବିକ୍ଷୋଭ ପ୍ରଦର୍ଶନ କରାଯାଇଛି। ନାଲ୍କୋ ଭଳି ନବରତ୍ନ କମ୍ପାନୀ ସର୍ବଦା ରାଜ୍ୟ ଓ କେନ୍ଦ୍ର ସରକାରଙ୍କୁ ଲାଭ ଦେଇ ଆସିଛି। ମାତ୍ର ନାଲ୍କୋକୁ ଘରୋଇକରଣ କରାଗଲେ ଶ୍ରମିକ ତଥା ଦେଶର ଲୋକମାନଙ୍କର ବହୁ କ୍ଷତି ହେବ ବୋଲି ସଂଘ ପକ୍ଷରୁ କୁହାଯାଇଛି। ସେହିପରି ନାଲ୍କୋ ହାତରେ ଆଉ ୫୩.୫ ପ୍ରତିଶତ ପୁଞ୍ଜି ରହିଛି। ଆଉ ୪ ପ୍ରତିଶତ ପୁଞ୍ଜି ଘରୋଇ କମ୍ପାନୀ ହାତକୁ ଚାଲିଗଲେ ଏହି ନାଲ୍କୋ ସମ୍ପୂର୍ଣ୍ଣ ଭାବେ ଘରୋଇକରଣ ହୋଇଯିବ ବୋଲି ସଂଘ ପକ୍ଷରୁ କୁହାଯାଇଛି। ତେଣୁ ଆଜି ସକାଳେ ସଂଘ ପକ୍ଷରୁ ଏହାକୁ ନେଇ ବିରୋଧ କରାଯାଇଥିଲା। ଏଥିରେ ସଂଘର ସଭାପତି ସୁବାସ ଚନ୍ଦ୍ର ସାହୁ, ସାଧାରଣ ସମ୍ପାଦକ ରମେଶ ଚନ୍ଦ୍ର ବେହେରା, କାର୍ଯ୍ୟକାରୀ ସଭାପତି ବିନୋଦ ସାମଲ, ପରମାନନ୍ଦ ବେହେରା, ନେହେରୁ ସାହୁଙ୍କ ସମେତ ବହୁ କର୍ମକର୍ତ୍ତା ସାମିଲ ହୋଇଥିଲେ।