ସିଡ୍ନୀ,୧୭।୧୦: ଭାରତ ଟି-୨୦ ବିଶ୍ୱକପ୍ ପାଇଁ ପ୍ରସ୍ତୁତି ଆରମ୍ଭ କରିଛି। ନେଟ୍ ଅଭ୍ୟାସରେ ଟିମ ଇଣ୍ଡିଆର ଖେଳାଳିମାନେ ଝାଳ ବୁହାଉଛନ୍ତି। ଏସବୁ ମଧ୍ୟରେ ବିସିସିଆଇ ସୋସିଆଲ ମିଡିଆରେ ଏକ ଭିଡିଓ ଶେୟାର କରିଛି। ପରେ ଭାଇରାଲ ହୋଇଛି। ଏହି ଭିଡିଓରେ ଜଣେ ୧୧ ବର୍ଷୀୟ ବୋଲର ଟିମ୍ ଇଣ୍ଡିଆର ଅଧିନାୟକ ରୋହିତ ଶର୍ମା ନେଟ୍ରେ ଅଭ୍ୟାସ କରାଉଥିବା ଦେଖିବାକୁ ମିଳିଛି। କେବଳ ଏତିକି ନୁହେଁ, ରୋହିତ ଏହି ଖେଳାଳିଙ୍କୁ ଟିମ ଇଣ୍ଡିଆ ପାଇଁ ଖେଳିବାକୁ ମଧ୍ୟ କହିଛନ୍ତି। ସେ ବୋଲରଙ୍କ ନାଁ ହେଉଛି ଦ୍ରଶିଲ ଚୌହାନ। ସେ ରୋହିତଙ୍କ ଜଣେ ପ୍ରଶଂସକ। ନେଟ୍ରେ ସେ ନିଜ ବୋଲିଂ ଜରିଆରେ ରୋହିତଙ୍କୁ ପ୍ରଭାବିତ କରିଥିଲେ। ପରିସ୍ଥିତି ଏପରି ହୋଇଥିଲା ଯେ, ରୋହିତ ଦ୍ରଶିଲଙ୍କୁ ଡାକି ଡ୍ରେସିଂ ରୁମ୍କୁ ନେଇଥିଲେ।
ବିସିସିଆଇ ଦ୍ୱାରା ଶେୟାର କରାଯାଇଥିବା ଭିଡିଓରେ ଦ୍ରଶିଲ କହିଛନ୍ତି, ସେ ଜଣେ ବାମହାତୀ ଦ୍ରୁତ ବୋଲର ଏବଂ ତାଙ୍କର ଇନ୍ସୁଇଙ୍ଗ ୟର୍କର ଏବଂ ଆଉଟ୍ ସୁଇଙ୍ଗର ତାଙ୍କର ପ୍ରିୟ ବଲ।
ଟି-୨୦ ବିଶ୍ୱକପ ୨୦୨୨ରେ ଟିମ୍ ଇଣ୍ଡିଆ ୨୩ ଅକ୍ଟୋବରରେ ପାକିସ୍ତାନ ବିପକ୍ଷରେ ପ୍ରଥମ ମ୍ୟାଚ ଖେଳିବ। ଉଭୟ ଦଳ ମଧ୍ୟରେ ଏହି ମ୍ୟାଚ ମେଲବୋର୍ନ କ୍ରିକେଟ ଗ୍ରାଉଣ୍ଡରେ ଖେଳାଯିବ।