କୋଇମ୍ବାଟୁର, ୧୭।୯(ପି.ଟି.): ଦୁଲିପ ଟ୍ରଫି କ୍ରିକେଟ ସେମିଫାଇନାଲ ଅବସରରେ ଖେଳାଳିଙ୍କ ଆହତ ସମସ୍ୟା ଯୋଗୁ ଆମ୍ବୁଲାନ୍ସକୁ ପଡ଼ିଆ ଭିତରକୁ ଆସିବାକୁ ପଡ଼ିଛି। ପଶ୍ଚିମାଞ୍ଚଳ ଓ କେନ୍ଦ୍ରାଞ୍ଚଳ ମଧ୍ୟରେ ଚାଲିଥିବା ମ୍ୟାଚ ଅବସରରେ ଶୁକ୍ରବାର ଏହି ଘଟଣା ଘଟିଥିଲା। ପଶ୍ଚିମାଞ୍ଚଳ ମିଡିୟମ ପେସର ଚିନ୍ତନ ଗାଜାଙ୍କ ଏକ ବିପଜ୍ଜନକ ଥ୍ରୋରେ କେନ୍ଦ୍ରାଞ୍ଚଳର ଭେଙ୍କଟେଶ୍ ଆୟାର ଆହତ ହୋଇଥିଲେ। ଗାଜା ଫଲୋ ଥ୍ରୁ ଅବସରରେ ତରବରିଆଭାବେ କରିଥିବା ଥ୍ରୋ ଭେଙ୍କଟେଶ୍ଙ୍କ ମୁଣ୍ଡରେ ବାଜିଥିଲା। ଭାରତୀୟ ଦଳ ପକ୍ଷରୁ ଖେଳି ସାରିଥିବା ଭେଙ୍କଟେଶ ଏଠାରେ ଗାଜାଙ୍କ ବଲ୍ରେ ଏକ ଛକା ମାରି ନିଜ ଇନିଂସ ଆରମ୍ଭ କରିଥିଲେ। ପରବର୍ତ୍ତୀ ବଲ୍କୁ ସେ ଗାଜାଙ୍କ ଆଡ଼କୁ ମାରିଥିଲେ। ମାତ୍ର ଗାଜା ବଲ୍କୁ ଫିଲ୍ଡିଂ କରିନେଇ ଭେଙ୍କଟେଶଙ୍କ ଆଡ଼କୁ ଥ୍ରୋ କରିଥିଲେ। ମୁଣ୍ଡରେ ବଲ୍ ଆଘାତ ଦେବାବରେ ଭେଙ୍କଟେଶ୍ ଯନ୍ତ୍ରଣା ଅନୁଭବ କରି ପଡ଼ିଆରେ ପଡ଼ି ଯାଇଥିଲେ। ସଙ୍ଗେସଙ୍ଗେ ଆମ୍ବୁଲାନ୍ସ ପଡ଼ିଆ ମଝିକୁ ଆସିଥିଲା। ଷ୍ଟ୍ରେଚର ମଧ୍ୟ ବାହାର କରାଯାଇଥିଲା। ମାତ୍ର ୨୭ ବର୍ଷୀୟ ଆୟାର ଚାଲିଚାଲି ପଡ଼ିଆ ବାହାରକୁ ଯିବାକୁ ନିଷ୍ପତ୍ତି ନେଇଥିଲେ। ବିଶ୍ରାମ ନେବାପରେ ଭେଙ୍କଟେଶ୍ ଯଦିଓ ବ୍ୟାଟିଂ କରିବାକୁ ଆସିଥିଲେ ତେବେ ମାତ୍ର ୧୪ ରନକରି ଆଉଟ ହୋଇ ଯାଇଥିଲେ। ତେବେ ସେ ପରେ ଫିଲ୍ଡିଂ କରିବାକୁ ଆସି ନ ଥିଲେ। ତାଙ୍କ ସ୍ଥାନରେ ଅଶୋକ ମିନାରିଆ ଫିଲ୍ଡିଂ କରିଥିଲେ।
