ଭଣ୍ଡାରିପୋଖରୀ, ୨୮।୯ (ଡି.ଏନ.ଏ.): ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକ ଷୋଳମପୁର ପଞ୍ଚାୟତ ମୁଢ଼ାପଦା ଗ୍ରାମସ୍ଥିତ ବୈତରଣୀ ନଦୀକୂଳରୁ ଦୁଇଟି ପ୍ରାଚୀନ ବୁଦ୍ଧ ମୂର୍ତ୍ତି ଉଦ୍ଧାର ହୋଇଛି। ଏହା ଅଷ୍ଟମ ଓ ନବମ ଶତାବ୍ଦୀର ଖଣ୍ଡୋଲାଇଟ ପ୍ରସ୍ତରରେ ନିର୍ମିତ ଷୋଳମପୁର ବୌଦ୍ଧ ବିହାରରେ ଭୌମକର ଶାସନ ସମୟର ବୋଲି ଗବେଷକ ଏକାଦଶୀ ପାଢ଼ୀ କହିଛନ୍ତି। । ଏବେ ଏହାକୁ ଷୋଳମପୁର ବୌଦ୍ଧ ବିହାର ସଂଗ୍ରହାଳୟକୁ ହସ୍ତାନ୍ତର କରାଯାଇଛି।
ପ୍ରକାଶ ଯେ, ମୁଢ଼ାପଦା ଗ୍ରାମର ନରେନ୍ଦ୍ର ମହାନ୍ତିଙ୍କ ପୁଅ ପ୍ରୀତମ ବୈତରଣୀ ନଦୀ ଶଯ୍ୟାରେ ବାଲି ଉତ୍ତୋଳନ କରୁଥିବା ବେଳେ ମୂର୍ତ୍ତି ଦୁଇଟି(ବୁଦ୍ଧଙ୍କ ମସ୍ତକ ଓ ବୌଦ୍ଧ ଦେବୀ ମୂର୍ତ୍ତି) ପାଇ ଘର ନିକଟରେ ରଖିଥିଲେ। ସ୍ଥାନୀୟ ଯୁବକ ସୁରଥ ଦାସଙ୍କଠାରୁ ଖବର ପାଇ ଗବେଷକ ବିଶ୍ବମ୍ବର ରାଉତ ସେଠାରେ ପହଞ୍ଚି ମୂର୍ତ୍ତି ଦୁଇଟିକୁ ଅନୁଧ୍ୟାନ କରିଥିଲେ। ମହାନ୍ତିଙ୍କ ପରିବାର ଲୋକଙ୍କ ଇଚ୍ଛାମତେ ଷୋଳମପୁର ବୌଦ୍ଧବିହାର ସଂଗ୍ରହାଳୟକୁ ଉକ୍ତ ମୂର୍ତ୍ତିକୁ ପ୍ରଦାନ କରାଯାଇଥିଲା। ଏହି ମୂର୍ତ୍ତି ପ୍ରଦାନ ବେଳେ ପୂଜକ ଉମାକାନ୍ତ ପଣ୍ଡା, ଚିତ୍ତରଞ୍ଜନ ପଣ୍ଡା, ଟ୍ରଷ୍ଟି କମଳାକାନ୍ତ ନାୟକ, ନରହରି ନାୟକ ପ୍ରମୁଖ ଉପସ୍ଥିତ ଥିଲେ।