କୋଚି,୩।୮: ଏୟାର ଇଣ୍ଡିଆ ଏକ୍ସପ୍ରେସ ବିମାନ କୋଚିରେ ଜରୁରୀକାଳୀନ ଅବତରଣ କରିଛି। ଏହି ବିମାନ କୋଚିରୁ ଶାରଜା ଅଭିମୁଖେ ଯାଉଥିଲା କିନ୍ତୁ ବିମାନ ଉଡ଼ାଣର କିଛି ସମୟ ପରେ ଜଣେ ଯାତ୍ରୀ ବିମାନରେ ଧୂଆଁ ଗନ୍ଧ ଆସୁଥିବା ଅଭିଯୋଗ କରିଥିଲେ। ଏହା ପରେ ସତର୍କତାମୂଳକ ପଦକ୍ଷେପ ଭାବରେ ବିମାନଟି କୋଚି ବିମାନବନ୍ଦରକୁ ଫେରାଇ ନିଆଯାଇଥିଲା। ଖବର ଅନୁଯାୟୀ ବୁଧବାର ରାତିରେ କୋଚି ଅନ୍ତର୍ଜାତୀୟ ବିମାନବନ୍ଦରରୁ ଏୟାର ଇଣ୍ଡିଆ ଏକ୍ସପ୍ରେସ ବିମାନ ଉଡ଼ାଣ କରିଥିଲା। ବିମାନ ଅବତରଣ କରିବା ପରେ ବୈଷୟିକ ବିଶେଷଜ୍ଞଙ୍କ ଦ୍ୱାରା ଯାଞ୍ଚ କରାଯାଇଥିଲା କିନ୍ତୁ କୌଣସି ଜିନିଷ ପୋଡି ନଥିଲା। ଏଥି ସହିତ ବିମାନରେ ଥିବା ୧୭୫ ଜଣ ଯାତ୍ରୀଙ୍କୁ ଅନ୍ୟ ଏକ ବିମାନ ଦ୍ୱାରା ଶାରଜାକୁ ପଠାଯାଇଥିଲା।