ନିମାପଡ଼ା,୨0।୧(ଡି.ଏନ୍.ଏ.): ନିମାପଡ଼ା ଥାନା ଅନ୍ତର୍ଗତ ଭଗବାନସୁଳରା ଗ୍ରାମର ଏକ ବିଲରେ ଗାଈ ଚରାଇ ଫସଲ ନଷ୍ଟ କରିବା ଘଟଣାକୁ ନେଇ ଜଣେ ପଡ଼ୋଶୀ ଗ୍ରାମର ଜଣେ ଦିବ୍ୟାଙ୍ଗ ବ୍ୟକ୍ତିଙ୍କୁ ମାଡ଼ ମାରିବା ସହ ତାଙ୍କ ୧୧ମାସର ଶିଶୁପୁତ୍ରଙ୍କୁ କଚାଡ଼ି ଦେଇଥିବା ଅଭିଯୋଗ ହୋଇଛି। ଏ ନେଇ ପୋଲିସ ବୁଧବାର ଏକ ମାମଲା(ନଂ.୨୯/୨୨) ରୁଜୁ କରି ତଦନ୍ତ ଚଳାଇଛି। ସୂଚନାଯୋଗ୍ୟ, ଭଗବାନସୁଲରା ଗ୍ରାମର ଦିବ୍ୟାଙ୍ଗ ନାରାୟଣ ଭୋଳଙ୍କ ବିଲରେ ଉକ୍ତ ଗ୍ରାମର ଛବିନ୍ଦ୍ର ଭୋଳଙ୍କ ଗାଈ ପଶି ଫସଲ ନଷ୍ଟ କରିଥିଲା। ନାରାୟଣ ଏହି କଥାକୁ ନେଇ ଛବିନ୍ଦ୍ରଙ୍କୁ କହିବାରୁ କଥା କଟାକଟି ସହ ପାଟିତୁଣ୍ଡ ହୋଇଥିଲା। ଏଥିରେ ଛବିନ୍ଦ୍ର ଉତ୍ତ୍ୟକ୍ତ ହୋଇ ନାରାୟଣଙ୍କୁ ମାଡ଼ ମାରିବା ସହ ସେ ଧରିଥିବା ତାଙ୍କ ୧୧ମାସ ଶିଶୁପୁତ୍ରକୁ ତଳେ କଚାଡ଼ି ଦେଇଥିଲେ। ଶିଶୁପୁତ୍ରଟି ତଳେ ପଡ଼ି ଗୁରୁତର ହେବାରୁ ପରିବାର ଲୋକେ ନିମାପଡ଼ା ମେଡିକାଲ ନେଇଥିଲେ। ଅବସ୍ଥା ସଙ୍କଟାପନ୍ନ ହେବାରୁ ଶିଶୁପୁତ୍ରକୁ କ୍ୟାପିଟାଲ ହସ୍ପିଟାଲ ସ୍ଥାନାନ୍ତର କରାଯାଇଥିଲା। ପରେ ଏ ନେଇ ନାରାୟଣ ଆକ୍ରମଣକାରୀ ଛବିନ୍ଦ୍ରଙ୍କ ନାମରେ ଥାନାରେ ଅଭିଯୋଗ କରିଥିଲେ। ଅଭିଯୋଗକ୍ରମେ ପୋଲିସ ତଦନ୍ତ କରୁଥିବାବେଳେ ଛବିନ୍ଦ୍ର ଫେରାର ହୋଇଯାଇଛନ୍ତି।