ନବରଙ୍ଗପୁର,୨୭।୯(ବି.ପ୍ର.):ଶିକ୍ଷା ମାନବ ସମାଜର ଦର୍ପଣ। ହେଲେ ଭିତ୍ତିଭୂମିର ବିକାଶ ନ କରାଯାଇ ବିଦ୍ୟାଳୟଗୁଡ଼ିକୁ ପ୍ରାଥମିକରୁ ମାଧ୍ୟମିକ ବିଭାଗକୁ ଉନ୍ନୀତ କରି ଦିଆଯାଉଛି ା ଛାତ୍ରୀଛାତ୍ର ବସିବା ପାଇଁ କ୍ଲାସ୍ ରୁମ୍ ନାହିଁ। ଖେଳକୁଦ ପାଇଁ ମଧ୍ୟ ପଡ଼ିଆଟିଏ ନ ଥିବା ଦୃଶ୍ୟ ଦେଖିବାକୁ ମିଳୁଛି ନବରରଙ୍ଗପୁର ଜିଲା ନନ୍ଦାହାଣ୍ଡି ବ୍ଲକ ମେଣ୍ଟ୍ରି ବିଦ୍ୟାଳୟରେ।
୧୯୦୨ରେ ଏହି ବିଦ୍ୟାଳୟ ସ୍ଥାପିତ। ଏବେ ତାହା ଉନ୍ନୀତ କରାଯାଇ ୟୁଜି ହାଇସ୍କୁଲ ଭାବେ ପରିଚାଳିତ ହେଉଛି। ବିଦ୍ୟାଳୟରେ ୧ମରୁ ୧୦ମ ଶ୍ରେଣୀ ପର୍ଯ୍ୟନ୍ତ ୪୧୦ ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ବିଦ୍ୟାଳୟର ସମସ୍ତ ଶ୍ରେଣୀଗୃହ ଆଜବେଷ୍ଟସ୍ ପଡ଼ିଛି। ଆଜ୍ବେଷ୍ଟସ୍ଗୁଡିକ ଫାଟିଯାଇଛି ା ଶ୍ରେଣୀଗୃହ ଅଭାବ ଯୋଗୁ ପ୍ରଥମ ଓ ଦ୍ୱୀତୀୟ ଶ୍ରେଣୀ ଛାତ୍ରୀଛାତ୍ର ଗୋଟିଏ କୋଠରିରେ ବସି ପାଠ ପଢୁଛନ୍ତି। ଅଷ୍ଟମ ଶ୍ରେଣୀ ପିଲାମାନେ ବସି ପଢ଼ୁଥିବା କୋଠାର ଆଜ୍ବେଷ୍ଟସ୍ ଫାଟିଯାଇଛି। ଫଳରେ ବର୍ଷାଦିନେ ପିଲାମାନେ ଶ୍ରେଣୀଗୃହରେ ଛତା ଧରି ବସି ପଢ଼ୁଥିବା ଦୃଶ୍ୟ ଦେଖିବାକୁ ମିଳୁଛି। ନବମ ଶ୍ରେଣୀରେ ୯୧ ଓ ୧୦ମରେ ୪୮ ଜଣ ଛାତ୍ରୀଛାତ୍ର ପଢୁଛନ୍ତି। ଗୋଟିଏ କୋଠରିରେ ନବମ ଶ୍ରେଣୀ ଛାତ୍ରୀଛାତ୍ର ଖୁନ୍ଦାଖୁନ୍ଦି ହୋଇ ବସୁଛନ୍ତି। କାର୍ଯ୍ୟାଳୟ ସମେତ ଦୁଇଟି କୋଠରିରେ ସ୍ବଳ୍ପ ବର୍ଷା ହେଲେ ପାଣି ଗଳୁଛି। ପିଲାମାନେ ବସି ପାଠ ପଢ଼ିବା କଷ୍ଟକର ହୋଇପଡୁଛି। ପିଲାମାନେ ଖେଳିବା ପାଇଁ ପଡ଼ିଆଟିଏ ମଧ୍ୟ ନାହିଁ। ଅତିରିକ୍ତ ଶ୍ରେଣୀଗୃହ ଓ ପାଚେରି ନିର୍ମାଣ ପାଇଁ ଅନେକ ଥର ଜିଲାପାଳ, ବିଧାୟକ ଓ ଏମ୍ପିଙ୍କୁ ଦର୍ଶାଯାଇଛି। ତଥାପି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ। ନଳକୂପ ରହିଛି। ପାଣି ପିଇବା ଉପଯୋଗୀ ହୋଇ ପାରୁନାହିଁ। ଗାଁକୁ ଯୋଗାଣ ହେଉଥିବା ପାଇପ ଯୋଗେ ପାଣି ବିଦ୍ୟାଳୟକୁ ଅଣାଯାଇଛି। ସେଥିରେ ମଧ୍ୟ ଠିକ୍ ଭାବେ ପାଣି ଆସୁ ନାହିଁ। ପିଲାମାନେ ପିଇବା ପାଣି ପାଇଁ ବହୁ ସମସ୍ୟାର ସମ୍ମୁ୍ଖୀନ ହେଉଛନ୍ତି। ମଧ୍ୟାହ୍ନଭୋଜନ ରୋଷେଇ ପାଇଁ ପାଣିର ଆବଶ୍ୟକ ରହୁଛି। ବିଦ୍ୟାଳୟରେ ଅତିରିକ୍ତ ଶ୍ରେଣୀଗୃହ, ପାଚେରି ଓ ପାଣିର ବ୍ୟବସ୍ଥା କରାଯାଉ ବୋଲି କହିଛନ୍ତି ଅଭିଭାବକ। ଏନେଇ ଜିଲା ଶିକ୍ଷାଧିକାରୀ ପ୍ରଦୀପ କୁମାର ନାଗଙ୍କୁ ପଚାରିବାରୁ ଶ୍ରେଣୀଗୃହ ନିର୍ମାଣ ପାଇଁ ପ୍ରସ୍ତାବ ରହିଛି । ବିଦ୍ୟାଳୟର ଉନ୍ନତୀକରଣ କରାଯିବ ବୋଲି ସେ କହିଛନ୍ତି।